Qʼuele chuqui tac an i yʌlʌyob jiñi ñucoʼ bʌ i yeʼtel ti ñopbalʌl chaʼan jiñi guerra ti Ucrania.

•   «Jiñi patriarca Kirill, ñuc bʌ i yeʼtel yaʼ ti Iglesia ortodoxa ti Rusia, maʼañic tiʼ contra jiñi guerra woli bʌ i mel Rusia […]. Jiñi Iglesia an i yʌlʌ chuqui mach bʌ weñic tiʼ contra Ucrania, i Putin an i cʼʌñʌ iliyi chaʼan miʼ yʌl chaʼan weñʌch jiñi guerra» (EUobserver, 7 chaʼan marzo, 2022).

•   «Jiñi patriarca Kirill […] an i yʌlʌ chaʼan jiñi guerra tiʼ contra Ucrania woliʼ mejlel chaʼan miʼ jisʌntel jiñi mulil. Tsiʼ yʌlʌ iliyi chaʼan miʼ pʌs chaʼan weñʌch jiñi woli bʌ i mel i país tiʼ contra Ucrania» (AP News, 8 chaʼan marzo, 2022).

•   «Jiñi ñumen ñuc bʌ i yeʼtel ti jiñi Iglesia ortodoxa ti Kiev, Ucrania, Epifanio I, tsiʼ yʌqʼue i bendición lac piʼʌlob ti ili lunes i tiʼ subeyob chaʼan miʼ chaʼleñob guerra tiʼ contra Rusia. Tsiʼ yʌlʌ jaʼel chaʼan mach mulilic cheʼ miʼ tsʌnsañob jiñi soldadojob chaʼan Rusia» (The Jerusalem Post, 16 chaʼan marzo, 2022).

•   «Mij coltan lojon jiñi soldadojob chaʼan Ucrania yicʼot pejtelel muʼ bʌ i coltañon lon ti guerra. Mi cʌcʼ lon bendición tiʼ tojlelob yicʼot mi lon c tajob ti oración» (Declaración del Consejo de Iglesias y Organizaciones Religiosas de Ucrania, a 24 chaʼan febrero, 2022).

 Ixcu jatet, ¿chuqui maʼ wʌl? ¿Weñʌch ba cheʼ jiñi Iglesia tac miʼ subeñob i wiñicob chaʼan yom miʼ majlelob ti guerra? ¿Chuqui miʼ yʌl jiñi Biblia chaʼan jiñi?

¿Am ba i yotsayob i bʌ ti guerra jiñi ñopbalʌl tac?

 Jiñi historia an i pʌsʌ chaʼan cabʌl Iglesia muʼ bʌ i poj sʌclañob ñʌchʼtʌlel an i coltayob jiñi guerra yicʼot an i yʌlʌyob chaʼan weñʌch. Cʼʌlʌl ti wajali jiñi i testigojob Jehová an i yʌlʌyob chaʼan mach weñic woli bʌ i melob jiñi ñopbalʌl tac. Qʼuele chuqui an i yʌlʌ jiñi lon c jun tac:

•   Jiñi tema «Las cruzadas: ‹trágica ilusión›» miʼ yʌl chaʼan jiñi Iglesia católica romana tsiʼ cʼʌñʌ jiñi i cʼabaʼ Dios yicʼot i cʼabaʼ Cristo chaʼan miʼ tsʌnsʌntel cabʌl lac piʼʌlob.

•   Jiñi tema «La Iglesia Católica y África» miʼ pʌs chaʼan jiñi ñopbalʌl maʼañic chuqui tsaʼ mejli i mel chaʼan maʼañic miʼ yujtel tsʌnsa i miʼ contrajiñob i bʌ jiñi lac piʼʌlob.

•   Jiñi tema tac «¿Tiene la culpa la religión?», «El papel de la religión en las guerras» yicʼot «La religión toma partido» miʼ pʌs chaʼan ti jiñi guerra tac ujtem bʌ an i laja tsʌnsayob i bʌ jiñi católicojoʼ bʌ, ortodoxojoʼ bʌ yicʼot protestantejoʼ bʌ.

¿Yom ba miʼ coltañob guerra jiñi Iglesia tac?

 Tsaʼ bʌ i yʌlʌ Jesús: «Cʼuxbin a piʼʌl cheʼ bajcheʼ maʼ bajñel cʼuxbin a bʌ» (Mateo 22:39). «Cʼuxbin laʼ contrajob» (Mateo 5:44-47).

 Tsaʼ bʌ i yʌlʌ Jesús: «Jiñi c Yumʌntel mach i chaʼañic ili pañimil. Cheʼ i chaʼañic pañimil jiñi c Yumʌntel, jiñi xcoltayajob c chaʼan tsiʼ chaʼleyob jatsʼ chaʼan maʼañic mi cʌjqʼuel» (Juan 18:36). «Pejtelel muʼ bʌ i cʼʌñob jiñi espada mi caj i tsʌnsʌntelob ti espada» (Mateo 26:47-52).

 Ñaʼtancu iliyi: Mi Jesús tiʼ sube jiñi xcʌntʼañob i chaʼan chaʼan mach yomic miʼ chʼʌmob jiñi espada chaʼan miʼ coltañob, ¿weñʌch ba cheʼ miʼ majlelob ti guerra? Pejcan jiñi tema «El cristianismo y la guerra: ¿son compatibles?» chaʼan maʼ qʼuel chaʼan jiñi ñaxam bʌ xñoptʼañob tsiʼ lajiyob Jesús i tsiʼ jacʼbeyob i cʌntesa.

¿Chuqui mi caj i chaʼlen jiñi ñopbalʌl tac muʼ bʌ i yotsan i bʌ ti guerra?

 Jiñi Biblia miʼ yʌl chaʼan Dios mach utsʼatic miʼ qʼuel jiñi ñopbalʌl tac muʼ bʌ i lon al chaʼan miʼ jacʼben i cʌntesa tac Jesús, pero cheʼ ti mero i yorajlelixi maʼañix miʼ jacʼ (Mateo 7:21-23; Tito 1:16).

•   Yaʼ ti Biblia, ti Apocalipsis miʼ yʌl chaʼan Dios miʼ yʌqʼuen tiʼ mul jiñi ñopbalʌl tac chaʼan «pejtelel jiñi tsaʼ bʌ tsʌnsʌntiyob ti pañimil» (Apocalipsis 18:21, 24). Mi a womto a bej cʌn chucoch, qʼuele jiñi tema «¿Qué es Babilonia la Grande?».

•   Jesús tsiʼ yʌlʌ chaʼan Dios mi caj i jisan jiñi ñopbalʌl tac mach bʌ utsʼatic miʼ qʼuel tiʼ caj pejtelel chuqui mach bʌ weñic an i mele, lajal bajcheʼ juntejc ocʼben bʌ teʼ «miʼ sejqʼuel i miʼ chojquel ochel ti cʼajc» (Mateo 7:15-20). Mi a womto a bej cʌn bajcheʼ mi caj i yujtel iliyi, qʼuele jiñi tema «¡Se acerca el fin de la religión falsa!».

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images