Ti ili 30 jab ñumen bʌ tilel, cabʌl lac piʼʌlob an i yʌlʌyob chaʼan maʼañic chuqui bʌbʌqʼuen ila ti pañimil yicʼot chaʼan woliʼ ñumen tojʼan majlel. Pero wʌle mach chʌn cheʼix miʼ ñaʼtañob come cabʌl jach chuqui woliʼ yujtel. Ili jiñʌch woli bʌ i yʌjlel ti noticia tac:

•   «Jiñi lac piʼʌlob woliyobix ti wen bʌqʼuen tiʼ caj jiñi guerra am bʌ ti Gaza come Israel wolix i tech i contrajiñob i bʌ yicʼot Hizbulá yaʼ ti frontera am bʌ ti Líbano» (Reuters, 6 de enero de 2024).

•   «Irán wolix i chaʼ tech i mel jiñi i bomba tac come yom i techben wocol jiñi país tac am bʌ ti occidente. Pero ili ora mach i bajñelix, yaʼix ochem yicʼot Rusia yicʼot China» (The New York Times, 7 de enero de 2024).

•   «Cʌlʌxix wocol yicʼot woliʼ wen chʌmel lac piʼʌlob ti Ucrania tiʼ caj jiñi guerra woli bʌ yicʼot Rusia» (UN News, 11 de enero de 2024).

•   «China wen an i taqʼuin yicʼot cʌlʌxix i soldadojob, Taiwan woliʼ tech i chañʼesan i bʌ i China yicʼot Estados Unidos mach wen temelix añob, tiʼ caj iliyi mach wocolic miʼ mejlel ti tejchel jumpʼejl wocol» (The Japan Times, 9 de enero de 2024).

 ¿Am ba chuqui miʼ yʌl jiñi Biblia chaʼan jiñi wocol tac woli bʌ i yujtel ili ora? ¿Muqʼuix ba caj i tejchel yambʌ jumpʼejl guerra mundial?

 Jiñi Biblia maʼañic tsiʼ jamʌ alʌ jiñi guerra tac am bʌ ili ora. Pero tsaʼʌch i wʌn alʌ chaʼan mucʼʌch i cajel cabʌl wocol muʼ bʌ caj «i jisan ñʌchʼtʌlel ti pañimil» (Apocalipsis 6:4).

 Jiñi libro chaʼan Daniel tsiʼ wʌn alʌ chaʼan ti jiñi cojix bʌ qʼuin, jiñi potencia mudial mi caj i contrajiñob i bʌ chaʼan miʼ qʼuejlel majqui jiñi ñumen pʼʌtʌl bʌ. I chaʼan miʼ melob iliyi miʼ chajpañob i soldadojob yicʼot miʼ cʼʌñob cabʌl taqʼuin (Daniel 11:40, 42, 43).

 Jiñi Biblia miʼ yʌl chaʼan muʼto caj i ñumen tsʌtsʼan jiñi wocol tac am bʌ ili ora. Jesús tsiʼ wʌn alʌ: «Mi caj i tilel i yorajlel cabʌl wocol. Tiʼ tejchibal pañimil cʼʌlʌl ili ora, maʼañic ujtem wocol tac bajcheʼ iliyi» (Mateo 24:21). Jiñi «cabʌl wocol» o ñuc bʌ wocol mi caj i yujtel ti jiñi guerra cʌmbil bʌ bajcheʼ Armagedón, ili jiñʌch «jiñi guerra chaʼan bʌ jiñi ñuc bʌ i qʼuiñilel Dios, jiñi Mach bʌ añic i pʼisol i pʼʌtʌlel» (Apocalipsis 16:14, 16).

 Pero jiñi Armagedón mi caj i coltan jiñi lac piʼʌlob, mach chaʼañic miʼ jisañob. Ti jiñi guerra, Dios mi caj i jisan jiñi yumʌlob ti pañimil come tiʼ mulobʌch cheʼ wen an guerra tac. Mi a wom a ñumen cʌn bajcheʼ mi caj i chʼʌm tilel ñʌchʼtʌlel jiñi Armagedón, pejcan jiñi artículo tac:

•   «¿Chuquiyes jiñi Armagedón?»

•   «Weñʌch cheʼ tal Armagedón»