Ti 19 chaʼan mayo, 2022, jiñi Consejo de Seguridad de las Naciones Unidas tsiʼ tempa i bʌ yicʼot ñumen ti 75 am bʌ i yeʼtelob i tsiʼ yʌlʌyob chaʼan «jiñi wiʼñal tsaʼ tsʌtsʼa tiʼ caj jiñi COVID-19 yicʼot jiñi cambio climático, pero miʼ mejlel ti ñumen tsʌtsʼan tiʼ petol pañimil tiʼ caj jiñi guerra ti Ucrania». Cheʼ jiñi, jiñi revista The Economist tsiʼ yʌlʌ chaʼan «jiñi guerra woliʼ yutsi pʼojlesan wiʼñal tiʼ petol pañimil». Jiñi Biblia miʼ yʌl chaʼan mucʼʌch i cajel wiʼñal bajcheʼ iliyi, pero mucʼʌch i yʌqʼueñonla ticʼojel jaʼel yicʼot lac pijtaya chaʼan mi laj cuch ili wocol.

•    Jesús tsiʼ yʌlʌ: «Mi caj i contrajin i bʌ jumpʼejl tejclum yicʼot yambʌ, jumpʼejl yumʌntel yicʼot yambʌ, miʼ cajel wiʼñal» (Mateo 24:7).

•    Yaʼ ti libro chaʼan Apocalipsis miʼ tajtʌl ti tʼan chʌntiquil cʼʌchʌloʼ bʌ ti caballo. Juntiquil i wentʌlelʌch jiñi guerra, i miʼ tilel yambʌ i wentʌlelʌch bʌ jiñi wiʼñal. Jiñi profecía tsiʼ yʌlʌ chaʼan mi caj i cʼotel i yorajlel maʼañic mi caj i jastiyel jiñi bʌlñʌcʼʌl yicʼot chaʼan wen lets i tojol mi caj i chojñel. «Tsaʼ j qʼuele juncojt iʼicʼ bʌ caballo. Jiñi cʼʌchʌl bʌ yaʼi chucul i chaʼan jumpʼejl balanza. [...] Tsaʼ cubi lajal bʌ bajcheʼ tʼan, tsaʼ bʌ i yʌlʌ: «Jumpʼejl litro trigo ti jumpʼejl denario yicʼot uxpʼejl litro cebada ti jumpʼejl denario» (Apocalipsis 6:5, 6).

 Ili profecía tac chaʼan bʌ jiñi wiʼñal wolʌch i tsʼʌctiyel ti ili ora. Jiñi Biblia miʼ suben bajcheʼ «jiñi cojix tac bʌ qʼuin» (2 Timoteo 3:1). Mi a womto a bej cʌn chaʼan bʌ «jiñi cojix tac bʌ qʼuin» yicʼot chuqui woliʼ bej melob jiñi cʼʌchʌloʼ bʌ ti caballo, qʼuele jiñi video Cheʼ ti 1914 tsaʼ qʼuextʌyi jiñi pañimil yicʼot pejcan jiñi tema «¿Qué representan los jinetes del Apocalipsis?».

•    Jiñi Biblia miʼ yʌqʼueñonla wen tac bʌ ticʼojel chaʼan mi laj cuch tsʌts tac bʌ wocol, bajcheʼ jiñi wiʼñal yicʼot cheʼ wen lets i tojol bʌlñʌcʼʌl. Miʼ mejlel a taj wen tac bʌ ticʼojel ti jiñi tema «Cómo vivir con menos».

•    Jiñi Biblia miʼ yʌqʼueñonla lac pijtaya jaʼel chaʼan mi caj i jilel ili wocol. Miʼ yʌl chaʼan «mi caj i yʌcʼ cabʌl i cuch jini cholel» yicʼot maʼañix majqui mi caj i ñusan wiʼñal (Salmo 72:16). Chaʼan maʼ ñumen cʌn chaʼan bʌ ili pijtaya yicʼot chucoch mucʼʌch i mejlel a ñop, pejcan jiñi tema «La esperanza real de un mañana mejor».