Yaʼ ti Evangelio tac miʼ taj ti tʼan juntiquil wiñic i cʼabaʼ Juan jiñi Xʼacʼ chʼʌmjaʼ. Tsiʼ chaʼle subtʼan yaʼ ti Judea. ¿Chuqui miʼ yʌl jiñi historiadorob chaʼan muʼ bʌ i yʌl jiñi Biblia tiʼ tojlel ili wiñic? Ñaʼtan iliyi:

•   Jiñi Biblia miʼ yʌl: «Juan jiñi Xʼacʼ chʼʌmjaʼ tsaʼ caji ti subtʼan yaʼ tiʼ tiquiñal lum am bʌ ti Judea›. Tsiʼ yʌlʌ: ‹Chaʼ ñaʼtañix laʼ bʌ come tsaʼix lʌcʼtiyi jiñi i Yumʌntel panchan›» (Mateo 3:1, 2). ¿Am ba yambʌ libro tac muʼ bʌ i taj ti tʼan iliyi? Añʌch.

   Flavio Josefo, yujil bʌ chaʼan historia ti ñaxam bʌ siglo, tsiʼ taja ti tʼan juntiquil wiñic i cʼabaʼ Juan cʌmbil bʌ bajcheʼ xʼacʼ chʼʌmjaʼ, tiʼ sube jiñi judíojob «chaʼan wen bajcheʼ yom miʼ qʼuelob i bʌ yicʼot wen miʼ chʼujutesañob Dios i miʼ majlelob ti chʼʌmjaʼ» (Antigüedades judías, libro XVIII).

•   Jiñi Biblia miʼ yʌl chaʼan Juan tsiʼ tiqʼui Herodes Antipas, juntiquil yumʌl am bʌ yaʼ ti Galilea yicʼot Perea. Herodes tsiʼ yʌlʌ chaʼan juntiquilʌch judío i miʼ tsʼʌctesan i Mandar tsaʼ bʌ aqʼuenti Moisés. Juan tiʼ sube chaʼan mach weñic cheʼ tsaʼ ñujpuñi yicʼot Herodías, i yijñam jiñi i yeran (Marcos 6:18). Yan tac bʌ libro miʼ taj ti tʼan jaʼel iliyi.

   Jiñi historiador Josefo tsiʼ yʌlʌ chaʼan Antipas «tsiʼ mulaj Herodías» i «tsiʼ cʼajtibe chaʼan miʼ ñujpuñel yicʼot». Herodías tsiʼ jacʼʌ i tsaʼ ñujpuñi yicʼot.

•   Jiñi Biblia miʼ yʌl chaʼan «jiñi chʼoyoloʼ bʌ ti Jerusalén, ti Judea yicʼot yaʼ ti jiñi tejclum tac am bʌ tiʼ joytilel Jordán tsaʼ majli i qʼuelob. Juan tsiʼ yʌcʼʌ chʼʌmjaʼ yaʼ ti Jordán jaʼ» (Mateo 3:5, 6).

   Josefo miʼ taj ti tʼan jaʼel iliyi. Miʼ yʌl chaʼan «jiñi quixtañujob» tsaʼ majli i qʼuelob Juan i «wen tijicña miʼ yubiñob cheʼ bʌ miʼ ñʌchʼtʌbeñob i tʼan».

 Tsiquil chaʼan jiñi historiador ti ñaxam bʌ siglo Flavio Josefo, yujil chaʼan Juan jiñi Xʼacʼ chʼʌmjaʼ tsaʼʌch chumle ila ti pañimil. Joñonla jaʼel mucʼʌch i mejlel lac ñop chaʼan cheʼʌchi.