¿Am ba waʼ cʼamʼayet? Mi añʌch, a wujil chaʼan cheʼ bʌ mi laj cʼamʼan miʼ yʌcʼonla ti pensar, miʼ yʌqʼueñonla chʼijyemlel i mi lac jisan cabʌl taqʼuin. ¿Chuqui mi caj i coltañet a lʌtʼ? ¿Bajcheʼ miʼ mejlel a coltan juntiquil ti a familia o a wamigo mi an jumpʼejl i cʼamʌjel? Anquese jiñi Biblia mach jumpʼejlic libro chaʼan tsʼac, mucʼʌch i mejlel i yʌqʼueñet ticʼojel tac chaʼan maʼ lʌtʼ baqui jach bʌ wocol.

•   Cucu ti doctor.

   Muʼ bʌ i yʌl jiñi Biblia: «Jiñi cʼocʼoʼ bʌ mach i cʼʌjñibalic i chaʼ añob doctor, pero jiñi cʼamoʼ bʌ i cʼʌjñibalʌch i chaʼañob» (Mateo 9:12).

   ¿Chuqui yom i yʌl? Cucu ti doctor cheʼ i cʼʌjñibalʌch a chaʼan.

   Ñopo a mel iliyi: Sʌclan wem bʌ a tsʼʌcʌntel mucʼʌch bʌ i mejlel a taj. An i tajol yomʌch maʼ majlel ti yambʌ doctor mi tsajñetix ti yambʌ (Proverbios 14:15). Chaʼlen wersa chaʼan wen jach maʼ chaʼlen tʼan a wicʼot jiñi doctorob yicʼot enfermerojob. Wen qʼuele mi wolʌch a chʼʌmben i sujm chuqui woli bʌ i subeñetob yicʼot mi wolʌch i ñaʼtañob bajcheʼ yubil maʼ wubin a bʌ (Proverbios 15:22). Cʌñʌ chuqui ti cʼamʌjel an a wicʼot i chuqui tac ti tsʼac miʼ mejlel a chʼʌm. Mi a wujilix chuqui an a chaʼan, chajpʌbiletix mi caj a wajñel chaʼan maʼ lʌtʼ jiñi wocol yicʼot chuqui mi caj a mel.

•   Cʌntan a bʌ.

   Muʼ bʌ i yʌl jiñi Biblia: «Jiñi ejercicio mucʼʌch i tsʼitaʼ aqʼueñonla lac wenlel» (1 Timoteo 4:8).

   ¿Chuqui yom i yʌl? Chaʼlen wersa a cʌntan a bʌ, jumpʼejl ejemplo mele ejercicio.

   Ñopo a mel iliyi: Bixel mele ejercicio, cʌntan chuqui maʼ cʼux yicʼot wʌyen ti wen. Jiñi expertojob miʼ yʌlob chaʼan cheʼ mucʼʌch a chaʼlen wersa a cʌntan a bʌ chaʼañʌch a wenlel, anquese wolito a ñʌmʼan tiʼ caj bajcheʼ añet. Pero wen qʼuele chaʼan pejtelel chuqui mi caj a mel miʼ coltañet yicʼot chaʼan maʼañic miʼ ticʼlan jiñi tratamiento woli bʌ a chʼʌm.

•   Cʼajtiben i coltaya jiñi a wamigojob.

   Muʼ bʌ i yʌl jiñi Biblia: «Jiñi i sujm bʌ amigo miʼ cʼuxbiñonla tiʼ pejtelel ora i juntiquilʌch la quermañu cheʼ tiʼ yorajlel wocol» (Proverbios 17:17, Traducción del Nuevo Mundo, TNM).

   ¿Chuqui yom i yʌl? Jiñi a wamigojob miʼ mejlel i coltañetob cheʼ tiʼ yorajlel wocol.

   Ñopo a mel iliyi: Suben juntiquil wem bʌ a wamigo bajcheʼ yubil maʼ wubin a bʌ. Ili mi caj i coltañet chaʼan maʼañic maʼ cʌlʌx chaʼlen pensar yicʼot chaʼan wen maʼ wubin a bʌ. Jiñi a familia yicʼot a wamigojob yom i coltañetob jaʼel, pero tajol mach yujilobic bajcheʼ miʼ mejlel i melob. Jin chaʼan, jamʌ subeñob chuqui miʼ mejlel i melob. Ñaʼtan chaʼan pʼisbil jach bajcheʼ mi caj i mejlel i coltañetob i aqʼueñob wocolix i yʌlʌ. Anquese jiñi a wamigojob yomʌch i coltañetob, tajol lujbet. Jin chaʼan, cʼajtesan bajcheʼ jalel mi caj i yajñel a wicʼotob i jaysujtel mi caj i julaʼtañetob.

•   Ñaʼtan chuqui wen.

   Muʼ bʌ i yʌl jiñi Biblia: «I tijicñʌyel lac pusicʼal i wentajʌch wen bʌ tsʼac. I chʼijiyemlel lac pusicʼal miʼ tiquesan lac bʌcʼtal» (Proverbios 17:22).

   ¿Chuqui yom i yʌl? Cheʼ wen jach chuqui maʼ ñaʼtan mi caj i coltañet chaʼan wen jach maʼ wubin a bʌ yicʼot chaʼan maʼ lʌtʼ a cʼamʌjel.

   Ñopo a mel iliyi: Cheʼ bʌ wolito a ñʌmʼan tiʼ caj bajcheʼ añet, ñaʼtan muʼ bʌ i mejlel a mel i mach jiñic maʼañic bʌ miʼ mejlel a mel. Mach a laj a bʌ a wicʼot yambʌlob, mach a laj bajcheʼ añet ili ora yicʼot bajcheʼ añet ti ñaxan (Gálatas 6:4). Aqʼuen a bʌ meta tac muʼ bʌ i mejlel a taj, jiñi mi caj i coltañet chaʼan wen jach chuqui maʼ ñaʼtan (Proverbios 24:10). Cheʼ bʌ mucʼʌch a mejlel, coltan yambʌlob. Cʼajtesan chaʼan mi mucʼʌch a mel, tijicña mi caj a wubin i maʼañic mi caj a cʌlʌx ñaʼtan jiñi a wocol (Hechos 20:35).

 Dios maʼañic mi caj i mel jumpʼejl milagro chaʼan miʼ tsʼʌcañonla, pero jiñi Biblia miʼ pʌs chaʼan Jehová a mucʼʌch i mejlel i coltañonla lac lʌtʼ jiñi laj cʼamʌjel. ¿Bajcheʼ miʼ coltan Dios jiñi muʼ bʌ i chʼujutesañob?

 Miʼ yʌqʼueñob ñʌchʼtʌlel. Jiñi Biblia miʼ yʌl chaʼan miʼ yʌqʼueñonla «jiñi i ñʌchʼtʌlel Dios, maʼañic bʌ miʼ mejlel i chʼʌmben i sujm mi juntiquilic lac piʼʌl» (Filipenses 4:6, 7). Ili ñʌchʼtʌlel miʼ coltañonla chaʼan maʼañic mi laj cʌlʌx pensarin lac bʌ. Dios miʼ yʌqʼuen jiñi ñʌchʼtʌlel muʼ bʌ i melbeñob oración yicʼot muʼ bʌ i subeñob chuqui miʼ pensariñob (1 Pedro 5:7).

 Miʼ yʌqʼueñob i ñaʼtʌbal. Jehová miʼ mejlel i coltañonla chaʼan mi lac ñaʼtan chuqui wem bʌ miʼ mejlel lac mel (Santiago 1:5). Cheʼ mucʼʌch laj cʌn muʼ bʌ i yʌl jiñi Biblia i mi lac jacʼ jiñi i ticʼojel tac, mi lac taj lac ñaʼtʌbal.

 Miʼ yʌqʼueñob i pijtaya. Jehová miʼ yʌl chaʼan ti jumpʼejl bʌ qʼuin maʼañix majqui mi caj i yʌl: «Cʼamon» (Isaías 33:24). Ili pijtaya miʼ coltan cabʌl lac piʼʌlob chaʼan miʼ bej ñaʼtañob chuqui wen, i jinto jaʼel cheʼ bʌ añob tsʌts bʌ i cʼamʌjel (Jeremías 29:11, 12).