Jiñi Organización Mundial de la Salud (OMS) miʼ yʌl chaʼan jiñi i ticʼlʌntel xʼixicob jumpʼejlʌch wocol tiʼ petol pañimil lajal bʌ bajcheʼ jumpʼejl cʼamʌjel, i an chuqui yom miʼ mejlel ti ora. Jiñi OMS miʼ yʌl chaʼan «cabʌl xʼixicob an ticʼlʌntiyob o wersa piʼlentiyob tiʼ piʼʌl». Maxto jali, jiñi ONU tsiʼ yʌlʌ chaʼan ti jujumpʼejl qʼuin cheʼ bʌ 137 xʼixicob an tsʌnsʌntiyob tiʼ piʼʌl o tiʼ tojlel juntiquil am bʌ tiʼ familia. a

 Ili tac miʼ pʌs chaʼan tsʌtsʌch bʌ wocol cheʼ bʌ miʼ ticʼlʌntel jiñi xʼixicob, pero mach mejlic i yʌl bajcheʼ cʼamel i cʼuxel miʼ yubiñob cheʼ bʌ miʼ jajtsʼelob yicʼot bajcheʼ yubil miʼ yubiñob i bʌ jujuntiquil.

 ¿Woli ba a ñusan a ticʼlʌntel? ¿A cʌñʌ ba juntiquil cheʼ bʌ woliʼ ñusan? Mi cheʼʌchi, tajol miʼ mejlel i coltañet ili ticʼojel tac am bʌ ti Biblia.

  Mach a mulic

  Sʌclan a coltʌntel

  Mach a bajñelic

  Maʼañix mi caj i chʌn ticʼlʌntel jiñi xʼixicob

  ¿Bajcheʼ miʼ mejlel laj coltan juntiquil woli bʌ i ticʼlʌntel?

 Muʼ bʌ i yʌl jiñi Biblia: «Ti jujuntiquilonla mi caj lac waʼtʌl tiʼ tojlel Dios chaʼan miʼ yujtel meloñel ti lac tojlel chaʼan tsaʼ bʌ lac mele» (Romanos 14:12).

 Ñaʼtan iliyi: Jiñi woli bʌ i ticʼlan yambʌ mi caj i yujtel meloñel tiʼ tojlel.

 Mi jiñi a piʼʌl miʼ subeñet chaʼan a mul cheʼ woliʼ ticʼlañet, mach i sujmic woli bʌ i yʌl. Pejtelel xʼixic yom miʼ cʼuxbintel, mach yomic miʼ ticʼlʌntel (Colosenses 3:19).

 An i tajol jiñi muʼ bʌ i ticʼlan yambʌ mach yujilic chuqui woliʼ mel, tajol cheʼʌch miʼ mel come cheʼʌch tsaʼ cosʌnti o miʼ wen jap lembal. Mach yʌlʌyic chuqui tiʼ caj, Dios miʼ qʼuel chuqui miʼ mel ti a tojlel jiñi wiñic. I jiñi wiñic an tiʼ wenta chaʼan miʼ chaʼlen wersa i qʼuextan i melbal.

 Muʼ bʌ i yʌl jiñi Biblia: «Mucʼʌch i joloñel tiʼ pejtelel cheʼ miʼ temob i tʼan cheʼ cabʌlob» (Proverbios 15:22).

 Ñaʼtan iliyi: Mi muʼqui a bʌcʼñan chaʼan an chuqui maʼ chaʼlen i mach a wujilic chuqui yom maʼ mel, sʌclan a coltʌntel.

 ¿Chucoch yomʌch chaʼan jiñi yañoʼ bʌ miʼ coltañetob? Come mi woli a ticʼlʌntel, tajol cabʌl chuqui maʼ pensarin i mach a wujilic chuqui yom maʼ mel. Tajol wocol maʼ wubin chaʼan maʼ ñaʼtan baqui bʌ ili joʼchajp ñumen ñuc i cʼʌjñibal:

•   Chuqui mi caj i yujtel ti a tojlel

•   Bajcheʼ mi caj i yajñelob jiñi a walobilob

•   Bajcheʼ mi caj a taj taqʼuin

•   Chaʼan muʼto a cʼuxbin jiñi a piʼʌl

•   Chaʼan mach a womic chaʼan maʼ cʌy laʼ bʌ yicʼot woli a pijtan chaʼan miʼ qʼuextan i melbal

 I tilelʌch cheʼ bʌ mach a wujilic chuqui yom maʼ mel yicʼot cheʼ bʌ maʼ ñaʼtan chaʼan maʼañic mi caj i lʌjtʼel a chaʼan jiñi wocol. ¿Majqui miʼ mejlel a cʼajtiben chaʼan miʼ coltañet?

 Juntiquil ti a familia o juntiquil wem bʌ a wamigo. Tajol an chuqui miʼ mejlel i mel chaʼan miʼ coltañet yicʼot miʼ tijicñesʌbeñet a pusicʼal. Cheʼ bʌ maʼ pejcan juntiquil i wentajetʌch bʌ mi caj i wen coltañet

 An número tac chaʼan teléfono baqui miʼ mejlel a cʼajtin chaʼan maʼ coltʌntel. Ti ili número tac miʼ mejlel a cʼajtin chaʼan maʼ coltʌntel ti ora. Jiñi muʼ bʌ i jacʼob jiñi llamada chajpʌbilob chaʼan miʼ subeñetob chuqui yom maʼ mel chaʼan maʼañic chuqui maʼ chaʼlen. Mi jiñi a piʼʌl miʼ ñaʼtan chaʼan yomʌch coltʌntel i yomʌch i qʼuextan i melbal, ili número tac mucʼʌch caj i coltan chaʼan miʼ tech i mel.

 Yan tac bʌ baqui miʼ mejlel a taj a coltʌntel. Iliyi mi caj i coltañetob chaʼan maʼ pejcan doctorob, enfermerajob yicʼot yañoʼ bʌ muʼ bʌ caj i coltañetob ti ora cheʼ bʌ añet ti wocol.

 Muʼ bʌ i yʌl jiñi Biblia: «Lʌcʼʌl an lac Yum [Jehová b] baʼan chʼijiyemoʼ bʌ i pusicʼal. Miʼ coltan jini woli bʌ i melob i pusicʼal» (Salmo 34:18).

 Ñaʼtan iliyi: Dios miʼ yʌcʼ i tʼan chaʼan mi caj i coltañet.

 Jehová mucʼʌch i wen ñaʼtañet (1 Pedro 5:7). Yujil jiñi woli bʌ a ñusan, miʼ chʼʌmben i sujm chuqui woliʼ ñumel ti a jol yicʼot miʼ ñaʼtan bajcheʼ yubil maʼ wubin a bʌ. Miʼ mejlel i cʼʌn jiñi Biblia chaʼan miʼ ñuqʼuesan a pusicʼal. I miʼ subeñet chaʼan maʼ pejcan ti oración chaʼan maʼ cʼajtiben a ñaʼtʌbal yicʼot a pʼʌtʌlel chaʼan maʼ cuch jiñi wocol (Isaías 41:10).

 Muʼ bʌ i yʌl jiñi Biblia: «Jujuntiquil mi caj i yajñel tiʼ yotot tiʼ ñʌchʼtʌlel i pusicʼal. Maʼanic majch mi caj i bʌcʼtesan» (Miqueas 4:4).

 Ñaʼtan iliyi: Jiñi Biblia miʼ yʌl chaʼan pejtelel jiñi lac piʼʌlob ñʌchʼʌlob mi caj i yajñelob tiʼ yotot.

 Jin jach Jehová miʼ mejlel i junyaj tojʼesan jiñi lac wocol tac. Jiñi Biblia miʼ yʌl: «Mi caj i sujcubeñob i yaʼlel i wut, maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel» (Apocalipsis 21:4). Ti jiñi bʌ ora, maʼañix mi caj laj cʼajtesan chuqui mach bʌ weñic tsaʼ lac ñusa yicʼot jin jach mi caj laj cʼajtesan chuqui utsʼatax bʌ mi caj lac ñusan (Isaías 65:17). Jiñʌch jiñi ñʌchʼtʌlel muʼ bʌ i yʌl jiñi Biblia chaʼan mi caj a taj.