¡YOM CHɅN YɅXɅL LA CO!
2023: Tsaʼ wen ujti wocol ti ili jabil | ¿Chuqui miʼ yʌl jiñi Biblia?
Jiñi tsaʼ bʌ ujti tiʼ petol pañimil ti 2023 miʼ pʌs chaʼan chumuloñixla ti jiñi «cojix tac bʌ qʼuin» (2 Timoteo 3:1). Jiñi woli tac bʌ i yujtel ili ora woliʼ tsʼʌctesan tsaʼ bʌ i wʌn alʌ jiñi Biblia. Qʼuele ili ejemplo tac.
Jiñi Biblia yicʼot woli bʌ i yujtel tiʼ petol pañimil
«Mi caj laʼ wubin ti alol guerra tac» (Mateo 24:6).
«Woliʼ pʼojlel leto ti cabʌl parte». a
Qʼuele jiñi tema «¿Majqui mi caj i cʌntan lac piʼʌlob?» yicʼot «Jiñi yumʌlob tiʼ petol pañimil miʼ jisañob 2 billones de dólares chaʼan i tojol i soldadojob».
«Miʼ cajel yujquel lum ti cabʌl tejclum» (Marcos 13:8).
«Cʼʌlʌl tsaʼ tejchi 2023 tiʼ petol pañimil an ujtem 13 yujquel lum 7 bʌ i magnitud o ñumen tsʌtsto bʌ. Maʼañic baʼ wen ujtem tsʌts bʌ yujquel bajcheʼ iliyi». b
Qʼuele jiñi tema «Tsaʼ ñumi tsʌts bʌ yujquel ti Turquía yicʼot ti Siria».
«Chuqui tac bʌbʌqʼuen bʌ» (Lucas 21:11).
«Tsaʼix ñumi i yorajlel jiñi calentamiento global. Ili ora jiñi ticwal ñumeñix ti pʼis i woliʼ jisan chuqui tac an» (António Guterres, secretario general chaʼan jiñi Naciones Unidas). c
Qʼuele jiñi tema «Cʌlʌxix ticwal tsaʼ ñumi ti 2023».
«Wiʼñal» (Mateo 24:7).
«2023: Yambʌ jabil baqui jiñi lac piʼʌlob tsiʼ cʼojoʼtayob bajcheʼ miʼ weʼsañob i familia». d
Qʼuele jiñi tema «Woli i jilel bʌlñʌcʼʌl tiʼ petol pañimil tiʼ caj jiñi guerra yicʼot jiñi cambio climático».
«Wen wocol miʼ cajel yicʼot bʌbʌqʼuen» (2 Timoteo 3:1).
«Ti 8 lac piʼʌlob juntiquil an i chaʼan ansiedad, depresión o yan tac bʌ». e
Qʼuele jiñi tema «Jiñi xcolelob ñumen maʼañobix i ñʌchʼtʌlel tiʼ jol».
¿Chuqui mi caj i yujtel ti 2024?
Maʼañic majqui yujil chuqui mi caj i yujtel ti yambʌ jabil. Pero jiñi woli bʌ i yujtel tiʼ petol pañimil miʼ pʌs chaʼan jiñi i Yumʌntel Dios, ili jiñʌch, i Yumʌntel Dios am bʌ ti panchan, mi caj i yochel tiʼ wenta jiñi yumʌlob añoʼ bʌ ili ora i mi caj i jisan pejtelel muʼ bʌ i yʌqʼueñonla wocol yicʼot cʌlʌx pensar (Daniel 2:44; Apocalipsis 21:4).
Mi woliyonla ti cʌlʌx pensar, miʼ mejlel laj cʼajtiben i coltaya Dios. Jiñi Biblia miʼ yʌl:
«Baʼ ora mij cajel ti bʌqʼuen, mux c xucʼchocon c pusicʼal quicʼotet» (Salmo 56:3).
¿Bajcheʼ miʼ mejlel lac pʌs chaʼan mucʼʌch lac ñop tiʼ tojlel Dios? Mic subeñet lojon chaʼan maʼ cʌn muʼ bʌ i yʌl jiñi Biblia chaʼan bajcheʼ mi caj i jisʌntel jiñi wocol. Chʼʌmʌ jiñi estudio loqʼuem bʌ ti Biblia chaʼan maʼ cʌn bajcheʼ miʼ mejlel i coltañet yicʼot i coltan a familia jiñi albil bʌ i chaʼan Dios ti Biblia.
a Foreign Affairs, «A World at War: What Is Behind the Global Explosion of Violent Conflict?» (Jumpʼejl pañimil butʼul bʌ ti guerra: ¿Chucoch tsaʼ cʌlʌx pʼojli wocol tiʼ caj jontolil?), Emma Beals yicʼot Peter Salisbury, 30 de octubre, 2023.
b Noticia tac chaʼan yujquel lum, «2023: Mi caj i ñumen tsʌtsʼan jiñi yujquel lum», mayo de 2023.
c Naciones Unidas, «Secretary-General’s Opening Remarks at Press Conference on Climate» (tsaʼ bʌ i yʌlʌ jiñi secretario general ti jumpʼejl entrevista chaʼan jiñi clima), 27 de julio, 2023.
d Programa Mundial de Alimentos, «Woliʼ pʼojlel wiʼñal tiʼ petol pañimil».
e Organización Mundial de la Salud, «Día Mundial de la Salud Mental», 10 de octubre, 2023.