Cheʼ ti 24 chaʼan febrero ti 2022, jiñi soldadojob chaʼan bʌ Rusia tsaʼ ochiyob ti Ucrania. Jiñi tsiʼ yʌcʼʌ ti pʼojlel cabʌl wocol i yonlel lac piʼʌlob woli i putsʼelob loqʼuel yaʼi. a

 «Tsaʼ caji ti tojmel bomba tac. Tsaʼ c wen chaʼle bʌqʼuen. Cheʼ bʌ tsaʼ cubi lojon chaʼan woli i locʼsʌntelob ti tren jiñi lac piʼʌlob, tsaʼ majliyon lojon jaʼel. Jumpʼejl jach alʌ mochila mi mejlel lon chʼʌm majlel baqui yom mi lon cotsan pejtelel jiñi i cʼʌjñibal bʌ lon chaʼan. Tsaʼ jach mejli lon cotsan jaʼ, tsʼac tac, jiñi lon c jun tac yicʼot tsʼitaʼ i bʌl lon c ñʌcʼ. I cheʼ bʌ woli i jubel jiñi bomba tac, tsaʼ lon j cʌyʌ pejtelel lon c chubʌʼan i tsaʼ majliyon lojon baqui an jiñi tren» (Natalia, chʼoyol bʌ ti Járkov, Ucrania).

 «Maʼañic tsaʼ lon c wis ñaʼta mi mucʼʌch i ñoj cajel jiñi guerra. Tsaʼ caji cubin ti tojmel jiñi bomba tac i muʼto i ñijcan tac i bʌ jiñi ventana. Tsaʼ c ñaʼta loqʼuel, i jin jach tsaʼ c chʼʌmʌ majlel jiñi i cʼʌjñibal bʌ c chaʼan. Las 8 de la mañana tsaʼ loqʼuiyon ti cotot i tsaʼ letsiyon ti tren chaʼan mic majlel ti Lviv i cheʼ jiñi tsaʼ c chʼʌmʌ autobús chaʼan mic majlel ti Polonia» (Nadia, chʼoyol bʌ ti Járkov).

Ti ili tema mi caj laj qʼuel ili cʼajtiya tac

•  ¿Chucoch cabʌl xputsʼelob?

•  ¿Baqui miʼ mejlel i tajob i pijtaya?

•  ¿Muʼ ba mejlel i coltañob jiñi Biblia?

 ¿Chucoch cabʌl xputsʼelob?

 Anquese ili wocol ti Ucrania tsaʼ tejchi tiʼ caj tsaʼ ochi Rusia, jiñi Biblia miʼ ñumen tsictesʌbeñonla chucoch an ili wocol.

•   Jiñi yumʌlob maʼañic miʼ mejlel i yʌqʼuen chuqui i cʼʌjñibal i chaʼañob jiñi lac piʼʌlob. Mucʼ jach i cʼʌñob i pʼʌtʌlel chaʼan miʼ ticʼlañob (Eclesiastés 4:1; 8:9).

•   Satanás, jiñi Diablo, «jiñi yumʌl chaʼan ili pañimil» cabʌl mach bʌ weñic woli i mel ti pañimil. Jin chaʼan, jiñi Biblia miʼ yʌl: «Jiñi pañimil an tiʼ pʼʌtʌlel Satanás» (Juan 14:30; 1 Juan 5:19).

•   Cheʼ jaʼel, anquese añix wocol tac cʼʌlʌl ti wajali, ili ora chumuloñixla cheʼ bajcheʼ tsiʼ yʌlʌ jiñi Biblia. 2 Timoteo 3:1 miʼ yʌl: «Ti jiñi cojix tac bʌ qʼuin wen wocol miʼ cajel yicʼot bʌbʌqʼuen». I ti jiñi cojix tac bʌ qʼuin miʼ cajel guerra, wiʼñal, cʼamʌjel, yujquel lum o yan tac bʌ. Jiñi lac piʼʌlob mi caj i putsʼelob loqʼuel yaʼ baqui chumulob (Lucas 21:10, 11).

 ¿Baqui miʼ mejlel i tajob i pijtaya?

 Jiñi Biblia miʼ yʌl chaʼan Jehová, b jiñi tsaʼ bʌ i meleyonla, mucʼʌch i cʼuxbin yicʼot miʼ pʼuntan jiñi xputsʼelob yicʼot pejtelel jiñi am bʌ i cʌyʌyob i yotot (Deuteronomio 10:18). Miʼ yʌl chaʼan mi caj i jisan jiñi wocol tac muʼ bʌ i ñusañob jiñi xputsʼelob. ¿Bajcheʼ? Mi caj i cʼʌn jiñi i Yumʌntel am bʌ ti panchan muʼ bʌ caj i yochel tiʼ qʼuexol pejtelel jiñi yumʌntel (Daniel 2:44; Mateo 6:10). Mi caj i cʼʌn jiñi i Yumʌntel chaʼan miʼ jisan jiñi Satanás, jiñi Diablo (Romanos 16:20). Ili Yumʌntel mi caj i mel i yeʼtel tiʼ pejtelel pañimil i maʼañix miʼ cajel tʼox bʌ. Pejtelel jiñi lac piʼʌlob mi caj i sujtelob bajcheʼ jumpʼejl familia juntemeloʼ bʌ. Maʼañix majqui mi caj i putsʼel loqʼuel tiʼ yotot, come jiñi Biblia miʼ yʌl: «Jujuntiquil mi caj i yajñel tiʼ yotot tiʼ ñʌchʼtʌlel i pusicʼal. Maʼanic majch mi caj i bʌcʼtesan, come cheʼʌch tsiʼ yʌcʼʌ i tʼan i Yum Panchan yicʼot Pañimil (Miqueas 4:4).

 Cojach jiñi i Yumʌntel Dios miʼ mejlel i tojʼesan jiñi wocol tac chaʼan maʼañix majqui miʼ putsʼelob. Jehová mi caj i cʼʌn jiñi i Yumʌntel chaʼan miʼ jisan jiñi wocol tac muʼ bʌ i yʌqʼuen i cʌy i yotot jiñi lac piʼʌlob. Laʼ laj qʼuel chaʼpʼej uxpʼejl ejemplo:

•   Guerra tac. «[Jehová] miʼ yujtesan guerra» (Salmo 46:9). Chaʼan maʼ ñaʼtan bajcheʼ mi caj i mel, qʼuele jiñi tema «¿Cómo llegará a haber paz en la Tierra?»

•   Ticʼlʌntel yicʼot jontolil. «[Jehová] mi caj i mʌn jini ticʼlʌbiloʼ bʌ yicʼot jini chuculoʼ bʌ ti jontolil chaʼan miʼ yʌcʼob ti colel» (Salmo 72:14). Chaʼan maʼ ñaʼtan bajcheʼ miʼ mejlel i qʼuextañob jiñi mach bʌ weñic i melbal jiñi lac piʼʌlob, qʼuele jiñi tema tac muʼ bʌ i tilel ti jiñi revista «Miʼ mejlel ti jisʌntel jiñi tsʼaʼleya».

•   Pʼumpʼuñiyel. «[Jehová] miʼ locʼsan ti wocol jini pʼumpʼun bʌ cheʼ miʼ cʼajtiben» (Salmo 72:12). Chaʼan maʼ qʼuel bajcheʼ Dios mi caj i jisan jiñi muʼ tac bʌ i yʌcʼ pʼumpʼuñiyel, pejcan jiñi tema «¿Es realista esperar un sistema económico justo?».

•   Wiʼñal. «Mi caj i yʌcʼ cabʌl i cuch jini cholel» (Salmo 72:16). Chaʼan maʼ ñaʼtan chuqui mi caj i mel Dios chaʼan maʼañix majqui miʼ ñusan wiʼñal, pejcan jiñi tema «¿Un mundo sin hambre?».

 ¿Muʼ ba mejlel i coltañob jiñi Biblia?

 Mucʼʌch. Mach muqʼuic jach i yʌqʼueñob i pijtaya, miʼ yʌqʼueñob wem bʌ ticʼojel jaʼel chaʼan miʼ lʌtʼob jiñi wocol tac muʼ bʌ i ñusañob ili ora.

 Texto: «Maʼañic chuqui yom mi laʼ wis cʼojoʼtan. Mach yʌlʌyic chuqui mi laʼ ñusan, aqʼuenla i ñaʼtan Dios ti oración, pejcanla ti wocol tʼan ti jumpʼejl laʼ pusicʼal yicʼot aqʼuenla wocolix i yʌlʌ, i jiñi i ñʌchʼtʌlel Dios, maʼañic bʌ miʼ mejlel i chʼʌmben i sujm mi juntiquilic lac piʼʌl, mi caj i cʌntan laʼ pusicʼal yicʼot laʼ ñaʼtʌbal» (Filipenses 4:6, 7).

 Yom bʌ i yʌl: Mach yʌlʌyic jiñi wocol woli bʌ a ñusan, cʼajtiben Dios chaʼan miʼ ñʌchʼchocon a pusicʼal yicʼot a ñaʼtʌbal. Pejcan jiñi tema «Filipenses 4:6, 7 | ‹No se inquieten por nada›».