¡YOM CHɅN YɅXɅL LA CO!

2022: Jumpʼejl jab baqui cʌlʌxix tsaʼ ujti wocol | ¿Chuqui miʼ yʌl jiñi Biblia?

JAMΛ TI

Ti 2022 tsaʼ wen loqʼui noticia tac chaʼan guerra, wocol chaʼan taqʼuin yicʼot yambʌ wocol tac muʼ bʌ i ticʼlan pañimil. Jiñi Biblia miʼ tsictesan chucoch woliʼ yujtel ili wocol tac.

¿Chuqui miʼ pʌs jiñi tsaʼ tac bʌ ujti ti 2022?

Jiñi tsaʼ tac bʌ ujti miʼ pʌs chaʼan chumuloñixla ti «jiñi cojix tac bʌ qʼuin» cheʼ bajcheʼ miʼ yʌl jiñi Biblia (2 Timoteo 3:1). Iliyi tsaʼ tejchi ti 1914. Jiñi woli tac bʌ i yujtel jiñʌch tsaʼ bʌ i taja ti tʼan jiñi Biblia chaʼan miʼ cajel ti ili ora:

«Guerra tac» (Mateo 24:6).

«Ti 2022 tsaʼ chaʼ tejchi guerra yaʼ ti Europa». a

Qʼuele jiñi tema «Rusia miʼ tech guerra ti Ucrania».

«Wiʼñal» (Mateo 24:7).

«Ti 2022 tsaʼ wen ñumi wiʼñal». b

Qʼuele jiñi tema «Tiʼ caj jiñi guerra ti Ucrania woliʼ ñumen pʼojlel wiʼñal ti pañimil».

«Baqui jach bʌ cʼamʌjel» (Lucas 21:11).

«Tsaʼ chaʼ loqʼui cʼamʌjel tac muʼ bʌ i mejlel lac toyben lac bʌ, bajcheʼ jiñi viruela del mono yicʼot jiñi COVID-19. Ili cʼamʌjel tac an i pʌsʌ chaʼan wen pʼʌtʌlʌch yicʼot chaʼan majqui jach miʼ mejlel i taj. c

Qʼuele jiñi tema «Seis millón chʌmeñoʼ bʌ tiʼ caj COVID».

«Chuqui tac bʌbʌqʼuen bʌ» (Lucas 21:11).

«Maʼañic mi caj i ñajʌyel bajcheʼ yilal tsaʼ ñumi jiñi jajmeñal ti 2022 come ñumeñix ti pʼis tsaʼ ñumi ticwal, tsaʼ tiqui tac jaʼ, tsaʼ wen puli mateʼel yicʼot tsaʼ ñumi butʼjaʼlel. Tiʼ caj tac iliyi, cabʌl chuqui tsaʼ jili, tsaʼ chʌmi yonlel lac piʼʌlob i cabʌlob tsaʼ bʌ loqʼuiyob tiʼ lumal». d

Qʼuele jiñi tema «Woliʼ wen pʼojlel ticwal tiʼ petol pañimil».

«Wocol tac» (Lucas 21:9).

«Cheʼ ti 2022 tsaʼ wen ujti marcha tac tiʼ contra jiñi yumʌlob come jiñi lac piʼʌlob mach tijicñayobic tiʼ caj jiñi wocol tac chaʼan bʌ taqʼuin, ñumento cheʼ tsaʼ luʼ letsi i tojol chuqui tac an». e

Qʼuele jiñi tema «Tiʼ petol pañimil woliʼ letsel i tojol chuqui tac an».

¿Chuqui tac mi caj i yujtel ti ili yambʌ jabil?

Maʼañic majqui ñoj yujil chuqui mi caj i yujtel ti 2023. La cujilʌch bʌ jin chaʼan tsʼitaʼ jax yom chaʼan jiñi i Yumʌntel Dios miʼ tojʼesan jiñi wocol tac ila ti Pañimil (Daniel 2:44). Ili Yumʌntel mi caj i jisan pejtelel muʼ bʌ i yʌcʼonla ti wocol i mi caj i yʌcʼ ti mejlel chuqui yom bʌ Dios ila ti Lum (Mateo 6:9, 10).

Mic subeñet lojon chaʼan mi laʼ jacʼ jiñi ticʼojel tsaʼ bʌ i yʌcʼʌ Jesús chaʼan «yom chʌn yʌxʌl laʼ wo» i mi laʼ qʼuel bajcheʼ jiñi woli tac bʌ i yujtel woliʼ tsʼʌctesan jiñi profecía tac (Marcos 13:37). Mi a wom a ñumen cʌn bajcheʼ jiñi Biblia miʼ mejlel i coltañet ili ora yicʼot chuqui ti pijtaya miʼ mejlel i yʌqʼuen a familia chaʼan jiñi talto bʌ qʼuin, pejcan juntiquil i testigo Jehová.

a AP News, “2022 Was Year the Horror of War Returned to Europe,” (Jill Lawless, 8 chaʼan diciembre 2022).

b World Food Programme: “A Global Food Crises.”

c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” (Lawrence O. Gostin, JD, 22 chaʼan septiembre 2022).

d Earth.Org, “What’s Behind the Record-Breaking Extreme Weather Events of Summer 2022?” (Martina Igini, 24 chaʼan octubre, 2022).

e Carnegie Endowment for International Peace, “Economic Anger Dominated Global Protests in 2022,” (Thomas Carothers yicʼot Benjamin Feldman, 8 chaʼan diciembre 2022).