Tiʼ petol pañimil, jiñi país tac wen tʼoxolob ti política. Ti jumpʼejl encuesta tsaʼ bʌ i mele jiñi centro de investigación Pew Research Center tsiʼ yʌlʌ chaʼan «jiñi 65% tsaʼ bʌ melbentiyob jiñi encuesta ti 19 país tsiʼ yʌlʌyob chaʼan mach tijicñayobic o miʼ tsʼaʼleñob i bʌ tiʼ caj mach junlajalic jiñi partido tac muʼ bʌ i coltañob».

 ¿Cheʼ ba woli i yujtel jaʼel yaʼ baqui chumulet? ¿Chucoch cheʼ woliʼ yujtel bajcheʼ jiñi? ¿Muʼ ba caj i tojʼan? Qʼuele chuqui miʼ yʌl jiñi Biblia.

 Jiñi Biblia tsiʼ wʌn alʌ chaʼan ti ili qʼuin, cʌmbil bʌ bajcheʼ «jiñi cojix tac bʌ qʼuin», cabʌl lac piʼʌlob mi caj i pʌsob i melbal tac muʼ bʌ i yʌcʼ tʼox bʌ.

•   «Ti jiñi cojix tac bʌ qʼuin wen wocol miʼ cajel yicʼot bʌbʌqʼuen. Come jiñi lac piʼʌlob mi caj i bajñel cʼuxbiñob i bʌ, […] maʼañic mi caj i mulañob i sʌclan ñʌchʼtʌlel» (2 Timoteo 3:1-3).

 Wocol woliʼ yubin jiñi yumʌlob chaʼan wen miʼ melob i yeʼtel anquese cabʌl lac piʼʌlob woliʼ chaʼleñob wersa. An ñoj qʼuexeloʼ bʌ i ñaʼtʌbal i wocol miʼ yubiñob chaʼan miʼ tem tojʼesañob jiñi wocol o miʼ ñaʼtañob chaʼan mach mejlic ti ujtel jiñi. Pejtelel iliyi miʼ pʌs chaʼan i sujmʌch muʼ bʌ i yʌl jiñi Biblia cʼʌlʌl ti wajali.

•   «Winicob [...] muʼ bʌ i cʼʌñob i pʼʌtʌlel chaʼan miʼ jisañob i piʼʌlob» (Eclesiastés 8:9).

 Pero jiñi Biblia miʼ yʌl chaʼan an jumpʼejl yumʌl muʼ bʌ i mejlel i jisan pejtelel jiñi lac wocol.

 Jiñi Biblia miʼ taj ti tʼan juntiquil wem bʌ yumʌl muʼ bʌ i mejlel i tojʼesan pejtelel jiñi wocol. Jiñʌch Jesucristo. An i pʼʌtʌlel, i yeʼtel yicʼot yom i chʼʌm tilel ñʌchʼtʌlel yicʼot chaʼan maʼañic tʼox bʌ.

•   «Mux i tajob i wenlel jini tojoʼ bʌ cheʼ woli ti yumʌl. Mux i tajob cabʌl i ñʌchʼtʌlel i pusicʼal winicob» (Salmo 72:7).

•   «Winicob xʼixicob tiʼ pejtelel pañimil mi caj i melbeñob i yeʼtel» (Salmo 72:11).

 Maʼañic yambʌ yumʌl ñumen wem bʌ bajcheʼ Jesús, come tiʼ sujmʌch miʼ ñaʼtan lac piʼʌlob yicʼot yom i coltañob, ñumento jiñi am bʌ ticʼlʌntiyob.

•   «Miʼ locʼsan ti wocol jini pʼumpʼun bʌ cheʼ miʼ cʼajtiben. Yicʼot jini ticʼlʌbil bʌ mach bʌ anic majqui miʼ coltan. Miʼ pʼuntan jini cʼun bʌ yicʼot jini pʼumpʼun bʌ. Miʼ coltan jini pʼumpʼuñoʼ bʌ. Mi caj i mʌn jini ticʼlʌbiloʼ bʌ yicʼot jini chuculoʼ bʌ ti jontolil chaʼan miʼ yʌcʼob ti colel» (Salmo 72:12-14).

 Ñumen cʌñʌ jiñi i Yumʌntel Dios, jumpʼejl yumʌntel am bʌ tiʼ wenta Jesús. I qʼuele bajcheʼ jiñi yumʌntel miʼ mejlel i coltañet yicʼot bajcheʼ miʼ mejlel a coltan.

•   Qʼuele jiñi video ¿Chuqui jiñi i Yumʌntel Dios?

•   Pejcan jiñi tema «El Reino de Dios: un gobierno sin corrupción».