Ti 20 de noviembre chaʼan 2022 tsiʼ yujtesañob i tempa bʌ jiñi Naciones Unidas baqui tsiʼ tajayob ti tʼan chaʼan wolix i wen qʼuextʌyel majlel jiñi clima (COP27). Jiñi tsajñoʼ bʌ tsiʼ tempayob taqʼuin chaʼan miʼ coltañob jiñi país tac baqui miʼ mejlel ti ujtel wocol tiʼ caj jiñi clima. Pero an muʼ bʌ i yʌlob chaʼan iliyi maʼañic mi caj i tojʼesan jiñi wocol.

•   «Weñʌch mij qʼuel cheʼ bʌ miʼ tempʌntel taqʼuin chaʼan miʼ coltʌntel yaʼ baqui miʼ mejlel ti ujtel wocol […]. Pero ili mach jasʌliqui […]. Jiñi pañimil bej añʌch ti wocol» (António Guterres, secretario general chaʼan Naciones Unidas, 19 chaʼan noviembre 2022).

•   «Jiñi pañimil bej añʌch ti wocol tiʼ caj bajcheʼ woliʼ qʼuextʌyel jiñi clima» (Mary Robinson, ti wajali presidenta ti Irlanda yicʼot ñuc i yeʼtel ti ONU chaʼan Derechos Humanos, 20 chaʼan noviembre 2022).

 Jiñi xcolelob miʼ ñumen pensariñob chuqui mi caj i yujtel tiʼ tojlel jiñi Pañimil. ¿Muʼ ba caj i mejlelob ti comol eʼtel jiñi tejclum tac yicʼot i tojʼesañob ili wocol cheʼ bajcheʼ miʼ yʌlob? ¿Chuqui miʼ yʌl jiñi Biblia?

 Jiñi Biblia miʼ yʌl chaʼan maʼañic mi caj i mejlel i melob pejtelel chuqui yomob anquese miʼ chaʼleñob wersa yicʼot yomob i tojʼesañob ili wocol. La laj qʼuel chaʼchajp chucoch:

•   «Chuqui tac mach tojic mach mejlic i tojʼesʌntel» (Eclesiastés 1:15).

   Yom bʌ i yʌl. Jiñi yumʌlob maʼañic miʼ mejlel i tojʼesañob jiñi wocol tac come maʼañic tsaʼ mejliyob chaʼan miʼ chaʼleñob yumʌl (Jeremías 10:23). Anquese jiñi tejclum tac miʼ temob i bʌ, maʼañic mi caj i mejlel i tojʼesañob jiñi wocol tac.

•   «Come jiñi lac piʼʌlob mi caj i bajñel cʼuxbiñob i bʌ, mi caj i cʼuxbiñob taqʼuin […], maʼañic mi caj i mulañob i sʌclan ñʌchʼtʌlel» (2 Timoteo 3:2, 3).

   Yom bʌ i yʌl. Jiñi Biblia tsiʼ wʌn alʌ chaʼan jiñi lac piʼʌlob mi caj i bajñel ñaʼtañob i bʌ i maʼañic mi caj i mulañob comol eʼtel chaʼan i wenlel yambʌlob. I jiñʌch muʼ bʌ laj qʼuel ili ora.

 Maʼañic tiʼ cʼʌb yumʌlob chuqui mi caj i chaʼlen ili Pañimil. Dios tsaʼix i waʼchoco juntiquil wem bʌ yumʌl: Jiñʌch Jesucristo. Ili jiñʌch muʼ bʌ i yʌl jiñi Biblia tiʼ tojlel:

•   «Jiñi yumʌntel mi caj i yajñel tiʼ cʼʌb. Mi caj i cʌjñel bajcheʼ Ñuc bʌ xticʼojel, Pʼʌtʌl bʌ Dios, lac Tat tiʼ pejtelel ora yicʼot Príncipe muʼ bʌ i yʌcʼ ñʌchʼtʌlel» (Isaías 9:6, Traducción del Nuevo Mundo).

 Jesús jiñʌch rey tiʼ Yumʌntel Dios, jumpʼejl yumʌntel am bʌ ti panchan (Mateo 6:10). An i pʼʌtʌlel, i ñaʼtʌbal yicʼot yom i cʌntan jiñi Lum yicʼot jiñi chumuloʼ bʌ yaʼi (Salmo 72:12, 16). Mi caj i jisan «jiñi woli bʌ i jisañob pañimil» (Apocalipsis 11:18; Isaías 35:1, 7).

 Mi a wom a bej ñaʼtan bajcheʼ mi caj i tojʼan jiñi wocol chaʼan cambio climático, pejcan jiñi tema «¿Chuqui miʼ yʌl jiñi Biblia chaʼan jiñi cambio climático yicʼot chaʼan jiñi talto bʌ qʼuin?».