Woliʼ tejchel jiñi 2023, i luʼ la com chaʼan wen mi la cajñel yicʼot wen miʼ yajñel lac familia. ¿Chucoch yom tijicñayonla?

 Jiñi Biblia miʼ chʼʌm tilel wen tac bʌ tʼan. Miʼ yʌl chaʼan tsʼitaʼ jax yom chaʼan miʼ jilel lac wocol tac. Miʼ yʌl chaʼan jiñi tsaʼ bʌ tsʼijbunti ti Biblia «tsaʼ tsʼijbunti chaʼan laj cʌntesʌntel, chaʼan mi lac taj lac pijtaya [...] yicʼot [...] miʼ ñuqʼuesʌntel lac pusicʼal ti jiñi Tsʼijbujel» (Romanos 15:4).

•   Mi a wom a ñumen cʌn muʼ bʌ i yʌl jiñi Biblia, pejcan jiñi tema «Jumpʼejl i sujm bʌ pijtaya chaʼan miʼ tojʼan ili pañimil».

 Jiñi pijtaya muʼ bʌ i yʌqʼueñonla jiñi Biblia «lajal bajcheʼ jumpʼejl ancla chaʼan laj cuxtʌlel» (Hebreos 6:19). Jiñi lac pijtaya miʼ coltañonla chaʼan mi laj cuch jiñi wocol tac, chaʼan mi lac ñaʼtan chuqui wen yicʼot chaʼan tijicñayonla tiʼ sujm. Qʼuele ili ejemplo tac:

•   Qʼuele bajcheʼ jiñi pijtaya am bʌ ti Biblia tsiʼ colta juntiquil wiñic woli bʌ i chaʼlen wersa i cʌy jumpʼejl vicio. Qʼuele jiñi video «Tsaʼ cʼoti c tsʼaʼlen jiñi c melbal».

•   Qʼuele bajcheʼ jiñi pijtaya am bʌ ti Biblia miʼ coltañonla cheʼ bʌ miʼ chʌmel juntiquil muʼ bʌ lac wen cʼuxbin. Qʼuele jiñi video I ñuqʼuesʌntel i pusicʼal jiñi am bʌ majqui chʌmen i chaʼan.

 Cabʌl lac piʼʌlob miʼ pijtañob chaʼan miʼ tojʼan bajcheʼ añonla, pero maʼan chuqui miʼ pʌs chaʼan cheʼʌch miʼ cajel. Mach cheʼic miʼ yujtel yicʼot muʼ bʌ i yʌl jiñi Biblia. ¿Chucoch? Come jiñi muʼ bʌ i tilel ti Biblia i tʼañʌch Jehová, a jiñi Dios «mach bʌ añic miʼ mejlel ti lot» (Tito 1:2). Jin jach an i pʼʌtʌlel chaʼan miʼ tsʼʌctesan muʼ bʌ i yʌl come «miʼ mel pejtel chuqui yom» (Salmo 135:5, 6).

 Miʼ mejlel a ñop jiñi pijtaya muʼ bʌ i yʌcʼ jiñi Biblia. Mic poj subeñet lojon chaʼan maʼ tsajin jiñi Tsʼijbujel chaʼan maʼ pʼʌtʼesan jiñi a pijtaya (Hechos 17:11). ¿A wom ba a chʼʌm jumpʼejl estudio mach bʌ tojbilic? ¡Teche jiñi 2023 yicʼot a tijicñʌyel!