«Tiʼ caj jiñi cambio climático wocolix chaʼan mi lac chumtan ili Pañimil» (The Guardian).

 Jiñi Pañimil woliʼ taj wocol tiʼ caj jiñi lac piʼʌlob. Jiñi científicojob miʼ yʌlob chaʼan i mulʌch jiñi lac piʼʌlob cheʼ an jiñi calentamiento global. Tiʼ caj iliyi woliʼ bej asiyel jiñi pañimil yicʼot woliʼ yʌcʼ cabʌl wocol. Laʼ laj qʼuel chaʼpʼej uxpʼejl:

•   Ili ora cʌlʌxix ticwal, jajmeñal, tsʌts tac bʌ jaʼal, butʼjaʼlel yicʼot woliʼ ñumen pulel mateʼel tac.

•   Jiñi hielo am bʌ ti Ártico woliʼ yulmʌn.

•   Jiñi mar woliʼ ñumen bujtʼel.

 Jiñi cambio climático cʼotemix tiʼ petol pañimil. Jiñi periódico The New York Times tiʼ tsictesa chuqui woliʼ yujtel ti 193 país i tsiʼ yʌlʌ: «Jiñi Pañimil lajal bajcheʼ woli ti oñel chaʼan miʼ cʼajtin i coltʌntel». Jiñi cambio climático an i tsʌnsa yicʼot an i yʌqʼue wocol lac piʼʌlob, jin chaʼan jiñi Organización Mundial de la Salud miʼ yʌl chaʼan jiñʌch «jiñi ñumen tsʌts bʌ wocol muʼ bʌ i ticʼlan lac piʼʌlob».

 Anquese cheʼ bajcheʼ jiñi, maʼañic chucoch yom mi lac bʌcʼñan come añʌch lac pijt chaʼan jiñi talto bʌ qʼuin. Jiñi Biblia tsaʼʌch i wʌn alʌ chuqui woli tac bʌ i yujtel ili ora. Cheʼ jaʼel, miʼ subeñonla chaʼan Dios mach cheʼ jach meqʼuel i cʼʌb mi caj i yajñel i añʌch chuqui mi caj i mel chaʼan miʼ coltañonla ti talto bʌ qʼuin.

 Wolʌch. Come cʌlʌx ticʌwix ili pañimil, ñoj qʼuextʌyemix bajcheʼ yilal i jiñʌch tsaʼ bʌ i wʌn alʌ jiñi Biblia chaʼan mi caj i yujtel.

 Profecía: «Ti jiñi cojix tac bʌ qʼuin wen wocol miʼ cajel yicʼot bʌbʌqʼuen. Come jiñi lac piʼʌlob mi caj i bajñel cʼuxbiñob i bʌ, mi caj i cʼuxbiñob taqʼuin, [...] maʼañic mi caj i pʌsob i xucʼtʌlel, [...] maʼañic mi caj i mulañob i sʌclan ñʌchʼtʌlel, [...] mi caj i melob mach bʌ weñic tiʼ tojlel i yamigojob, miʼ waʼ melob chuqui yomob» (2 Timoteo 3:1-4).

 Jiñi Biblia tsiʼ wʌn alʌ bajcheʼ yilal miʼ cajel i melbal jiñi lac piʼʌlob, i tiʼ caj jiñi jiñʌch am bʌ i yʌcʼʌ wocol chaʼan jiñi cambio climático. An yumʌlob yicʼot empresa tac muʼ bʌ i ñumen qʼuelob ti ñuc jiñi taqʼuin i mach jiñic jiñi lac piʼʌlob, mach i wentajobic bajcheʼ yilal mi caj i chumtʌlob jiñi muʼto bʌ caj i yilañob pañimil. An i lon ñopoyob i comol chaʼleñob eʼtel chaʼan miʼ tojʼesañob bajcheʼ yilal jiñi pañimil, pero mach junlajalic chuqui miʼ ñaʼtañob.

 Ili profecía miʼ pʌsbeñonla chaʼan maʼañic mi lac pijtan chaʼan jiñi lac piʼʌlob miʼ qʼuextañob i melbal i miʼ tech i cʌntañob jiñi Pañimil. Jiñi Biblia miʼ wʌn al chaʼan «mi caj i ñumen asiyelob majlel» i melbal jiñi lac piʼʌlob (2 Timoteo 3:13).

 Jiñi Biblia miʼ yʌl chaʼan Jehová a, jiñi tsaʼ bʌ i meleyonla, añʌch chuqui albil i chaʼan chaʼan ili Pañimil yicʼot chaʼan mucʼʌch i ñaʼtan jiñi chumulonbʌla ilayi. Laʼ laj qʼuel uxpʼejl versículo muʼ bʌ i pʌs chaʼan Dios añʌch chuqui mi caj i mel.

1.  1. Dios «mach lolomic tsiʼ mele pañimil. Tsiʼ mele chaʼan i chumlib winicob» (Isaías 45:18).

    Dios mi caj i tsʼʌctesan ñaʼtʌbil bʌ i chaʼan chaʼan ili Pañimil (Isaías 55:11). Maʼañic mi caj i yʌcʼ chaʼan an majqui miʼ jisan yicʼot chaʼan maʼañic majqui miʼ mejlel i chumtan.

2.  2. «Jini utsoʼ bʌ i pusicʼal mi caj i yʌqʼuentelob i wenlel. Tijicña mi caj i yubiñob cheʼ ñʌchʼʌlob i pusicʼal. Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:11, 29).

    Dios miʼ yʌqʼueñonla i tʼan chaʼan mi caj lac chumtʌl tiʼ pejtelel ora yicʼot lac ñʌchʼtʌlel.

3.  3. «Jini xmulilob. Mi caj i chojquelob loqʼuel tiʼ lumal» (Proverbios 2:22).

    Dios miʼ yʌl chaʼan mi caj i jisañob jiñi mach bʌ yomobic i cʌy i mel mach bʌ weñic, i yaʼ ochem jiñi woli bʌ i yʌsiñob ili Pañimil.

 ¿Bajcheʼ mi caj i tsʼʌctesan jiñi ñaʼtʌbil bʌ i chaʼan Dios chaʼan ili Pañimil? Mi caj i cʼʌn jiñi i Yumʌntel (Mateo 6:10). Ili Yumʌntel an ti panchan. Maʼañic mi caj i tem i tʼan yicʼot jiñi yumʌlob chaʼan miʼ tojʼesañob ili Pañimil. Jiñi i Yumʌntel Dios mi caj i jisan jiñi yumʌlob ila ti pañimil (Daniel 2:44).

 Wen utsʼatax bajcheʼ mi caj i yajñel jiñi quixtañujob yicʼot ili Pañimil (Salmo 96:10-13). Qʼuele chuqui mi caj i mel Jehová cheʼ bʌ miʼ cʼʌn jiñi i Yumʌntel:

•   Mi caj i tojʼan bajcheʼ yilal jiñi Pañimil

   Muʼ bʌ i yʌl jiñi Biblia: «Jini tiquin bʌ lum mi caj i yubin i tijicñʌyel. Miʼ caj ti nich yaʼ baʼ jochol jini lum» (Isaías 35:1).

   ¿Chuqui yom i yʌl iliyi chaʼan jiñi talto bʌ qʼuin? Jehová mi caj i tojʼesan ili Pañimil, ñumento baqui an i yʌsi jiñi quixtañujob.

•   Mi caj i tojʼan jiñi clima

   Muʼ bʌ i yʌl jiñi Biblia: Jehová «tsiʼ ñʌchʼtesa jini pʼʌtʌl bʌ icʼ, tsaʼ lajmi. Tsiʼ tiqʼui jini wʌlwʌlña bʌ jaʼ, tsaʼ ñʌjchʼi» (Salmo 107:29).

   ¿Chuqui yom i yʌl iliyi chaʼan jiñi talto bʌ qʼuin? Jehová an i pʼʌtʌlel chaʼan miʼ ticʼ chuqui tac an ila ti Pañimil. Jiñi quixtañujob maʼañix mi caj i yilañob wocol tiʼ caj jiñi clima.

•   Mi caj i cʌntesañonla laj cʌntan ili Pañimil

   Muʼ bʌ i yʌl jiñi Biblia: «Mi caj j cʌntesañet. Mi caj c pʌsbeñet jini bij baqui yom maʼ majlel» (Salmo 32:8).

   ¿Chuqui yom i yʌl iliyi chaʼan jiñi talto bʌ qʼuin? Jehová tsiʼ yʌqʼue tiʼ wenta jiñi quixtañujob chaʼan miʼ cʌntañob ili Pañimil (Génesis 1:28; 2:15). Jin mi caj i cʌntesañonla chaʼan bajcheʼ mic tsʼʌctesanla ti wen jiñi la queʼtel. Mi caj laj cʌn bajcheʼ yom mi laj cʌntan jiñi melbil tac bʌ i chaʼan yicʼot chaʼan bajcheʼ yom mi lac chumtʌl yicʼot jiñi melbil tac bʌ.