Cheʼ ti enero, 2021, jiñi Junmojt muʼ bʌ i pʌsob bij tsiʼ yʌlʌ chaʼan mi caj i loqʼuel jumpʼejl tsijib libro chaʼan miʼ tsajintel jiñi Biblia, i cʼabaʼ ili libro jiñʌch Ubin a tijicñʌyel. a ¿Bajcheʼ yubil tsaʼ wubi cheʼ bʌ tsaʼ ajqʼui ili anuncio? Matthew, chʼoyol bʌ ti Canadá, miʼ yʌl: «¡Maʼañic miʼ mejlel c ñop yubil! I tsaʼto c ñumen ubi c tijicñʌyel cheʼ bʌ tsaʼ c ñʌchʼta jiñi discurso tac yicʼot tsaʼ j qʼuele jiñi video tac muʼ bʌ i tsictesan chucoch tsaʼ mejli ili libro yicʼot chaʼan tsaʼ yajcʌntiyob chaʼtiqui uxtiquil hermanojob chaʼan miʼ ñaxan cʼʌñob ili libro. ¡Comix j qʼuel yicʼot c tech j cʼʌn!».

 Qʼuexelix bajcheʼ miʼ yʌjqʼuel estudio yicʼot ili libro, pero mach jin jach qʼuexel bʌ jiñi. Mi añix a chaʼan jumpʼejl impreso bʌ, tajol tsaʼ taja a qʼuel chaʼan an chuqui yambʌ qʼuexel bʌ. ¿A wom ba a ñaʼtan chuquiyes jiñi? Jiñʌch bajcheʼ miʼ mejlel ili libro.

 I pimlel jiñi jun. Chaʼan miʼ mejlel jiñi libro Ubin a tijicñʌyel yom miʼ cʌjñel jumpʼejl jun mero pim bʌ. ¿Chucoch? Ili libro an i chaʼan ñumen ti 600 dibujo o foto tac, ñumen cabʌlto bajcheʼ jiñi am bʌ i chaʼan jiñi libro Miʼ cʌntesañonla. Cheʼ jaʼel, tiʼ tiʼ tac jiñi página ñumen jochol tac. Iliyi miʼ yʌcʼ wocol. Cheʼ bʌ wen jay jiñi jun, tsiquil chuqui an yaʼ ti yambʌ página i tsʼitaʼ tsiquilto jaʼel jiñi dibujo tac. Chaʼan maʼañic miʼ yujtel iliyi, jiñi hermanojob añoʼ bʌ ti Departamento Internacional chaʼan Impresión am bʌ ti Wallkill (Nueva York) tsiʼ ñopoyob chʌnchajp jun muʼ bʌ i cʼʌjñel yaʼ ti imprenta. Jiñi Comité chaʼan redacción chaʼan jiñi Junmojt muʼ bʌ i pʌsob bij tsiʼ qʼueleyob bajcheʼ yilal tsaʼ loqʼui i tsiʼ yajcayob jiñi jun baqui mach wen tsiquilic jiñi dibujo o foto am bʌ tiʼ junwejlel jiñi página. I sujmʌch chaʼan ñumen lets i tojol ili jun. Pero iliyi miʼ coltan jiñi estudiantejob woli bʌ i cʼʌñob jiñi libro Ubin a tijicñʌyel chaʼan maʼañic miʼ taj i qʼuelob chaʼan miʼ cʼaxel jiñi dibujo o foto am bʌ tiʼ junwejlel jiñi página.

 I pʌt jiñi libro. I pʌt jiñi libro Ubin a tijicñʌyel mach lajalic bajcheʼ i chaʼan yambʌ libro tac come yambʌ protección miʼ yʌqʼuentel. Tsʼʌylaw i pat jiñi yambʌ libro tac, pero iliyi mach cheʼiqui chaʼan cheʼ bajcheʼ jiñi jin ñumen tsiquil jiñi i dibujojlel. Cheʼ jaʼel, iliyi miʼ coltan chaʼan jiñi libro maʼañic miʼ wen asiyel tiʼ caj miʼ wen cʼʌjñel. Pero ñumen letsto i tojol iliyi, mach cheʼic bajcheʼ jiñi tsʼʌylaw bʌ. Jin chaʼan, cabʌl sucursal tsiʼ comol chaʼleyob eʼtel chaʼan mach cʌlʌx letsic i tojol miʼ loqʼuel i pat ili libro.

 Yubil cheʼ jiñi, ¿chucoch jin woliʼ cʼʌjñel iliyi miʼ ñumen lets i tojol? Juntiquil hermano muʼ bʌ ti eʼtel yaʼ ti Departamento Internacional chaʼan Impresión miʼ yʌl: «Ili libro mi caj i wen cʼʌjñel, jin chaʼan la com chaʼan miʼ wen jalijel». Eduardo, muʼ bʌ ti eʼtel yaʼ ti Oficina chaʼan Imprenta am bʌ yaʼ ti sucursal ti Brasil, miʼ yʌl: «Wen tijicñayon lon cheʼ jiñi organización woliʼ cʼʌn jiñi jun ñumen wen tac bʌ chaʼan mi lac mulan laj cʼʌn ili utsʼatax bʌ libro yicʼot chaʼan miʼ cuch, i mi laj cʼʌn ti wen jiñi donación tac».

 Cheʼ ti marzo ti 2021, cheʼ bʌ an jiñi pandemia chaʼan COVID-19 tsaʼ caji i chaʼlentel ti imprimir jiñi libro Ubin a tijicñʌyel, jin chaʼan tsaʼ tajle yambʌ wocol tac. Tiʼ caj tsaʼ ñujpʼi Betel, maʼañix tsaʼ mejliyob ti coltaya jiñi voluntario externo yaʼ ti imprenta tac i mi muqʼuicto i mejlelob ti ochel tsijib betelitajob. Jin chaʼan, an i tajol maʼañic tsaʼ jastiyi jiñi xʼeʼtelob, i an imprenta tac tsaʼ bʌ cʌn ñujpʼi come cheʼʌch tsiʼ yʌlʌ jiñi Yumʌl.

 ¿Chuqui tsaʼ mejli? Cheʼ bʌ tsaʼix chaʼ mejli ti cʼʌjñel jiñi imprenta tac, tsaʼ subentiyob jiñi betelitajob añoʼ bʌ ti yan tac bʌ departamento chaʼan miʼ poj chaʼleñob coltaya yaʼ ti imprenta. Joel, muʼ bʌ i chaʼlen eʼtel yaʼ ti Departamento Internacional chaʼan Impresión, miʼ yʌl: «Tsaʼ bʌ i coltayon lojon chaʼan miʼ luʼ loqʼuel jiñi eʼtel jiñʌch cheʼ yomobʌch coltaya yicʼot yomob i cʌn i mel tsijib eʼtel tac».

 Anquese añʌch i wocolel tac, yonlelix libro Ubin a tijicñʌyel tsaʼ chaʼlenti ti imprimir i cabʌl chuqui tsaʼ cʼʌjñi bajcheʼ planchas de impresión, laminado, jun, tinta yicʼot pegamento. Ti jiñi ñaxam bʌ 5 uw tsaʼ mejli jiñi impresión, ñumen ti 2.3 millones de dólares tsaʼ jisʌnti ti jiñi tsaʼ tac bʌ cʼʌjñi. Chaʼan maʼañic miʼ toʼol wen jisʌntel taqʼuin, woli c chaʼlen lojon wersa chaʼan jin jach miʼ chaʼlentel ti imprimir cheʼ bajcheʼ cʼamel i cʼʌjñibal i chaʼan jiñi congregación tac.

 ¿Bajcheʼ yubil miʼ yubiñob jiñi muʼ bʌ i chaʼleñob cʌntesa yicʼot jiñi estudiantejob cheʼ bʌ miʼ cʼʌñob ili tsijib libro? Juntiquil hermano ti Australia i cʼabaʼ Paul miʼ yʌl: «Mic wen mulan cʌcʼ estudio yicʼot ili libro. Wen utsʼatax i miʼ mejlel ti wen tʼan jiñi estudiante, wen tsiquil chuqui miʼ yʌl, miʼ chʼʌm tilel utsʼatax bʌ cʼajtiya, video tac, dibujo, foto, recuadro tac yicʼot chuqui tac miʼ mejlel i mel jiñi estudiante. Jumpʼejlʌch wen utsʼatax bʌ libro, jin chaʼan com sujtel ti ñumen wem bʌ xcʌntesa».

 Juntiquil estudiante ti Estados Unidos miʼ yʌl: «Mic wen mulan jiñi tsijib libro. Jiñi dibujo o foto tac miʼ coltañon c chʼʌmben i sujm jiñi ñumen ñuc tac bʌ i cʼʌjñibal, jiñi video tac miʼ cʼotel tic pusicʼal i miʼ ñijcañon chaʼan mic jacʼ jiñi muʼ bʌ j cʌn». Ili estudiante miʼ yajñel tiʼ pejtelel jiñi tempa bʌ i chaʼyajl miʼ chaʼlen estudio ti jujumpʼejl semana.

 Yomto miʼ chaʼlentel ti imprimir yonlel libro ti cabʌl tʼan. Cheʼ jaʼel, jiñi Junmojt muʼ bʌ i pʌsob bij tsiʼ yʌlʌ chaʼan miʼ locʼsʌntel ti 710 tʼan, 340 i ñumelal bajcheʼ jiñi libro Miʼ cʌntesañonla.

 ¿Baqui miʼ tajtʌl jiñi taqʼuin chaʼan miʼ mejlel pejtelel iliyi? Jiñʌch ti jiñi donación tac muʼ bʌ i yʌjqʼuel chaʼan jiñi eʼtel muʼ bʌ i mejlel tiʼ petol pañimil. Cabʌl donación tac yaʼ miʼ yʌjqʼuel yaʼ ti donate.pr418.com. Mi lon c wen qʼuel ti ñuc cheʼ bʌ mi laʼ tʼox chuqui an laʼ chaʼan. Cheʼ bajcheʼ jiñi, miʼ mejlel ti locʼsʌntel jun tac chaʼan miʼ tsajintel jiñi Biblia chaʼan jiñi lac piʼʌlob miʼ mejlel i cʌñob Jehová i miʼ tajob jiñi i cuxtʌlel mach bʌ añic miʼ jilel (Salmo 22:26).