¡YOM CHɅN YɅXɅL LA CO!

Jiñi políticojob wolix i bʌcʼñañob chaʼan miʼ tejchel Armagedón | ¿Chuqui miʼ yʌl jiñi Biblia?

JAMΛ TI

Ti lunes 10 de octubre chaʼan 2022 cheʼ ti sʌcʼan, Rusia tsiʼ choco majlel yaʼ ti Ucrania cabʌl bomba chaʼan miʼ tojmel. Cheʼʌch tsiʼ mele come Ucrania tsiʼ ñaxan choco majlel jiñi bomba colel bʌ i jem jiñi puente am bʌ ti Crimea muʼ bʌ i cʼotel ti Rusia. Cheʼ bʌ maxto ujt ili, an políticojob tsaʼ bʌ i wʌn subuyob chaʼan miʼ mejlel ti tejchel Armagedón.

«Cʼʌlʌl cheʼ tiʼ yorajlel Kennedy [presidente chaʼan Estados Unidos] yicʼot cheʼ bʌ tsaʼ ujti jiñi wocol yaʼ ti Cuba, maxto ñumen lʌcʼʌlic jiñi Armagedón cheʼ bajcheʼ ili ora. [...] Chaʼan miʼ tejchel jiñi Armagedón wersajʌch miʼ cʼʌjñel jiñi bomba tac» (Joe Biden, presidente chaʼan Estados Unidos, 6 chaʼan octubre, 2022).
«Mi cʌl jiñʌchix Armagedón; jumpʼejlʌch wocol chaʼan ili Lum» (cheʼ tsiʼ yʌlʌ Volodímir Zelenski, presidente chaʼan Ucrania, cheʼ bʌ tsaʼ cʼajtibenti baqui bʌ i wocolel miʼ yujtel cheʼ bʌ miʼ cʼʌjñel jiñi bomba tac, BBC News, 8 chaʼan octubre, 2022).

Cheʼ bʌ miʼ cʼʌjñel bomba tac, ¿jimba muʼ bʌ caj i yʌcʼ ti tejchel Armagedón? ¿Chuqui miʼ yʌl jiñi Biblia?

¿Jimba mi caj i tech Armagedón cheʼ miʼ cʼʌjñel bomba tac?

Maʼañic. Jiñi tʼan Armagedón mucʼ jach i tilel junyaj yaʼ ti Biblia, ti Apocalipsis 16:16. Maʼañic woliʼ taj ti tʼan jiñi guerra muʼ bʌ i mel jiñi tejclum yicʼot yambʌ tejclum, woli bʌ i taj ti tʼan jiñʌch i guerra Dios yicʼot «jiñi reyob tiʼ petol pañimil» (Apocalipsis 16:14). Dios mi caj i cʼʌn jiñi Armagedón chaʼan miʼ jisan pejtelel jiñi yumʌlob añoʼ bʌ ila ti Pañimil (Daniel 2:44).

Chaʼan maʼ ñumen cʌn chuqui mi caj i yujtel ila ti Pañimil ti Armagedón, pejcan jiñi tema «¿Chuquiyes jiñi Armagedón?».

¿Tiʼ caj ba jumpʼejl guerra mi caj i jisʌntel ili Lum yicʼot jiñi quixtañujob?

Maʼañic. Tajol jiñi yumʌlob mucʼʌch caj i cʼʌñob jiñi bomba tac, pero Dios maʼañic mi caj i yʌcʼ chaʼan miʼ jisʌntel ili Lum. Jiñi Biblia miʼ yʌl:

«Jini lum an tiʼ pejtelel ora» (Eclesiastés 1:4).
«Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:29).

Jiñi profecía tac am bʌ ti Biblia yicʼot chuqui tac woliʼ yujtel ili ora miʼ pʌsbeñonla chaʼan añonla ti cojix bʌ qʼuin (Mateo 24:3-7; 2 Timoteo 3:1-5). Qʼuele chuqui miʼ yʌl jiñi Biblia chaʼan jiñi talto bʌ qʼuin i chʼʌmʌ jumpʼejl estudio loqʼuem bʌ ti Biblia mach bʌ tojbilic.