Cabʌl miʼ ñaʼtañob chaʼan jiñi quixtañujob woliʼ jemob ili Lum yicʼot pejtelel chuqui cuxul bʌ, i miʼ wen pensariñob. Jiñi wen yujiloʼ bʌ miʼ yʌlob chaʼan jiñi quixtañujob ñumento woliʼ yʌcʼ ti wocol jiñi añimal tac yicʼot pejtelel chuqui cuxul bʌ.

 ¿Muʼ ba caj lac bajñel jisan ili Lum? ¿O muʼ ba caj laj cʌntan pejtelel chuqui cuxul bʌ?

 Jiñi wen yujiloʼ bʌ miʼ yʌlob chaʼan mejlʌch laj cʌntan ili Lum yicʼot pejtelel chuqui cuxul bʌ. Jiñi investigadorob miʼ yʌlob chaʼan mucʼʌch i cʼʌjñibʌyel pejtelel chuqui miʼ mejlel chaʼan miʼ coltʌntel ili Lum mi jiñi yom bʌ miʼ qʼuextʌntel junlajal yicʼot juntemel miʼ mejlel. Jiñi yom bʌ miʼ qʼuextʌntel jin tacʌch iliyi:

•   Wen miʼ cʼʌjñel jiñi lum tac, jiñi mateʼel tac yicʼot baqui tac an jiñi jaʼ.

•   Miʼ sʌclʌntel bajcheʼ miʼ tajtʌl jiñi luz yicʼot bajcheʼ miʼ cʼʌjñel ti eʼtel jiñi lum.

•   Miʼ qʼuextʌntel bajcheʼ miʼ mejlel yicʼot miʼ pujquel jiñi bʌlñʌcʼʌl chaʼan maʼañic miʼ toʼol chojquel, i chaʼan jiñi quixtañujob maʼañix miʼ cʌlʌx cʼuxob weʼel yicʼot chʌy, i cojach miʼ cʼuxob jiñi fruta yicʼot verdura tac.

•   Chaʼan wen mi lac chumtʌl mach yaʼic cʌyʌl ti chubʌʼañʌl tac.

 ¿Bajcheʼ yilal maʼ qʼuel? ¿Mejl ba lac pijtan chaʼan jiñi yumʌlob, jiñi empresa tac yicʼot yambʌ lac piʼʌlob miʼ tem chaʼleñob eʼtel? ¿O wocol baʼ miʼ yujtel jiñi tiʼ caj chaʼan jiñi quixtañujob miʼ bajñel cʼuxbiñob i bʌ, miʼ cʼuxbiñob jiñi taqʼuin yicʼot chaʼan pʼisbil jach chuqui miʼ ñaʼtañob? (2 Timoteo 3:1-5).

 Jiñi Biblia miʼ subeñonla chaʼan jiñi Lum maʼañic chuqui mi caj i chaʼlen. Mi tsictesan jaʼel chucoch maʼañic miʼ cʼʌjñibʌyel muʼ bʌ i melob jiñi quixtañujob chaʼan miʼ coltañob ili Lum, pero miʼ subeñonla jaʼel chuqui yom bʌ miʼ qʼuextʌyel chaʼan mucʼʌch i mejlel. I miʼ subeñonla bajcheʼ mi caj i qʼuextʌyel.

 ¿Chucoch maʼañic miʼ wen cʼʌjñibʌyel muʼ bʌ i melob jiñi quixtañujob chaʼan miʼ coltañob ili Lum? Jehová a tsiʼ mele ili Pañimil i tsiʼ yʌqʼue tiʼ wenta jiñi quixtañujob chaʼan miʼ cʌntañob (Génesis 1:28; 2:15). Wen bajcheʼ mi caj i yajñelob mi mucʼʌch i yʌcʼob i bʌ ti tojʼesʌntel tiʼ tojlel jiñi tsaʼ bʌ i meleyob yicʼot mi mucʼʌch i jacʼbeñob i tʼan (Proverbios 20:24). Pero mach cheʼic tsiʼ meleyob, tsiʼ ñusʌbeyob i tʼan Jehová i tsiʼ bajñel chʼʌmʌyob i bʌ ti wenta (Eclesiastés 7:29). I jiñi quixtañujob maʼañic miʼ mejlel i bajñel cʌntañob ili Lum, jin chaʼan pejtelel chuqui miʼ melob, maʼañic miʼ mejlel i junyaj qʼuextañob chuqui yom bʌ miʼ mejlel (Proverbios 21:30; Jeremías 10:23).

 Jiñi yom bʌ miʼ mejlel. Dios maʼañic mi caj i yʌcʼ chaʼan jiñi quixtañujob miʼ bej jemob ili Lum (Apocalipsis 11:18). Dios maʼañic woliʼ ñaʼtan i suben jiñi yumʌlob yicʼot jiñi quixtañujob chuqui yom miʼ melob come woliʼ wen asiñob ili Lum, mucʼʌch caj i junyaj qʼuextañob (Apocalipsis 21:1). Jin chaʼan Jehová miʼ yʌl yaʼ ti Biblia: «¡Qʼuele! Woli c tsijibtesan pejtelel chuqui an» (Apocalipsis 21:5).

 ¿Bajcheʼ mi caj i yujtel? Jehová mi caj i qʼuextan jiñi yumʌlob i mi caj i waʼchocon yambʌ cʌmbil bʌ bajcheʼ i Yumʌntel Dios. Ti jiñi yumʌntel, Jesucristo mi caj i mel i yeʼtel i mi caj i chʼʌm tiʼ wenta ili Pañimil (Daniel 2:44; Mateo 6:10).

 Jiñi i Yumʌntel Dios mi caj i cʌntesan jiñi quixtañujob chaʼan miʼ chumtʌlob cheʼ bajcheʼ miʼ yʌl i mandar tac Dios. Cheʼ bʌ jiñi quixtañujob miʼ cʼotel i cʌñob chaʼan jiñi tsaʼ bʌ i meleyob jin yom bʌ miʼ yumañob yicʼot miʼ jacʼbeñob i tʼan, temel mi caj i yajñelob yicʼot pejtelel chuqui cuxul bʌ an (Isaías 11:9). Jiñi Biblia miʼ pʌs chaʼan jiñi quixtañujob wen bajcheʼ mi caj i chumtʌlob cheʼ miʼ mel i yeʼtel jiñi i Yumʌntel Dios i maʼañix mi caj i jemob ili Lum. Jiñi i Yumʌntel Dios mi caj i mel tac iliyi:

•   Mi caj i yʌqʼuen i bʌl i ñʌcʼ pejtelel jiñi quixtañujob (Salmo 72:16).

•   Mi caj i tojʼesan pejtelel chuqui an ti pañimil (Isaías 35:1, 2, 6, 7).

•   Jiñi quixtañujob yicʼot añimal tac juntemel mi caj i yajñelob (Isaías 11:6-8; Oseas 2:18).

•   Maʼañix miʼ cajel butʼjaʼ, yujquel o yan tac bʌ (Marcos 4:37-41).

 Miʼ mejlel a ñop chaʼan i Yumʌntel Dios mucʼʌch caj i mel pejtelel iliyi. Mi a wom a ñumen cʌn, pejcan jiñi tema «¿Jala mi caj i chʼʌm tiʼ wenta ili Pañimil jiñi i Yumʌntel Dios?».