Jiñi wocol ti Ucrania an i pʌsʌ chaʼan jiñi añoʼ bʌ i yeʼtel ti ñopbalʌl miʼ coltañob jiñi guerra. Qʼuele bajcheʼ an i coltayob jiñi wocol:

•    «La com laj qʼuelob ti ñuc yicʼot la cʌqʼueñob wocolix i yʌlʌ jiñi lac wiñicob ti Ucrania woli bʌ i coltañob tiʼ contrajob […]. Maʼañic mi caj laj cʌyob, mi caj lac tajob ti la coración yicʼot mi caj laj coltañob» (metropolitano Epifanio I ti Kiev, The Jerusalem Post, 16 chaʼan marzo, 2022).

•    «Ti ili domingo, jiñi am bʌ tiʼ wenta jiñi Iglesia ortodoxa ti Rusia tsiʼ yʌqʼue jumpʼejl misa jiñi soldadojob ti Rusia chaʼan miʼ subeñob chaʼan miʼ coltañob i país ‹cheʼ bajcheʼ yujilob melol jiñi rusojob›. I Moscú wolʌch i bej sʌclan guerra ti Ucrania» (Reuters, 3 chaʼan abril, 2022).

 ¿Yom ba miʼ majlelob ti guerra jiñi xñoptʼañob? ¿Chuqui miʼ yʌl jiñi Biblia?

 Jiñi Biblia miʼ yʌl chaʼan jiñi i sujm bʌ xñoptʼañob i chaʼan Jesucristo maʼañic miʼ yotsañob i bʌ ti guerra.

•    «Loto jiñi a wespada come pejtelel muʼ bʌ i cʼʌñob jiñi espada mi caj i tsʌnsʌntelob ti espada» (Mateo 26:52).

   Mi juntiquil lac piʼʌl miʼ yotsan i bʌ ti guerra o weñʌch miʼ qʼuel, ¿wolʌch ba i jacʼ tsaʼ bʌ i yʌlʌ Jesús?

•    «Mi cʌqʼueñetla jumpʼejl tsijiʼ bʌ mandar: Chaʼan mi laʼ cʼuxbin laʼ bʌ. Cheʼ bajcheʼ tsaʼ j cʼuxbiyetla, cheʼʌch yom mi laʼ cʼuxbin laʼ bʌ ti jujuntiquil. Cheʼ bajcheʼ iliyi tiʼ pejtelelob mi caj i ñaʼtañob chaʼan xcʌntʼañetla c chaʼan: Mi mucʼʌch laʼ cʼuxbin laʼ bʌ» (Juan 13:34, 35).

   Mi juntiquil lac piʼʌl miʼ yotsan i bʌ ti guerra, ¿wolʌch ba i pʌs jiñi cʼuxbiya tsaʼ bʌ i yʌlʌ Jesús chaʼan mi caj i yʌcʼ ti cʌjñel jiñi xcʌntʼañob i chaʼan?

 Mi a wom a ñumen cʌn, pejcan jiñi tema «El cristianismo y la guerra: ¿son compatibles?».

 ¿Mucʼʌch ba i mejlel lac pijtan chaʼan jiñi xñoptʼañob maʼañic miʼ yotsañob i bʌ ti jiñi guerra tac ili ora? Mucʼʌch. Jiñi Biblia tsiʼ wʌn alʌ chaʼan ili ora muʼ bʌ i subentel bajcheʼ «jiñi cojix tac bʌ qʼuin» cabʌlob chʼoyoloʼ bʌ ti yambʌ tejclum tac «maʼanix mi caj i chʌn ñopob guerra», cheʼ bajcheʼ tsiʼ pʌsʌ Jesús (Isaías 2:2, 4).

•     Chaʼan maʼ ñumen cʌn, pejcan jiñi tema tac am bʌ ti Lac Tsictesʌbentel «¿Bajcheʼ yilal miʼ qʼuel Dios jiñi guerra tac?».

 Tsʼitaʼ jachix yom chaʼan Jehová, a «jiñi Dios chaʼan bʌ ñʌchʼtʌlel», mi cʼʌn i yumʌntel chaʼan miʼ coltañob «jini ticʼlʌbiloʼ bʌ yicʼot jini chuculoʼ bʌ ti jontolil» (Filipenses 4:9; Salmo 72:14).

•    Qʼuele jiñi video ¿Chuqui jiñi i Yumʌntel Dios? chaʼan maʼ ñaʼtan bajcheʼ mi caj i mel.