Ti julio ti 2022 tsaʼ wen ujti julbʌl tac tiʼ petol pañimil:

•    «Cheʼ bʌ tsaʼ tsʌnsʌnti jiñi político ñumen cʌmbil bʌ chʼoyol bʌ ti Japón [Shinzo Abe, jiñi primer ministro bʌ ti wajali] tsaʼ toj sajti i pusicʼal jiñi chumuloʼ bʌ yaʼi yicʼot tiʼ petol Pañimil, i ñumento come yaʼ ti país mach cʌlʌxic jontolil yicʼot an tsʌts tac bʌ ley chaʼan jiñi juloñib tac» (10 chaʼan julio, 2022, The Japan Times).

•    «Juntiquil wiñic am bʌ i juloñib tsiʼ yotsʌbe i bʌqʼuen jiñi añoʼ bʌ ti Dinamarca cheʼ bʌ tiʼ tsʌnsa uxtiquil lac piʼʌlob ti jumpʼejl centro comercial ti Copenhague» (4 chaʼan julio, 2022, Reuters).

•    «Sudáfrica: Chaʼtiqui uxtiquil wiñicob tsiʼ techeyob julbʌl ti jumpʼejl bar ti Soweto i tiʼ tsʌnsayob 15 lac piʼʌlob» (10 chaʼan julio, 2022, The Guardian).

•    «Ñumen ti 220 lac piʼʌlob tsaʼ chʌmiyob tiʼ caj jiñi julbʌl tsaʼ bʌ ujti ti Estados Unidos cheʼ bʌ tsaʼ mejli jiñi qʼuiñijel chaʼan 4 de julio» (5 chaʼan julio, 2022, CBS News).

 ¿Muʼ ba i mejlel lac pijtan chaʼan mi caj i jilel pejtelel ili jontolil? ¿Chuqui miʼ yʌl jiñi Biblia?

 Jiñi Biblia miʼ yʌl chaʼan chumuloñixla ti «jiñi cojix tac bʌ qʼuin», baqui cabʌl lac piʼʌlob wen jontol miʼ melob i bʌ (2 Timoteo 3:1, 3). Cheʼ bʌ jontol miʼ melob i bʌ, miʼ yotsʌbeñob i bʌqʼuen jiñi lac piʼʌlob (Lucas 21:11). Pero jiñi Biblia miʼ yʌl chaʼan mi caj i jilel jiñi jontolil, i jiñi lac piʼʌlob «xucʼul mi caj i chumtʌlob [...]. Xucʼul i yotot. Maʼanic majqui mi caj i contrajiñob» (Isaías 32:18). ¿Bajcheʼ mi caj i jilel jiñi jontolil?

 Dios mi caj i jisan jiñi jontoloʼ bʌ yicʼot jiñi juloñib tac.

•    «Mach cheʼic jini xmulilob. Mi caj i chojquelob loqʼuel tiʼ lumal» (Proverbios 2:22).

•    «[Dios] miʼ yujtesan guerra cʼʌlʌl tiʼ pejtelel pañimil. Miʼ bicʼti cʼʌs jini jalʌjb, miʼ cʼʌs jini lanza. Miʼ pulbeñob i carreta tac muʼ bʌ i cʼʌñob ti guerra» (Salmo 46:9).

 Dios mi caj i cʌntesan lac piʼʌlob chaʼan miʼ chumtʌlob ti ñʌchʼtʌlel, i cheʼ bajcheʼ jiñi mi caj i jisan jiñi jontolil.

•    «Yaʼ ti chʼujul bʌ wits c chaʼan maʼanix chuqui miʼ lojwel, maʼanix chuqui miʼ yʌcʼ ti asiyel. Cheʼ bajcheʼ miʼ bujtʼel i chʼeñal lum ti jaʼ lajal mi caj i bujtʼel pañimil ti winicob xʼixicob muʼ bʌ i cʌñob lac Yum» (Isaías 11:9).

•    Ili ora, Dios miʼ cʌntesan jiñi lac piʼʌlob tiʼ petol Pañimil chaʼan mach yomic jontolob, mach yomic miʼ cʼʌñob juloñib tac yicʼot chaʼan miʼ «sutqʼuiñob i yespada ti azadón. Jini puñal am bʌ i cʼʌjñibal ti guerra [...] ti tsepoʼ trigo» (Miqueas 4:3).

 Mi a wom a ñumen cʌn chuqui miʼ yʌl jiñi Biblia chaʼan jiñi pañimil baqui maʼañix chuqui mi caj lac bʌcʼñan, pejcan jiñi tema «¿Es posible librarse del miedo?».

 Mi a wom a ñumen ñaʼtan bajcheʼ mi caj i jilel jiñi jontolil, pejcan jiñi tema «¡Por fin paz en la Tierra!».