Miʼ pijtʌntel chaʼan cheʼ ti 20 de noviembre cʼʌlʌl ti 18 de diciembre chaʼan 2022 cheʼ bʌ 5 mil millón lac piʼʌlob miʼ qʼuelob jiñi mundial chaʼan fútbol. Cabʌl miʼ ñaʼtañob chaʼan jiñi mundial tac bajcheʼ ili mach cojach miʼ tem jiñi muʼ bʌ i qʼuelob.

•   «Jiñi alas miʼ mejlel i qʼuextan lac piʼʌlob, miʼ mejlel i qʼuextʌbeñob i pensar yicʼot i temob, mach cabʌlic muʼ bʌ i mejlel i mel bajcheʼ iliyi» (Nelson Mandela, expresidente chaʼan Sudáfrica).

•   «Jiñi fútbol […] miʼ yʌqʼueñonla lac pijtaya, lac tijicñʌyel, mi la cubin chaʼan mi la cʼuxbin yambʌlob yicʼot chaʼan lajalonla yicʼotob, jin chaʼan miʼ temonla» (Gianni Infantino, presidente chaʼan jiñi FIFA). a

 ¿Muʼ ba mejlel i yʌqʼueñonla jiñi fútbol o yan tac bʌ alas pejtelel ili? ¿Muʼ ba caj lac taj ñʌchʼtʌlel yicʼot juntemel mi la cajñel?

 Añʌch chuqui ujtem tiʼ caj jiñi mundial chaʼan ili jab. An i teche wocol tac tiʼ tojlel lac piʼʌlob yicʼot jiñi políticojob tiʼ caj i derechojob, chaʼan bajcheʼ yilalob yicʼot tiʼ caj taqʼuin.

 Pero cabʌl lac piʼʌlob miʼ ñaʼtañob chaʼan jiñi ñuqui alas tac muʼ bʌ i yujtel bajcheʼ jiñi mundial chaʼan fútbol mucʼʌch i jumucʼ tijicñesañonla. Anquese an lon yomoʼ bʌ chaʼan miʼ temonla tiʼ pejtelel ora, mach cheʼic miʼ yujtel, mucʼ jach i yʌcʼ ti tejchel cabʌl wocol bajcheʼ jiñi tʼox bʌ. Jiñi Biblia tsiʼ wʌn alʌ chaʼan cheʼʌch yilal miʼ cajel i melbal lac piʼʌlob «ti jiñi cojix tac bʌ qʼuin» (2 Timoteo 3:1-5).

 Jiñi Biblia miʼ yʌl chaʼan an jumpʼejl yumʌntel mucʼʌch bʌ caj i tem pejtelel lac piʼʌlob wʌʼ ti pañimil, jiñʌch «i Yumʌntel Dios» (Lucas 4:43; Mateo 6:10).

 Jesucristo, jiñi Rey waʼchocobil bʌ chaʼan jiñi Yumʌntel, mi caj i chʼʌm tilel jiñi ñʌchʼtʌlel tiʼ pejtelel pañimil. Jiñi Biblia yʌl:

•   «Mux i tajob i wenlel jini tojoʼ bʌ cheʼ woli ti yumʌl. Mux i tajob cabʌl i ñʌchʼtʌlel i pusicʼal winicob» (Salmo 72:7).

•   «Miʼ locʼsan ti wocol jini pʼumpʼun bʌ cheʼ miʼ cʼajtiben […]. Mi caj i mʌn jini ticʼlʌbiloʼ bʌ yicʼot jini chuculoʼ bʌ ti jontolil chaʼan miʼ yʌcʼob ti colel» (Salmo 72:12, 14).

 Ili ora jaʼel, jiñi i cʌntesa tac Jesús añix i teme yonlel lac piʼʌlob ti 239 país yicʼot territorio tac, i an i coltayob chaʼan miʼ cʌyob i tsʼaʼleñob i bʌ. Mi a wom a ñumen cʌn, pejcan jiñi revista am bʌ i temajlel «Miʼ mejlel ti jisʌntel jiñi tsʼaʼleya».