Yaʼ ti Biblia junyajl jach miʼ tajtʌl ti tʼan chaʼan jiñi tatuaje, yaʼʌch ti Levítico 19:28, muʼ bʌ i yʌl: «Mach mi laʼ wotsan i marcajlel tac chuqui tac an ti pañimil [yom i yʌl, tatuaje tac] yaʼ ti laʼ bʌcʼtal». Dios tsiʼ yʌqʼue ili mandar jiñi israelitajob come mach yomic chaʼan cheʼ miʼ melob bajcheʼ jiñi yambʌ tejclum tac yaʼ bʌ lʌcʼʌl chumulob yicʼot, muʼ bʌ i yotsañob tiʼ bʌcʼtal i cʼabaʼ jiñi i diosob (Deuteronomio 14:2). Anquese jiñi xñoptʼañob maʼañix chuculob ti jiñi mandar tsaʼ bʌ i yʌqʼue Dios jiñi israelitajob, pero yomʌch miʼ qʼuelob jiñi principio baqui chucul ili mandar.

¿Wem ba cheʼ juntiquil xñoptʼan miʼ melben i bʌ tatuaje?

 Laʼ laj qʼuel chaʼpʼej uxpʼejl texto muʼ bʌ caj i coltañonla lac ñaʼtan.

•   «Jiñi xʼixicob […] pʼisbil jach yom miʼ chʼʌlob i bʌ i yom miʼ pʌsob i ñaʼtʌbal» (1 Timoteo 2:9). Ili principio ñuc i cʼʌjñibal jaʼel chaʼan jiñi wiñicob. Jiñi xñoptʼan mach yomic miʼ cʌlʌx qʼuejlel ti ñuc tiʼ caj bajcheʼ miʼ chʼʌl i bʌ o bajcheʼ yilal.

•   An muʼ bʌ i yotsabeñob i bʌ tatuaje chaʼan miʼ ñumen cʌjñelob o chaʼan miʼ yʌcʼob ti cʌjñel chaʼan añobʌch tiʼ wenta chaʼan miʼ melob chuqui yomob tiʼ bʌcʼtal. Pero yaʼ tiʼ Tʼan Dios, jiñi xñoptʼañob miʼ yʌqʼuentelob ili ticʼojel: «[Acʼʌla] jiñi laʼ bʌcʼtal bajcheʼ cuxul bʌ majtañʌl, chʼujul bʌ yicʼot muʼ bʌ i mulan Dios, cheʼ bajcheʼ jiñi mi caj laʼ cʼʌn pejtelel laʼ ñaʼtʌbal» (Romanos 12:1). Jiñi yom bʌ i melben i bʌ tatuaje miʼ mejlel i cʼʌn pejtelel i ñaʼtʌbal chaʼan miʼ wen ñaʼtan chucoch yom i mel. Jumpʼejl ejemplo, tajol an majqui yom i lajiben i melbal o tajol yom i yʌcʼ ti ñaʼtʌntel chaʼan ochem ti jumpʼejl grupo. Mi cheʼ bajcheʼ jiñi, yom miʼ cʼajtiben i bʌ: «¿Chuqui mi caj c mel mi jiñi tatuaje tsaʼ bʌ c melbe c bʌ mach utsʼatix miʼ qʼuejlel o maʼañix miʼ qʼuejlel ti ñuc, o mi ti wiʼil mic chaʼ ñaʼtan c bʌ?». Mi mucʼʌch a ñaxan wen ñaʼtan, utsʼat chuqui mi caj a mel (Proverbios 4:7).

•   «Jini [...] muʼ bʌ i ñaʼtan chuqui yom i mel miʼ yʌcʼ ti pʼojlel i chubʌʼan. Pero pejtel muʼ bʌ i ñaʼtañob i toʼol tajob i chubʌʼan mi caj i yochelob ti pobre» (Proverbios 21:5). An muʼ bʌ i melbeñob i bʌ tatuaje i maʼañic miʼ ñaxan wen ñaʼtañob. Pero muʼ bʌ i melob bajcheʼ jiñi, tajol ti wiʼil muʼto caj i chaʼ ñaʼtañob i bʌ. Tajol mi caj i sʌt i yamigojob i muʼto mejlel i sʌt i yeʼtel jaʼel. Cheʼ jaʼel, chaʼan miʼ mejlel lac chaʼ locʼsʌben lac bʌ jumpʼejl tatuaje ti lac bʌcʼtal, wen lets i tojol yicʼot wen cʼux. An lac piʼʌlob muʼto bʌ i chaʼ ñaʼtañob i bʌ chucoch tsiʼ melbeyob i bʌ tatuaje tiʼ bʌcʼtal. Ili cheʼʌch miʼ chaʼ alob jiñi muʼ bʌ i chaʼleñob eʼtel tiʼ yʌpol tatuaje.