Ila ti Lum cʌlʌxix ticwal, i tiʼ caj jiñi ticwal wolix i yujtel yan tac bʌ wocol. Qʼuele chuqui tac an i yʌlʌyob:

•   «Cʼʌlʌl cheʼ bʌ tsaʼ caji ti qʼuejlel jiñi clima añix 174 jab, cojaxto ti ili junio ñumeñix ti pʼis tsaʼ ñumi ticwal» (Oficina Nacional de Administración Oceánica y Atmosférica, Departamento de Comercio de Estados Unidos, 13 de julio chaʼan 2023).

•   «Ti Italia, España, Francia, Alemania yicʼot Polonia cʌlʌxix ticwal, i miʼ pjtʌntel chaʼan muʼto i cʼotel ti 48 ºC ti jiñi isla tac ti Sicilia yicʼot Cerdeña. Tajol jiñʌch jiñi ñumen tsʌts bʌ ticwal ti Europa» (Agencia Espacial Europea, 13 de julio chaʼan 2023).

•   «Cheʼ bʌ miʼ ñumen ticwan jiñi Lum, miʼ pijtʌntel chaʼan ñumen tsʌtsto jiñi jaʼal jaʼel. Tiʼ caj jiñi, miʼ ñumel cajel butʼjaʼ» (Stefan Uhlenbrook, director chaʼan jiñi Sección chaʼan Hidrología, Recursos Hídricos yicʼot Criosfera de la Organización Meteorológica Mundial, 17 de julio chaʼan 2023).

 ¿Muʼ ba i yʌqʼuet ti pensar cheʼ cʌlʌxix chuqui woliʼ yʌjlel chaʼan bajcheʼ woliʼ wen qʼuextʌyel jiñi clima? Qʼuele chuqui miʼ yʌl jiñi Biblia.

 Tsaʼʌch. Cheʼ ñumeñix ti pʼis jiñi ticwal o tsʌñal jiñʌch woliʼ tsʼʌctiyel muʼ bʌ i yʌl jiñi Biblia chaʼan muʼ bʌ caj i yujtel ili ora. Jesús tsiʼ yʌlʌ chaʼan mi caj laj qʼuel «chuqui tac bʌbʌqʼuen bʌ» (Lucas 21:11). Cabʌl lac piʼʌlob miʼ bʌcʼñañob cheʼ woliʼ bej pʼojlel jiñi ticwal i miʼ bʌcʼñañob chaʼan jiñi quixtañujob miʼ jisañob ili Lum.

 Mucʼʌch. Dios tsiʼ mele ili Lum chaʼan mi lac chumtan tiʼ pejtelel ora i maʼañic mi caj i yʌcʼ chaʼan miʼ jisʌntel (Salmo 115:16; Eclesiastés 1:4). Tsiʼ yʌlʌ chaʼan mi caj i jisan «jiñi woli bʌ i jisañob pañimil» (Apocalipsis 11:18).

 Jiñi Biblia miʼ yʌl chaʼan Dios añʌch chuqui miʼ mejlel i mel chaʼan maʼañic chuqui miʼ chaʼlen jiñi Lum, i mucʼʌch caj i tsʼʌctesan. 

•   «[Dios] tsiʼ ñʌchʼtesa jini pʼʌtʌl bʌ icʼ, tsaʼ lajmi. Tsiʼ tiqʼui jini wʌlwʌlña bʌ jaʼ, tsaʼ ñʌjchʼi» (Salmo 107:29). Dios an i pʼʌtʌlel chaʼan miʼ ticʼ icʼ jaʼal, ticwal, tsʌñal o jiñʌch chuquiyes. Miʼ mejlel i tojʼesan pejtelel woli bʌ i yʌcʼ ti wen qʼuextʌyel jiñi clima yicʼot woli bʌ i yʌqʼuen wocol jiñi lac piʼʌlob.

•   «Maʼ ñaʼtan chuqui yom ti pañimil [...]. Jini chaʼan wen anix i bʌl chaʼan maʼ wʌchʼesan» (Salmo 65:9). Dios mi caj i sujtesan ti jumpʼejl paraíso ili Lum.

 Chaʼan maʼ ñaʼtan bajcheʼ mi caj i chaʼ tojʼan ili pañimil, qʼuele jiñi tema «¿Majqui mi caj i coltan ili Lum?».