¿Chuqui miʼ yʌl jiñi Biblia cheʼ juntiquil xʼixic miʼ choc i yalobil?
I jacʼbal muʼ bʌ i yʌcʼ jiñi Biblia
Jiñi Biblia maʼañic miʼ jamʌ al chaʼan juntiquil xʼixic mach yomic miʼ choc i yalobil cʌntʌbilto bʌ i chaʼan. Pero añʌch versículo tac muʼ bʌ i pʌs bajcheʼ yilal miʼ qʼuel Jehová.
Jiñi laj cuxtʌlel lac majtañʌch ti Dios, i wen ñuc miʼ qʼuel (Génesis 9:6; Salmo 36:9). I cheʼʌch miʼ qʼuel jaʼel jiñi i cuxtʌlel juntiquil alʌl cʌntʌbilto bʌ. Jin chaʼan mi juntiquil xʼixic miʼ yʌlol choc i yalobil woliʼ chaʼlen tsʌnsa.
Jiñi Mandar tsaʼ bʌ i yʌqʼue Dios jiñi israelitajob miʼ yʌl: «Mi an wiñicob woliyoʼ bʌ ti jatsʼ i miʼ tajob i jatsʼ juntiquil xʼixic cʌntʌbil bʌ i chaʼan i yalobil, mi tsiʼ choco i yal, pero maʼañic miʼ chʌmel jiñi alʌl o jiñi xʼixic, jiñi tsaʼ bʌ i chaʼle jatsʼ, yom miʼ ñumel i toj i mul ti juez cheʼ bajcheʼ cʼamel miʼ cʼajtin i ñoxiʼal jiñi xʼixic. Pero mi jiñi alʌl o jiñi xʼixic miʼ chʌmel, wersa yom miʼ yʌcʼ i cuxtʌlel jiñi tsaʼ bʌ i chaʼle jatsʼ» (Éxodo 21:22, 23 TNM). a
¿Baqui ora miʼ tejchel jiñi cuxtʌlel?
Jiñʌch cheʼ juntiquil xʼixic embarazada miʼ cʌlel. Dios miʼ qʼuel chaʼan juntiquilix lac piʼʌl jiñi alʌl cʌntʌbilto bʌ, cheʼʌch miʼ pʌs jiñi Biblia. Dios mach qʼuexelic miʼ qʼuel juntiquil alʌl cʌntʌbilto bʌ yicʼot jiñi tsaʼix bʌ i yila pañimil, laʼ laj qʼuel muʼ bʌ i yʌl jiñi Biblia.
Jiñi rey David tsiʼ yʌlʌ: «Tsaʼ qʼueleyon cheʼ bʌ woli jaxto j colel tiʼ malil i ñʌcʼ c ñaʼ» (Salmo 139:16 TNM). Ili miʼ pʌs chaʼan anquese David maxto i yila pañimil, Dios tsaʼix i qʼuele bajcheʼ juntiquil lac piʼʌl.
Yambʌ ejemplo. Anquese Jeremías maxto i yila pañimil Dios tsaʼix i wʌn yajca chaʼan miʼ mel jumpʼejl eʼtel, Dios tsiʼ yʌlʌ: «J cʌñʌyetix cheʼ maxto anic tsaʼ cʌcʼʌyet ti cʌntʌntel tiʼ ñʌcʼ a ñaʼ. Tsac yajcayet cheʼ maxto anic tsaʼ qʼuele pañimil. Tsac wʌn ñaʼta j cʼʌñet ti subtʼan tiʼ tojlel winicob ti pejtelel lum» (Jeremías 1:5).
Lucas jumpʼejl jach tʼan tsiʼ cʼʌñʌ ti griego chaʼan miʼ taj ti tʼan juntiquil alʌl cʌntʌbilto bʌ yicʼot juntiquil tsaʼix bʌ i yila pañimil (Lucas 1:41; 2:12, 16).
Mi juntiquil xʼixic tsiʼ yʌlol chaʼle ti abortar i yalobil, ¿muʼ ba i ñusʌbentel ti Dios?
Mucʼʌch, mi muqʼuix i qʼuel ti ñuc jiñi cuxtʌlel cheʼ bajcheʼ miʼ qʼuel Dios, mach yomix miʼ yubin i chʼijyemlel chaʼan jiñi tsaʼ bʌ i mele. Jiñi Biblia miʼ yʌl: «Lac Yum miʼ chaʼlen pʼuntaya, uts i pusicʼal [...]. Cheʼ bajcheʼ i ñajtlel pañimil cʼʌlʌl tiʼ pasibal qʼuin cʼʌlʌl tiʼ bʌjlibal qʼuin, cheʼʌch tsiʼ chocbeyonla lac mul» (Salmo 103:8-12). b Jehová mucʼʌch i ñusʌben i mul jiñi lac piʼʌlob mucʼʌch bʌ i chaʼ ñaʼtañob i bʌ ti jumpʼejlob i pusicʼal (Salmo 86:5).
Mi an wocol chaʼan jiñi xʼixic o jiñi alʌl miʼ mejlel ti chʌmel, ¿wem ba cheʼ miʼ chaʼlentel ti abortar?
Tsaʼix laj qʼuele chaʼan jiñi i cuxtʌlel jiñi alʌl wen ñuc tiʼ wut Dios. I jiñi Biblia maʼañic miʼ yʌcʼ ti ñaʼtʌntel chaʼan jiñi xʼixic miʼ mejlel i mel jiñi aborto cheʼ an ti wocol jiñi ñaʼʌl o jiñi alʌl.
Pero laʼcu lac ñaʼtan chaʼan cheʼ wolix i yilan pañimil jiñi alʌl miʼ yujtel jumpʼejl wocol i miʼ mejlel ti chʌmel jiñi i mamá o jiñi alʌl, ¿chuqui mi caj lac mel? Mi cheʼ miʼ yujtel bajcheʼ iliyi, jin jach jiñi wiñic yicʼot xʼixic miʼ ñaʼtan majqui cuxul miʼ cʌytʌl, mi jin jiñi alʌl o jiñi i mamá.
a An yambʌ traducción tac muʼ bʌ i yʌcʼ ti ñaʼtʌntel chaʼan ili mandar jin woliʼ taj ti tʼan chaʼan chuqui miʼ chaʼlen jiñi xʼixic, i mach jiñic jiñi alʌl. Pero jiñi tsʼijbujel hebreo miʼ laja taj ti tʼan chaʼan chuqui miʼ chaʼlen jiñi xʼixic o jiñi alʌl.
b Jiñi Biblia miʼ yʌl chaʼan i cʼabaʼ Dios jiñʌch Jehová (Salmo 83:18, TNM).