Ti 2022, jiñi yumʌlob tiʼ petol pañimil tsiʼ jisayob 2.24 billones de dólares chaʼan i tojol i soldadojob i maʼañic baʼ ujtem bajcheʼ iliyi. Woli i yujtel bajcheʼ iliyi tiʼ caj woliyob ti guerra Rusia yicʼot Ucrania. Jiñi Instituto Internacional de Estudios para la Paz de Estocolmo tsiʼ yʌcʼʌ jumpʼejl informe cheʼ ti abril 2023 i tsiʼ yʌlʌ chuqui tac ujtem ti 2022:

•    Jiñi gasto tac muʼ bʌ i cʼʌjñel chaʼan jiñi soldadojob ti Europa tsaʼ letsi 13% ti jiñi jabil. Ili maʼañic baʼ ujtem bajcheʼ ili cʼʌlʌl cheʼ bʌ tsaʼ ujti jiñi Guerra Fría.

•    «Jiñi gasto tac tsaʼ bʌ i cʼʌñʌ Rusia chaʼan i soldadojob tsaʼ letsi 9,2%». Wʌle, Rusia añix ti tercer lugar chaʼan jiñi país tac muʼ bʌ i wen cʼʌñob taqʼuin chaʼan miʼ chajpañob i soldadojob.

•    Estados Unidos jiñʌch jiñi país muʼ bʌ i wen jisan taqʼuin tiʼ soldadojob.

 «Che’ bʌ jiñi yumʌlob tiʼ petol pañimil woli i ñumen cʼʌñob cʼajtin chaʼan miʼ chajpañob i soldadojob, mi’ pʌs chaʼan chumulonla ti jumpʼejl pañimil baqui maʼañix ñʌchʼtʌlel», cheʼ tsiʼ yʌlʌ jiñi doctor Nan Tian, tsaʼ bʌ i chaʼle coltaya ti jiñi informe chaʼan jiñi Instituto Internacional de Estudios para la Paz de Estocolmo.

 Jiñi Biblia tsiʼ wʌn alʌ chaʼan jiñi potencia mundial añoʼ bʌ ili ora mi caj i contrajiñob i bʌ. Cheʼ jaʼel, miʼ yʌl bajcheʼ miʼ mejlel ti tajtʌl jiñi i sujm bʌ ñʌchʼtʌlel.

•    Jiñi Biblia miʼ yʌl chaʼan ili ora chumuloñixla tiʼ jilibal pañimil (Daniel 8:19).

•    Ti jiñi libro chaʼan Daniel tsiʼ wʌn alʌ chaʼan ili ora, an yumʌlob tac muʼ bʌ caj i wen contrajiñob i bʌ. Ili potencia tac mi caj i contrajiñob i bʌ chaʼan miʼ qʼuejlel majqui jiñi ñumen pʼʌtʌl bʌ. I chaʼan miʼ melob iliyi, mach yʌlʌyic jaypʼejl qʼuin miʼ jisañob tiʼ soldadojob (Daniel 11:40, 42, 43).

 Mi a wom a ñumen cʌn ili profecia am bʌ ti Biblia, qʼuele jiñi video Tsaʼ tsʼʌctiyi jiñi profecía am bʌ ti Daniel 11.

•    Jiñi Biblia miʼ yʌl chaʼan Dios «mi caj i waʼchocon yambʌ Yumʌl, mach bʌ yujilic jilel. Mi caj i mʌjlel i chaʼan. Mi caj i laj jisan pejtel jini yumʌlob. Mi caj i yajñel tiʼ pejtelel ora» (Daniel 2:44).

•    Jehová a lʌcʼʌlix mi caj i chʼʌm tilel jiñi i sujm bʌ ñʌchʼtʌlel, mach bʌ añic miʼ jilel. Jiñi lac piʼʌlob maʼañic baʼ ora mi caj i mejlel i melob iliyi. ¿Bajcheʼ mi caj i mel? Mi caj i cʼʌn jiñi i Yumʌntel. Ili Yumʌntel am bʌ ti panchan mi caj i jisan pejtelel jontolil yicʼot pejtelel chuqui tac miʼ cʼʌjñel ti guerra (Salmo 46:8, 9).

 Mi a wom a ñumen cʌn chuqui mi caj i mel jiñi i Yumʌntel Dios, pejcan jiñi artículo «Jiñi i Yumʌntel Dios mi caj i chʼʌm tilel i sujm bʌ ñʌchʼtʌlel».