¿Chuqui miʼ tilel ti a jol cheʼ bʌ maʼ ñaʼtan juntiquil lac piʼʌl woli bʌ ti cʌlʌx pensar? a Tajol maʼ ñaʼtan juntiquil wen woli bʌ ti bʌqʼuen, juntiquil wocol bʌ miʼ yubin chaʼan miʼ tejchel tiʼ wʌyib ti sʌcʼan o juntiquil lac piʼʌl muʼ bʌ i ñusan jumpʼejl qʼuin i yʌl chuqui tac miʼ pensarin.

 I sujmʌch chaʼan an lac piʼʌlob cheʼ bʌ miʼ melob bajcheʼ jiñi cheʼ bʌ woliyob ti cʌlʌx pensar. Pero jiñi expertojob an i qʼueleyob chaʼan yambʌ lac piʼʌlob, ñumento jiñi wiñicob, qʼuexelʌch bajcheʼ miʼ melob cheʼ bʌ woliyob ti cʌlʌx pensar. Jumpʼejl artículo miʼ yʌl chaʼan jiñi wiñicob «jiñʌch miʼ ñumen cʼʌñob jiñi lembal, tsʼac o droga chaʼan maʼañic miʼ cʌlʌx chaʼleñob pensar. Jin chaʼan, miʼ an majqui woliʼ wem jap lembal tajol woli ti cʌlʌx pensar. Jiñi wiñicob miʼ ñumen pʌsob chaʼan woliyob ti cʌlʌx pensar, cheʼ bʌ mach wem yomic chaʼan miʼ pejcʌntelob yicʼot cheʼ bʌ michʼicñayob».

 I sujmʌch chaʼan jiñi wiñicob qʼuexelʌch bajcheʼ miʼ mejlel i yubiñob i bʌ cheʼ bʌ woliyob ti cʌlʌx pensar. Pero jiñi cʌlʌx pensar jiñʌch woli bʌ i ticʼlan cabʌl lac piʼʌlob ti ili cojix tac bʌ qʼuin wen wocol bʌ yicʼot bʌbʌqʼuen bʌ (2 Timoteo 3:1). Mi jatet an a wocol chaʼan cʌlʌx pensar, ¿muʼ ba mejlel i coltañet jiñi Biblia?

 Jiñi Biblia miʼ yʌcʼ wen tac bʌ ticʼojel cheʼ mucʼonla ti cʌlʌx pensar. Laʼ laj qʼuel uxpʼejl ejemplo:

1.  1. «Mach laʼ cʼojoʼtan chuqui mi caj i yujtel ijcʼʌl come yambʌyix chuqui mi caj laʼ cʼojoʼtan. Jasʌl jach jiñi wocol tac am bʌ ti jujumpʼejl qʼuin» (Mateo 6:34).

    Yom bʌ i yʌl: Ñumen wen cheʼ bʌ maʼañic mi laj cʌlʌx ñaʼtan jiñi muʼ tac i mejlel ti ujtel. An i tajol, jiñi muʼ bʌ lac bʌcʼñan mach jiñic miʼ yujtel. An i tajol miʼ yʌcʼ ti toj sajtel lac pusicʼal chuqui tac miʼ yujtel i weñʌch miʼ loqʼuel.

    Miʼ mejlel a mel iliyi: Ñaʼtancu jiñi tsaʼ bʌ a ñusa i tsaʼ poj ñaʼta chaʼan mach weñic mi caj i loqʼuel i ti wiʼil mach cheʼic tsaʼ ujti. Cheʼ jiñi, wen qʼuele chuqui maʼ wen pensarin ti ili ora. Wen ñaʼtan i cʼajtiben a bʌ: «¿Mucʼʌch ba i mejlel ti sujtel ti jumpʼejl ñuc bʌ wocol?».

2.  2. «Cheʼ bajcheʼ mi laj cʼʌn rima chaʼan mi lac jayʼesan machit, cheʼ jaʼel mi lac sajcan lac piʼʌlob chaʼan miʼ ñucʼan lac pusicʼal» (Proverbios 27:17).

    Yom bʌ i yʌl: Jiñi lac piʼʌlob miʼ mejlel i coltañoñobla chaʼan miʼ lac mʌlben jiñi cʌlʌx pensar miʼ mucʼʌch la cʌcʼ lac bʌ ti coltʌntel. Miʼ mejlel i yʌqʼueñoñobla wen tac bʌ ticʼojel chaʼan jiñi am bʌ i ñusayob. Tajol mucʼʌch caj i tsʼitaʼ coltañoñobla chaʼan yambʌyʌch bajcheʼ mi laj qʼuel jiñi lac wocol.

    Miʼ mejlel a mel iliyi: Ñaʼtan majqui miʼ mejlel i yʌqʼueñet ticʼojel, jumpʼejl ejemplo juntiquil amigo tsaʼ bʌ i ñusa jiñi wocol lʌcʼʌ lajal bʌ bajcheʼ a chaʼan. Cʼajtiben chuqui tac tsiʼ colta yicʼot chuqui maʼañic bʌ.

3.  3. Acʼʌla «pejtelel chuqui mi laʼ cʼojoʼtan tiʼ tojlel, come Dios mucʼʌch i ñaʼtañetla» (1 Pedro 5:7).

    Yom bʌ i yʌl: Dios cʼux miʼ yubin cheʼ mi lac ñusan wocol. Miʼ subeñonla chaʼan mi lac jamben lac pusicʼal yicʼot chaʼan mi lac laj suben pejtelel chuqui mi lac pensarin.

    Miʼ mejlel a mel iliyi: Mele jumpʼejl lista chaʼan pejtelel chuqui maʼ pensarin. Cheʼ jiñi, suben Dios jujumpʼejl i cʼajtiben chaʼan miʼ coltañet a ñaʼtan chuqui yom maʼ mel.

 Jiñi Biblia mach cojach miʼ yʌcʼ wen tac bʌ ticʼojel chaʼan jiñi cʌlʌx pensar, miʼ subeñonla jaʼel chaʼan lʌcʼʌlix mi caj i jilel pejtelel chuqui mi lac pensarin ili ora. ¿Bajcheʼ?

 Jiñi i Yumʌntel Dios mi caj i jisan pejtelel muʼ bʌ i yʌcʼonla ti cʌlʌx pensar (Apocalipsis 21:4). Cheʼ bʌ jiñi yumʌntel miʼ chʼʌm tiʼ wenta jiñi lum, maʼañix mi caj lac cʼajtesan jiñi tsaʼ bʌ i yʌcʼʌyonla ti cʌlʌx pensar (Isaías 65:17).

 Jiñʌch jiñi pijtaya yom bʌ i yʌqʼueñonla «jiñi Dios muʼ bʌ i yʌcʼ ñʌchʼtʌlel» (Romanos 16:20). Qʼuele chuqui miʼ subeñonla: «Cujil chuqui com c melbeñetla, [...]. Com ñʌchʼʌletla. Mach comic miʼ tajetla wocol. Com cʌqʼueñetla chuqui utsʼat woli bʌ laʼ pijtan» (Jeremías 29:11).