¿Am baʼ qʼuele chaʼan cabʌl ñopbalʌl tac jin jach miʼ ñumen ñaʼtañob i tajob taqʼuin i mach jiñic chaʼan miʼ coltan jiñi lac piʼʌlob chaʼan miʼ lʌcʼtesañob i bʌ ti Dios? An chuqui tac miʼ choñob yicʼot an chuqui tac miʼ melob chaʼan miʼ yʌqʼuentelob taqʼuin. Cabʌl muʼ bʌ i chaʼleñob cʌntesa ti ñopbalʌl tac wen lets miʼ tojtʌlob yicʼot cabʌl chuqui añob i chaʼan. Laʼ laj qʼuel chaʼpʼej uxpʼejl ejemplo:

•   Ti jumpʼejl investigación tsaʼ bʌ mejli tsaʼ qʼuejli chaʼan juntiquil obispo chaʼan católica ñumen ti 13 jab tsiʼ cʼʌñʌ jiñi taqʼuin muʼ bʌ i yʌqʼuentel jiñi iglesia chaʼan miʼ toj 150 viaje ti avión yicʼot cheʼ bʌ 200 viaje ti carro. Cheʼ jaʼel, ñumen ti 4 millón dólar tsiʼ cʼʌñʌ chaʼan miʼ tojʼesan jiñi otot yaʼ baqui chumul am bʌ ti iglesia.

•   Ti jumpʼejl país ti África, cabʌl lac piʼʌlob miʼ majlel i qʼuelob chuqui tac miʼ mel juntiquil pastor. I jiñi iglesia cabʌl chuqui miʼ chon: Miʼ chon «aceite muʼ bʌ i mel milagro», toalla yicʼot i bujc baqui an i fotojlel. Lʌcʼʌ tiʼ pejtelel jiñi i wiñicob pʼumpʼuñob, i tiʼ bajñelil wen rico.

•   Ti China, an chʌmpʼejl wits i chaʼan bʌ jiñi ñopbalʌl budista, chaʼpʼejl i chaʼañix jiñi gobierno chaʼan miʼ wen locʼsʌntel taqʼuin. Jiñi templo Shaolín wen cʌmbil bʌ an cabʌl baqui ochem chaʼan miʼ wen taj taqʼuin, i jiñi am bʌ tiʼ wenta cʌmbilix bajcheʼ«sacerdote am bʌ cabʌl i negocio».

•   Jiñi empresa tac ti Estados Unidos miʼ cʼʌn juntiquil lac piʼʌl chaʼan miʼ coltañob ti chaʼan bʌ Dios jiñi xʼeʼtelob. Jumpʼejl jun miʼ yʌl chaʼan, pejtelel muʼ bʌ i cʼʌn yaʼʌch miʼ locʼsan ti ñopbalʌl tac

 ¿Bajcheʼ yilal maʼ qʼuel cheʼ bʌ jiñi ñopbalʌl tac cabʌl chuqui miʼ melob chaʼan miʼ tajob taqʼuin? ¿Am baʼ cʼajtibe a bʌ bajcheʼ yilal miʼ qʼuel Dios cheʼ jiñi yambʌ lac piʼʌlob miʼ ticʼlan yambʌlob añoʼ bʌ i ñopoñel chaʼan miʼ tajob taqʼuin?

 Dios maʼañic miʼ mulan cheʼ jiñi ñopbalʌl miʼ wen otsan i bʌ chaʼan taqʼuin. Jiñi Biblia miʼ yʌl chaʼan ti wajali an sacerdotejob muʼ bʌ i yʌlob chaʼan i wiñicob Dios i tsiʼ chaʼleyob cʌntesa «chaʼan jach i mulʌntel taqʼuin», Dios maʼañic tsiʼ mulaj (Miqueas 3:11). Dios maʼañic tsiʼ mulaj cheʼ bʌ jiñi i yotot tiʼ sujtesayob tiʼ «chʼeñal xujchʼob» (Jeremías 7:11). Tsiʼ meleyob jiñi, chaʼan jach miʼ mulañob taqʼuin.

 Cheʼ bajcheʼ Dios, Jesús maʼañic tsiʼ mulaj jaʼel cheʼ jiñi lac piʼʌlob miʼ cʼʌñob jiñi ñopbalʌl chaʼan jach miʼ tajob taqʼuin. Cheʼ bʌ tsajñi ila ti Lum, jiñi añoʼ bʌ yeʼtel ti ñopbalʌl tsiʼ yʌqʼueyob permiso jiñi xchoñoñelob chaʼan miʼ yochelob ti choñoñel tiʼ mal templo am bʌ ti Jerusalén i cheʼ jiñi miʼ tajob taqʼuin jaʼel. Jiñi xchoñoñelob tsiʼ wen xujchʼibeyob i taqʼuin jiñi utsoʼ bʌ i pusicʼal muʼ bʌ i cʼotelob i chʼujutesan Dios yaʼi. Tiʼ caj jiñi, Jesús maʼañic tsiʼ bʌcʼña i choc loqʼuel ti templo cheʼ bʌ miʼ melob bajcheʼ jiñi. Tiʼ subeyob: «¡Cʌyʌ laʼ sujtesan ti choñoñibʌl jiñi i yotot c Tat!» (Juan 2:14-16).

 Jesús tsiʼ pʌsʌ jaʼel tiʼ subtʼan chaʼan cheʼʌch miʼ ñaʼtan cheʼ bajcheʼ Dios (Juan 8:28, 29). Maʼañic tsiʼ cʼajti taqʼuin cheʼ bʌ tsiʼ cʌntesa jiñi lac piʼʌlob ti chaʼan bʌ Dios, mi jiñic cheʼ tsiʼ mele milagro, cheʼ tsiʼ weʼsa cabʌl lac piʼʌlob, cheʼ tsiʼ tsʼʌca jiñi cʼamoʼ bʌ yicʼot cheʼ tsiʼ chaʼ chʼojyesa jiñi chʌmeñoʼ bʌ. Jesús maʼañic tsiʼ chaʼle subtʼan chaʼan miʼ sujtel ti rico, come mi añicto i yotot (Lucas 9:58).

 Jesús tiʼ sube jiñi xcʌntʼañob i chaʼan chaʼan mach yomic miʼ melbeñob i yeʼtel Dios chaʼan miʼ tajob taqʼuin. Tiʼ subeyob iliyi: «Majtan jach tsaʼ aqʼuentiyetla, majtan jach yom mi laʼ wʌcʼ» (Mateo 10:8). I cheʼʌch tsiʼ meleyob jiñi ñaxam bʌ xcʌntʼañob, tsaʼ bʌ cʼotiyob ti cʌjñel bajcheʼ xñoptʼañob. Laʼ laj qʼuel chaʼpʼej uxpʼejl ejemplo:

•   Jiñi apóstol Pedro juntiquilʌch xcʌntʼan tsaʼ bʌ ajñi yicʼot Jesús tiʼ subtʼan. Ti jumpʼejl bʌ qʼuin, juntiquil wiñic i cʼabaʼ Simón tsiʼ ñopo i yʌqʼuen taqʼuin chaʼan miʼ yʌqʼuen i pʼʌtʌlel yicʼot i yeʼtel. Pedro maʼañic tsiʼ jacʼʌ i chʼʌm, tiʼ sube Simón: «Laʼ jilic a wicʼot jiñi a plata come tsaʼ ñaʼta chaʼan miʼ mejlel a mʌn ti taqʼuin jiñi majtan tilem bʌ ti Dios» (Hechos 8:18-20).

•   Jiñi apóstol Pablo wen cʌmbilʌch. Anquese juntiquilʌch i wiñic Dios tsaʼ bʌ i wen chaʼle subtʼan ti cabʌl tejclum, cabʌl jab tsiʼ chaʼle eʼtel chaʼan miʼ coltan congregación tac i maʼañic tsiʼ cʼajti chaʼan miʼ tojtʌl. Pablo yicʼot i piʼʌlob ti subtʼan maʼañic tsiʼ choñoyob «ñumel jiñi i tʼan Dios» cheʼ bajcheʼ tsiʼ meleyob cabʌl wiñicob (2 Corintios 2:17). Pablo tsiʼ yʌlʌ: «Cheʼ bʌ tsaʼ lon c subeyetla jiñi wen tʼan tiʼ tojlel Dios, qʼuin acʼbal tsaʼ lon c chaʼle eʼtel chaʼan mi juntiquileticla mi lon j cʼajtiben taqʼuin» (1 Tesalonicenses 2:9).

 I sujmʌch, jiñi ñaxam bʌ xñoptʼañob tsaʼʌch i cʼʌñʌyob taqʼuin cheʼ bʌ tsiʼ chaʼleyob subtʼan yicʼot chaʼan yan tac bʌ, pero maʼañic tsiʼ cʼajtiyob i tojol cheʼ bʌ tsiʼ melbeyob i yeʼtel Dios. Jiñi lac piʼʌlob librejob chaʼan miʼ ñaʼtañob mi yom i yʌcʼob i donación o maʼañic cheʼ bʌ miʼ jacʼob ili principio tac:

•   2  Corintios 8:12: «Mi juntiquil yom coltaya, utsʼatax miʼ qʼuejlel chuqui miʼ yʌcʼ, cheʼ jiñʌch miʼ yʌcʼ chuqui an i chaʼan i mach jiñic maʼañic bʌ i chaʼan».

   Yom bʌ i yʌl: Mi juntiquil lac piʼʌl loqʼuem ti pusicʼal chuqui miʼ yʌcʼ ñumen ñucto i cʼʌjñibal i mach jiñic bajcheʼ cʼamel miʼ yʌcʼ.

•   2  Corintios 9:7: «Jujuntiquil laʼ i mel cheʼ bajcheʼ tsiʼ ñaʼta tiʼ pusicʼal i mach cheʼic bajcheʼ mach yomic i mel o xicʼbil jach, come Dios miʼ cʼuxbin jiñi muʼ bʌ i yʌcʼ yicʼot i tijicñʌyel».

   Yom bʌ i yʌl: Dios mach yomic chaʼan xicʼbil mi yʌcʼob i donación jiñi lac piʼʌlob. Yom chaʼan miʼ yʌcʼob come cheʼʌch yomob i mel.

 Jiñi Biblia miʼ yʌl chaʼan Dios maʼañic miʼ mulan tiʼ pejtelel jiñi ñopbalʌl tac yicʼot bajcheʼ miʼ chʼujutesañob (Mateo 7:21-23). Jumpʼejl profecía am bʌ ti Biblia miʼ lajin jiñi mach bʌ i sujmic ñopbalʌl tac bajcheʼ juntiquil xʼixic muʼ bʌ i chon i bʌ. ¿Chucoch? Come miʼ temob i tʼan yicʼot jiñi yumʌlob chaʼan miʼ tajob taqʼuin yicʼot yan tac bʌ coltʌntel i miʼ ticʼlan jiñi lac piʼʌlob añoʼ bʌ ti petol pañimil (Apocalipsis 17:1-3; 18:3). Ili profecía miʼ yʌl jaʼel chaʼan Dios lʌcʼʌlix mi caj i jisan jiñi mach bʌ i sujmic ñopbalʌl (Apocalipsis 17:15-17; 18:7).

 Cheʼ bʌ muʼto caj i cʼotel i yorajlel jiñi, Dios mach yomic chaʼan muʼ bʌ i mel jiñi mach bʌ i sujmic ñopbalʌl miʼ lotin jiñi lac piʼʌlob o miʼ ñajtʼesañob tiʼ tojlel (Mateo 24:11, 12). Miʼ suben jiñi weñoʼ bʌ i pusicʼal chaʼan miʼ cʌñob bajcheʼ yom miʼ chʼujutesañob i chaʼan miʼ loqʼuelob ti jiñi mach bʌ i sujmic ñopbalʌl (2 Corintios 6:16, 17).