Tiʼ petol pañimil, cabʌl lac piʼʌlob muʼ bʌ i poj alob chaʼan miʼ tsajcañob Jesús, pero miʼ wen otsañob i bʌ ti política. An añoʼ bʌ i yeʼtel ti ñopbalʌl muʼ bʌ i coltañob juntiquil candidato o jumpʼejl partido político chaʼan jach yom i pʌsob chuqui wen tac bʌ miʼ melob. Cheʼ jaʼel, jiñi políticojob añʌch chuqui miʼ melob chaʼan miʼ coltʌntelob ti jiñi ñopbalʌl. An i tajol jiñi candidato jiñʌch juntiquil am bʌ i yeʼtel yaʼ ti iglesia. An país tac baqui jiñi ñopbalʌl jin an tiʼ wenta jiñi yumʌlob.

 Pero, ¿chuqui maʼ ñaʼtan jatet? ¿Yom ba miʼ yotsañob i bʌ ti política jiñi xcʌntʼañoʼ bʌ i chaʼan Jesús? ¿Chuqui tsiʼ mele Jesús? Tsiʼ yʌlʌ: «Joñon tsaʼix c pʌsbeyetla chaʼan cheʼʌch mi laʼ mel cheʼ bajcheʼ tsaʼ c melbeyetla» (Juan 13:15). Laʼ laj qʼuel chuqui ti ejemplo tsiʼ yʌcʼʌ Jesús chaʼan jiñi política.

 Maʼañic. Jesús maʼañic tsiʼ wis otsa i bʌ ti política.

 Jesús maʼañic tsiʼ sʌcla i yeʼtel ti política. Cheʼ bʌ jiñi Diablo tsiʼ sube chaʼan mi caj i yʌqʼuen «pejtelel i yumʌntel yicʼot i ñuclel pañimil», Jesús maʼañic tsiʼ jacʼʌ (Mateo 4:8-10).  a Ti jumpʼejl bʌ qʼuin, jiñi lac piʼʌlob tsiʼ qʼueleyob chaʼan Jesús miʼ mejlel ti sujtel ti juntiquil wem bʌ yumʌl, i tsiʼ ñopo i xicʼob chaʼan miʼ yotsan i bʌ ti política. Pero Jesús «yujil chaʼan muqʼuix caj i tilelob chaʼan miʼ wersa pʌyob majlel i miʼ sujtesañob ti rey, tsaʼ chaʼ majli ti wits, i bajñel tsaʼ majli» (Juan 6:15). Jesús maʼañic tsiʼ mele tsaʼ bʌ xijqʼui i mel, maʼañic ba ora tsiʼ yotsa i bʌ ti política.

 Jesús maʼañic tsiʼ colta tiʼ tʼan jiñi política. Jumpʼejl ejemplo, jiñi judíojob mach yomobic i yʌqʼueñob tojoñel jiñi romanojob. I cheʼ jaʼel, miʼ qʼuelob chaʼan mach weñic muʼ bʌ i melob. Pero cheʼ bʌ tsiʼ subeyob Jesús chaʼan miʼ lajibeñob i ñaʼtʌbal, maʼañic tsiʼ jacʼʌ. Tsaʼ jach i yʌlʌ: «Aqʼuenla César i chaʼan bʌ César, pero jiñi i chaʼan bʌ Dios aqʼuenla Dios» (Marcos 12:13-17). Jesús maʼañic tsiʼ yotsa i bʌ ti política, pero tsaʼʌch i yʌcʼʌ ti ñaʼtʌntel chaʼan yomʌch miʼ yʌqʼuentelob tojoñel jiñi añoʼ bʌ i yeʼtel yaʼ ti Roma. Pero añʌch baqui jaxʌl yom miʼ jacʼbeñob i tʼan jiñi yumʌlob. Maʼañic majqui yom miʼ chʼujutesʌntel, cojach Dios yom miʼ melbentel (Mateo 4:10; 22:37, 38).

 Jesús tsiʼ subu ñumel jiñi i Yumʌntel Dios, jumpʼejl yumʌl am bʌ ti panchan (Lucas 4:43). Jesús maʼañic tsiʼ yotsa i bʌ ti política come yujil chaʼan jiñi wiñicob mach mejlic i tojʼesañob ili pañimil cheʼ bajcheʼ yom Dios. Cojach jiñi i Yumʌntel Dios muʼ bʌ caj i mejlel i mel iliyi (Mateo 6:10). Cheʼ jaʼel, yujil chaʼan Dios maʼañic mi caj i cʼʌn jiñi yumʌlob añoʼ bʌ ila ti pañimil come yujil chaʼan mi caj i jisañob (Daniel 2:44).

 Maʼañic. Jiñi xñoptʼañoʼ bʌ i chaʼan Jesús tsiʼ jacʼʌyob ili mandar chaʼan maʼañic miʼ yotsañob i bʌ tiʼ chaʼan bʌ pañimil (Juan 15:19). Tsiʼ lajiyob Jesús i maʼañic tsiʼ yotsañob i bʌ ti política (Juan 17:16; 18:36). Pero tsaʼʌch i meleyob jiñi eʼtel tsaʼ bʌ i yʌlʌ Jesús: Cheʼ miʼ chaʼleñob subtʼan yicʼot miʼ cʌntesañob lac piʼʌlob tiʼ chaʼan bʌ i Yumʌntel Dios (Mateo 28:18-20; Hechos 10:42).

 Ñuc bʌ i chaʼañob jiñi ñaxam bʌ xñoptʼañob jiñʌch cheʼ miʼ jacʼbeñob i tʼan Dios. Pero yujilob jaʼel chaʼan yomʌch miʼ qʼuelob ti ñuc jiñi añob bʌ i yeʼtel (Hechos 5:29; 1 Pedro 2:13, 17). Jin chaʼan tsiʼ jacʼʌyob jiñi mandar i tsiʼ yʌcʼʌyob i tojoñel (Romanos 13:1, 7). I sujmʌch chaʼan maʼañic tsiʼ yotsañob i bʌ ti política, pero tsaʼʌch i tajayob i wenlel ti chuqui tac muʼ bʌ melob jiñi añoʼ bʌ i yeʼtel (Hechos 25:10, 11; Filipenses 1:7).

 Jiñi Biblia jamʌ tsiquil miʼ pʌs chaʼan mi jiñic Jesús yicʼot jiñi xñoptʼañob i chaʼan tsiʼ yotsayob i bʌ ti política. Jin chaʼan, jiñi i testigojob Jehová miʼ tsajcañob Cristo i maʼañic miʼ yotsañob i bʌ ti política. Cheʼ bajcheʼ jiñi ñaxam bʌ xñoptʼañob, miʼ chaʼleñob wersa i jacʼob jiñi mandar tsaʼ bʌ i cʌyʌ Jesús: Miʼ subob «jiñi wen tʼan chaʼan bʌ Yumʌntel» (Mateo 24:14).