Añʌch, jiñi Diablo juntiquilʌch ángel tsaʼ bʌ i contraji Dios. Jiñʌch jiñi «yumʌl chaʼan ili pañimil» (Juan 14:30; Efesios 6:11, 12). Yaʼ ti Biblia an cabʌl bajcheʼ miʼ subentel. Laʼ laj qʼuel chaʼpʼej uxpʼejl:

•   Satanás, yom bʌ i yʌl «xcontra o xmʌctaya» (Job 1:6).

•   Diablo, yom bʌ i yʌl «xjopʼtʼan» (Apocalipsis 12:9).

•   Lucum, jiñi Biblia miʼ yʌl jaʼel bajcheʼ wen yujil jax bʌ bajcheʼ miʼ chaʼlen lot (2 Corintios 11:3).

•   Xpʌy mulil (Mateo 4:3, I tʼan Dios).

•   Xlot (Juan 8:44).

¿Jumpʼejl jach ba símbolo chaʼan jiñi jontolil o jiñi mach bʌ weñic ti lac tojlel?

 Maʼañic, an muʼ bʌ i ñaʼtañob chaʼan jiñi Diablo maʼañic, chaʼan jiñʌch jiñi jontolil am bʌ ti pañimil o chaʼan jiñʌch jiñi mach bʌ weñic am bʌ ti lac pusicʼal i chaʼan anto tiʼ tojlel Dios jaʼel. Jiñi Biblia miʼ yʌl chaʼan Dios yicʼot jiñi Diablo tsiʼ chaʼleyob tʼan. Pero Dios wen yicʼot toj pejtelel chuqui miʼ mel. Jin chaʼan, ¿chucoch mi caj la cʌl chaʼan an chuqui mach weñic tiʼ tojlel? (Deuteronomio 32:4; Job 2:1-6). I ñaʼtancu jaʼel cheʼ bʌ jiñi Biblia miʼ yʌl chaʼan jiñi Diablo tsiʼ ñopo i yʌcʼ chaʼan Jesús miʼ chaʼlen mulil (Mateo 4:8-10; 1 Juan 3:5). Jiñi Biblia wen tsiquil miʼ pʌs chaʼan Satanás añʌch, i mach mucʼ jach i yʌjlel chaʼan miʼ tajtʌl ti tʼan jiñi jontolil.

 Cabʌlob miʼ yʌlob chaʼan maʼañic jiñi Diablo. ¿Yom ba miʼ toj sajtel lac pusicʼal? Maʼañic, come jiñi Biblia miʼ yʌl chaʼan Satanás miʼ cʼʌn chuqui jach bʌ lot chaʼan miʼ mel chuqui yom (2 Tesalonicenses 2:9, 10). I jumpʼejl lot am bʌ i wen cʼʌñʌ jiñʌch chaʼan jiñi lac piʼʌlob miʼ ñopob chaʼan maʼañic (2 Corintios 4:4).

  Mach i sujmic: Lucifer jiñʌch yambʌ i cʼabaʼ jiñi Diablo.

 I sujmʌch: Jiñi tʼan am bʌ ti hebreo muʼ bʌ i chaʼlentel ti traducir ti yan tac bʌ Biblia bajcheʼ «Lucifer», yom i yʌl, jiñi ecʼ wen chʌc bʌ i cʼʌcʼal (Isaías 14:12). Ili tʼan miʼ tilel ti jumpʼejl profecía muʼ bʌ i taj ti tʼan jiñi yumʌlob ti Babilonia muʼ bʌ caj i jisʌntelob (Isaías 14:4, 13-20). Ti ili profecía, jiñi yumʌlob ti Babilonia tsaʼ bʌ jisʌntiyob tsaʼ subentiyob ti wajal tʼan bajcheʼ jiñi ecʼ wen chʌc bʌ i cʼʌcʼal.

  Mach i sujmic: Jiñi Diablo miʼ chaʼlen eʼtel yicʼot Dios.

 I sujmʌch: Jiñi Diablo i contrajʌch Dios, mach i wiñiquic ti eʼtel. Satanás miʼ contrajin jiñi i wiñicob Dios yicʼot miʼ jopʼbeñob i mul (1 Pedro 5:8; Apocalipsis 12:10).