Ti 24 chaʼan mayo, 2022, chʼijyemtic jax chuqui tsaʼ ujti ti Uvalde (Texas, Estados Unidos). Jiñi periódico The New York Times tsiʼ yʌlʌ chaʼan «juntiquil wiñic am bʌ 19 i jabilel tiʼ tsʌnsa 19 chʼitoñob yicʼot chaʼtiquil maestra [...] ti jiñi escuela primaria Robb».

 Chʼijyemtic jax, pero mucʼʌch i wen ujtel ili wocol. Jiñi periódico USA Today tsiʼ yʌlʌ chaʼan ti Estados Unidos «tsaʼ ujti 249 julbʌl ti escuela tac ti jiñi jabil tsaʼ bʌ ñumi, ñumento bajcheʼ ti jiñi yambʌ jabil tac cʼʌlʌl ti 1970».

 ¿Chucoch miʼ yujtel ili wocol tac? ¿Bajcheʼ miʼ mejlel lac lʌtʼ ili wocol tac? ¿Am ba chuqui miʼ yʌqʼueñonla lac ñop chaʼan ti jumpʼejl bʌ qʼuin mi caj i jilel jiñi jontolil? Jiñi Biblia miʼ yʌqʼueñonla i jacʼbal.

•    Jiñi Biblia miʼ subeñonla chaʼan ti ili ora chumulonla ti «jiñi cojix tac bʌ qʼuin». Jiñi lac piʼʌlob «maʼañic mi caj i cʼuxbiñob añoʼ bʌ tiʼ familia», «wen jontolob» i mi caj «i ñumen asiyelob majlel» (2 Timoteo 3:1-5, 13). Mi a wom a ñumen cʌn, qʼuele jiñi tema «¿Predijo la Biblia cómo sería la gente en nuestros días?».

 Cabʌl lac piʼʌlob miʼ cʼajtibeñob i bʌ chucoch Dios maʼañic chuqui miʼ mel chaʼan maʼañic miʼ yujtel wocol tac bajcheʼ iliyi. Mi a wom a ñumen cʌn, qʼuele jiñi tema «¿Por qué le pasan cosas malas a la gente buena?».

•    «Pejtelel tsaʼ bʌ tsʼijbunti ti wajali tsaʼ tsʼijbunti chaʼan laj cʌntesʌntel, chaʼan mi lac taj lac pijtaya [...] yicʼot [...] miʼ ñuqʼuesʌntel lac pusicʼal ti jiñi Tsʼijbujel» (Romanos 15:4).

 Jiñi Biblia miʼ yʌqʼueñonla ticʼojel tac chaʼan mi lac lʌtʼ jiñi wocol tac ila ti pañimil. Qʼuele jiñi ¡Despertad! am bʌ i temajlel «¿Acabará algún día la violencia?».

 An i tajol jiñi alobob miʼ ñʌchʼtañob yicʼot miʼ qʼuelob mach bʌ weñic noticia tac muʼ bʌ i bʌcʼtesañob. Mi tatʌlet i a wom a coltañob, pejcan jiñi tema «El efecto de las noticias en los niños».

•    «Mi caj i mʌn jini ticʼlʌbiloʼ bʌ yicʼot jini chuculoʼ bʌ ti jontolil chaʼan miʼ yʌcʼob ti colel» (Salmo 72:14).

•    «Jini puñal am bʌ i cʼʌjñibal ti guerra mi caj i sutqʼuiñob ti tsepoʼ trigo. Maʼanix mi caj i chʌn chaʼlen guerra jumpʼejl tejclum tiʼ contra yambʌ tejclum. Maʼanix mi caj i chʌn ñopob guerra winicob» (Miqueas 4:3).

 Dios mi caj i mel jiñi maʼañic bʌ miʼ mejlel i mel jiñi wiñicob. Jiñi i Yumʌntel am bʌ ti panchan mi caj i jisan pejtelel muʼ bʌ i cʼʌjñel ti guerra yicʼot jiñi jontolil. Mi a wom a ñumen cʌn chuqui mi caj i mel jiñi i Yumʌntel Dios, pejcan jiñi tema «Jiñi i Yumʌntel Dios mi caj i chʼʌm tilel i sujm bʌ ñʌchʼtʌlel».