Jiñi i testigojob Jehová cabʌl chuqui miʼ melob chaʼan i chʼujutesʌntel Dios yicʼot miʼ coltañob yambʌlob ñumen ti 200 país yicʼot territorio tac. Pero cojach ti 35 país baqui jiñi taqʼuin muʼ bʌ i yʌcʼob jiñi hermanojob miʼ jastiyel chaʼan chuqui tac miʼ cʼʌjñel. Jin chaʼan, ¿chuqui miʼ mejlel ti jiñi yan tac bʌ país baqui mach wen cabʌlic taqʼuin?

 Jiñi Junmojt muʼ bʌ i pʌsob bij chaʼan i testigojob Jehová miʼ qʼuel jiñi eʼtel tac yom bʌ miʼ mejlel yicʼot bajcheʼ yom miʼ cʌntʌntel jiñi Testigojob añoʼ bʌ tiʼ petol pañimil. Wen jach bajcheʼ miʼ cʼʌjñel jiñi taqʼuin muʼ bʌ i yʌjqʼuel. Mi jumpʼejl sucursal cabʌl tsaʼ aqʼuenti taqʼuin i maʼañic mi caj i luʼ cʼʌn, miʼ chocben majlel jiñi yan tac bʌ sucursal i cʼʌjñibal bʌ i chaʼan. Cheʼʌch miʼ melob bajcheʼ jiñi xñoptʼañob ti ñaxam bʌ siglo. Tsiʼ cʼʌñʌyob jiñi tsaʼ bʌ colobʌyi chaʼan miʼ coltañob yambʌ xñoptʼañob mach bʌ cabʌlic chuqui añob i chaʼan, i cheʼ bajcheʼ jiñi «junlajal» chuqui miʼ mejlel (2 Corintios 8:14).

 ¿Bajcheʼ yubil miʼ yubiñob i bʌ jiñi hermanojob muʼ bʌ i yʌqʼuentelob jiñi taqʼuin maʼañic bʌ tsiʼ luʼ cʼʌñʌ jiñi yan tac bʌ sucursal? Jumpʼejl ejemplo, ti Tanzania, baqui ñumen ti ojlil jiñi lac piʼʌlob mucʼ jach i cʼʌñob 40 peso ti jujumpʼejl qʼuin chaʼan miʼ mʌcʼlañob i bʌ, tsaʼ cʼʌjñi jiñi taqʼuin chaʼan miʼ tojʼesʌntel jiñi i Yotlel tempa bʌ chaʼan jiñi congregación Mafinga. Jiñi hermanojob ti ili congregación tsiʼ yʌlʌyob: «Cheʼ bʌ tsaʼ tojʼesʌnti jiñi i Yotlel tempa bʌ, tsaʼix ñumen ocʼayon lojon. Mi lon cʌqʼuen wen wocolix i yʌlʌ jiñi i yorganización Jehová yicʼot pejtelel jiñi hermanojob añoʼ bʌ tiʼ petol pañimil cheʼ miʼ tʼoxob chuqui añob i chaʼan. Wʌle añix lon c chaʼan jumpʼejl utsʼatax bʌ i Yotlel tempa bʌ baqui mi lon c chʼujutesan Jehová».

 Tiʼ caj jiñi pandemia chaʼan COVID-19, an hermanojob ti Sri Lanka maʼañic bʌ an i wen tajayob chuqui miʼ cʼuxob. Juntiquil jiñʌch jiñi hermana Imara Fernando yicʼot jiñi i yalobil i cʼabaʼ Enosh. Pero wocolix i yʌlʌ jiñi donación tac muʼ bʌ i yʌjqʼuel ti yan tac bʌ país, tsaʼ aqʼuentiyob jiñi i cʼʌjñibal bʌ i chaʼañob. Cheʼ jiñi tsiʼ meleyob jumpʼejl tarjeta i tiʼ tsʼijbuyob: «Mi lon cʌqʼuen wocolix i yʌlʌ jiñi hermanojob tsaʼ bʌ i pʌsbeyon lon cʼuxbiya ti ili wocol. Wen tijicñayon lon cheʼ ochemon lon ti ili familia i mi lon c bej cʼajtiben Jehová ti oración chaʼan miʼ chʌn coltan pejtelel jiñi hermanojob ti ili cojix tac bʌ qʼuin».

 Pejtelel jiñi hermanojob mucʼʌch i mulañob i tʼoxob chuqui añob i chaʼan mach yʌlʌyic baqui chumulob. Jumpʼejl ejemplo, Enosh tsiʼ tempa taqʼuin ti jumpʼejl alʌ caja chaʼan miʼ yʌcʼ ti donación i miʼ coltan jiñi familia tac ñumen i cʼʌjñibal bʌ i chaʼañob. Guadalupe Álvarez miʼ mulan i tʼox jaʼel chuqui tac an i chaʼan. Chumul ti México baqui yonlel lac piʼʌlob maʼañic miʼ wen tajob taqʼuin. Pero miʼ chaʼlen wersa chaʼan miʼ chaʼlen coltaya. Guadalupe miʼ yʌl: «Mi cʌqʼuen wocolix i yʌlʌ Jehová chaʼan jiñi i cʼuxbiya yicʼot i yutslel. Cujil chaʼan jiñi c donación tac yicʼot i chaʼan yañoʼ bʌ mucʼʌch caj i wen cʼʌjñibʌyel i chaʼan jiñi hermanojob woli bʌ i ñusañob wocol».

 Jiñi sucursal tac muʼ bʌ i yʌcʼob jiñi taqʼuin wen tijicñayob cheʼ miʼ melob jiñi. Anthony Carvalho, ochem bʌ ti jiñi Comité chaʼan Sucursal ti Brasil, miʼ yʌl: «Ti cabʌl jab, jiñi yan tac bʌ sucursal tsiʼ coltayon lon ti taqʼuin. Iliyi an i yʌcʼʌ chaʼan miʼ ñumen mejlel jiñi eʼtel. Ili ora maʼañix mi lon c ñusan wocol tiʼ caj taqʼuin i mi lon j coltan yañoʼ bʌ. Jiñi hermanojob miʼ qʼuelob jiñi subtʼan bajcheʼ jumpʼejl eʼtel muʼ bʌ i mejlel tiʼ petol pañimil i miʼ qʼuelob chaʼan miʼ mejlelob ti coltaya bajcheʼ wem bʌ xcʌntʼañob i chaʼan Cristo».

 ¿Bajcheʼ miʼ mejlel i coltañob i yermañujob jiñi i testigojob Jehová cheʼ bʌ miʼ ñusañob wocol? Ñumen wen cheʼ mi laʼ wʌcʼ laʼ donación chaʼan jiñi eʼtel muʼ bʌ i mejlel tiʼ petol pañimil i maʼañic mi lac choc majlel jiñi taqʼuin ti jiñi sucursal tac ti yan tac bʌ país. Miʼ mejlel laʼ mel laʼ donación yaʼ ti caja tac am bʌ ti jujumpʼejl congregación baqui miʼ yʌl «Eʼtel tiʼ petol pañimil» o ti donate.pr418.com. Wen ñuc i cʼʌjñibal jiñi laʼ donación tac.