«Maʼañic tsaʼ lac wis ñaʼta chaʼan mi caj lac taj ti lac celular o ti lac tableta jiñi chʼujul bʌ bʌlñʌcʼʌl». ¿Cheʼ ba maʼ ñaʼtan jatet? Ili jiñʌch tsaʼ bʌ i yʌlʌ jiñi hermano Geoffrey Jackson ti jiñi Informe 6 chaʼan jiñi Junmojt muʼ bʌ i pʌsob bij ti jiñi jabil 2020. I tsiʼ bej alʌ: «Mach la cujilic chuqui woli lac mel cheʼ machic an lac chaʼan jiñi JW Library, i wolʌch i wen coltayonla iliyi. Wajalix cajel i chajpañonla tilel Jehová chaʼan mi lac lʌtʼ jiñi wocol tac woli bʌ lac ñusan ili ora».

 ¿Bajcheʼ woliʼ chajpañonla tilel Jehová? ¿Chuqui tsaʼ cʼʌjñibʌyi chaʼan miʼ mejlel jiñi aplicación JW Library? ¿I chuqui yom miʼ mejlel chaʼan miʼ chʌn tsijibtesʌntel yicʼot miʼ ñumen weñʼesʌntel?

 Ti mayo cheʼ ti 2013, jiñi Junmojt muʼ bʌ i pʌsob bij tsiʼ yʌqʼue tiʼ wenta Programación chaʼan MEPS, jumpʼejl departamento am bʌ yaʼ ti central mundial, chaʼan miʼ mel jumpʼejl aplicación baqui miʼ tilel jiñi Traducción del Nuevo Mundo. Paul Willies, muʼ bʌ i chaʼlen eʼtel ti ili departamento, tsiʼ yʌlʌ: «Maʼañic baʼ ora locʼsʌbil lon c chaʼan jumpʼejl aplicación ti jiñi tienda chaʼan aplicación tac. Chaʼan miʼ mejlel jiñi aplicación, an proyecto tac tsaʼ bʌ j cʌyʌ lon c mel. Tsaʼ lon c mele jumpʼejl equipo i tsaʼ lon c tem chaʼle eʼtel quicʼot yambʌ departamento tac yaʼ ti Betel. Tsaʼ lon c wen chaʼle oración i tsaʼ lon j qʼuelbe i coltaya Jehová: Tsaʼ jach ñumi joʼpʼejl uw i tsaʼ pʌsle jiñi aplicación ti jiñi reunión anual».

 Cheʼ jiñi tsaʼ loqʼui yambʌ wocol: Yom miʼ sujtesʌntel JW Library ti jumpʼejl biblioteca tsʼʌcʌl bʌ chuqui an i chaʼan, baqui ñumen an jun tac yicʼot ti cabʌl tʼan. Ti enero cheʼ ti 2015, jiñi aplicación añix i chaʼan lʌcʼʌ tiʼ pejtelel jiñi jun tac ti inglés, tsaʼ ñumi 6 uw i muqʼuix i mejlel i chaʼlentel ti descargar jun tac ti cabʌl tʼan.

 Jiñi hermanojob cabʌl bajcheʼ woliʼ bej weñʼesañob jiñi aplicación. Jumpʼejl ejemplo, otsʌbil i chaʼañob video tac yicʼot jumpʼejl sección baqui miʼ laj tilel pejtelel muʼ bʌ laj cʼʌn ti tempa bʌ tac. Cheʼ jaʼel, yaʼ ti Biblia muqʼuix i mejlel laj qʼuel jiñi referencia tac chaʼan jiñi Coltʌntel chaʼan estudio.

 Jiñi aplicación JW Library miʼ cʼʌjñel ti ñumen ti 15 millón celular, tableta o yan tac bʌ ti jujumpʼejl uw. Ti ili 15 millón, an 8 millón ti jujumpʼejl bʌ qʼuin miʼ cʼʌñob. ¿Chuqui yom miʼ mejlel chaʼan maʼañic miʼ yʌsiyel ili aplicación cheʼ yonlel muʼ bʌ i cʼʌñob? Paul Willies miʼ yʌl: «Maʼañic baʼ ora miʼ jilel jiñi eʼtel. Tiʼ pejtelel ora woli cotsan lojon tsijib eʼtijibʌl tac i woli lon c chaʼlen wersa chaʼan mach wocolic ti cʼʌjñel ili aplicación. Yom mi lon c bej chaʼlen eʼtel chaʼan jiñi aplicación JW Library miʼ mejlel ti cʼʌjñel ti jiñi tsijib tac bʌ teléfono, tableta yicʼot computadora woli bʌ i loqʼuel. I yom mi lon c chaʼlen ti actualizar jiñi programa tac muʼ bʌ i cʼʌjñel ti jiñi aplicación yicʼot miʼ chʌcʌ tojʼesʌntel come woliʼ ñumen loqʼuel grabación tac yicʼot jun tac yaʼ ti JW Library». Ili ora, ti JW Library an cheʼ bʌ 200 mil jun tac yicʼot ñumen ti 600 mil audio yicʼot video ti cabʌl tʼan.

 Chaʼan miʼ mejlel pejtelel iliyi mach jasʌlic jach yom jiñi equipo tac chaʼan computadora. Yom miʼ mʌjñel jaʼel permiso tac chaʼan miʼ cʼʌjñel jiñi programa tac. I an jumpʼejl permiso 1.500 dólares bʌ i tojol ti jujumpʼejl jab. Cheʼ jaʼel, jiñi Departamento de Programación de MEPS miʼ jisan cheʼ bʌ 10 mil dólares ti jujumpʼejl jab chaʼan miʼ mʌn celular, tableta yicʼot computadora ti cabʌl marca chaʼan miʼ qʼuel mi mucʼʌch i chuc ti wen jiñi aplicación JW Library.

 Wocolix i yʌlʌ JW Library, maʼañix miʼ wen jisʌntel taqʼuin chaʼan miʼ chaʼlentel ti imprimir yicʼot miʼ chojquel majlel jiñi jun tac. Jumpʼejl ejemplo, laʼ laj qʼuel chuqui tsaʼ ujti yicʼot jiñi folleto Laʼ lac tsajin jiñi Biblia ti jujumpʼejl qʼuin. Cheʼ bʌ tsaʼ mejli chaʼan jiñi jabil 2013, tsaʼ chaʼlenti ti imprimir 12 millón. Pero cheʼ bʌ tsaʼ mejli chaʼan jiñi jabil 2020, tsaʼ jach chaʼlenti ti imprimir 5 millón anquese añix yambʌ 700 mil publicadorob tiʼ petol pañimil. ¿Chuqui tsaʼ ujti? Jiñi hermanojob miʼ pejcañob jiñi folleto ti jiñi JW Library. a

 Jiñi JW Library cabʌl bajcheʼ miʼ coltañonla. Jumpʼejl ejemplo, Geneviève, chumul bʌ ti Canadá, miʼ ñaʼtan chaʼan ili aplicación tsaʼʌch i wen colta chaʼan ñumen wen miʼ chaʼlen estudio. Miʼ yʌl: «Mach c chaʼleyic estudio ti jujumpʼejl sʌcʼan cheʼ yomic mij cʼʌn cabʌl libro. Pero yicʼot ili aplicación yom jach mic tsʼʌb jiñi c tablet i yaʼʌch mic taj pejtelel chuqui mij cʼʌn. Jiñi estudio ti bele ora an i coltayon chaʼan mic ñumen ñop ti Jehová yicʼot chaʼan ñumen lʌcʼʌl mi cajñel tiʼ tojlel».

 Ili aplicación añʌch i ñumen coltayonla tiʼ yorajlel chaʼan pandemia COVID-19. Jumpʼejl ejemplo, Charlyn, chʼoyol bʌ ti Estados Unidos, miʼ yʌl: «Tiʼ caj jiñi COVID-19 am bʌ ti pañimil, ñumeñix ti jumpʼejl jab maʼañic qʼuelbil c chaʼan jiñi lac publicación tac muʼ bʌ i loqʼuel ti jun. Pero ti JW Library mi lac taj pejtelel jiñi i cʼʌjñibal bʌ lac chaʼan. Mi cʌqʼuen wocolix i yʌlʌ Jehová chaʼan ili utsʼatax bʌ majtañʌl».

 Cabʌlob cheʼ miʼ ñaʼtañob bajcheʼ Faye, chumul bʌ ti Filipinas. Miʼ yʌl: «Wen utsʼatax ili aplicación, luʼ an i chaʼan muʼ bʌ i coltañon chaʼan lʌcʼʌl mi cajñel quicʼot Jehová. Cheʼ ti sʌcʼan mij cʼʌn chaʼan mic pejcan jiñi lac jun tac, chaʼan mic ñʌchʼtan chuqui tac miʼ coltañon cheʼ bʌ woli c mel queʼtel ti cotot, chaʼan mic chajpan c bʌ chaʼan jiñi tempa bʌ yicʼot chaʼan mic chaʼlen ti estudiar jiñi Biblia. Cheʼ bʌ jocholon mij qʼuel video tac. I cheʼ bʌ an baqui woli c mel fila, mij cʼʌn chaʼan mic pejcan jiñi Biblia yicʼot yambʌ lac jun tac. ¡Maʼañic yambʌ aplicación bajcheʼ iliyi!».

 Cheʼ jaʼel, ili aplicación miʼ wen coltañonla ti subtʼan. Jumpʼejl ejemplo, juntiquil hermana ti Camerún tsiʼ wen mulaj jumpʼejl texto tsaʼ bʌ i cʼʌñʌ jiñi i piʼʌl ti subtʼan. Ti wiʼil, tsiʼ mulaj i cʼʌn pero maʼañic cʼajal i chaʼan. Miʼ yʌl: «Weñʌch cheʼ cʼajal c chaʼan jumpʼejl tʼan muʼ bʌ i tilel ti jiñi texto. Jin chaʼan, tsaʼ c jamʌ jiñi aplicación, tsaʼ c sʌcla jiñi Biblia i tsaʼ tsʼijbu jiñi tʼan yaʼ ti alʌ lupa. Wocolix i yʌlʌ ili aplicación, mic taj jiñi texto tac muʼ bʌ i ñajʌyel c chaʼan».

 Tiʼ coltaya jiñi donación tac muʼ bʌ laʼ wʌcʼ yaʼ ti donate.pr418.com, miʼ mejlel lon c mel, lon c tsijibtesan yicʼot lon c weñʼesan jiñi aplicación JW Library. Cheʼ bajcheʼ iliyi miʼ tajob i coltʌntel jiñi hermanojob tiʼ petol pañimil. Wen wocolix laʼ wʌlʌ cheʼ mi laʼ wʌcʼ jiñi laʼ donación tac tiʼ pejtelel laʼ pusicʼal.

1. Octubre, 2013: Tsaʼ pʌsle jiñi aplicación JW Library baqui miʼ tilel jiñi Traducción del Nuevo Mundo ti inglés.

2. Enero, 2015: Tsaʼ ñumen otsʌnti jun tac ti inglés i ti wiʼil ti yan tac bʌ tʼan.

3. Noviembre, 2015: Muqʼuix i mejlel i chaʼlentel ti subrayar jiñi jun tac.

4. Mayo, 2016: Tsaʼ otsʌnti jiñi sección «Tempa bʌ tac».

5. Mayo, 2017: Muqʼuix i mejlel ti tsʼijbuntel nota tac ti JW Library.

6. Diciembre, 2017: Tsaʼ otsʌnti jiñi Biblia de estudio ti inglés.

7. Marzo, 2019: Muqʼuix i mejlel i chaʼlentel ti descargar audio, i qʼuejlel video tac yicʼot jiñi referencia tac chaʼan jiñi Coltʌntel chaʼan estudio.

8. Enero, 2021: Tsaʼ otsʌnti tsijib eʼtijibʌl tac chaʼan miʼ mejlel ti cʼʌjñel yicʼot jiñi libro Ubin a tijicñʌyel.