Jiñi mulil jiñʌch cheʼ an chuqui mi lac ñaʼtan, bajcheʼ yubil mi la cubin lac bʌ o cheʼ an chuqui mi lac mel maʼañic bʌ miʼ mulan Dios (1 Juan 3:4; 5:17). Jiñi Biblia miʼ yʌl chaʼan mi tsaʼ lac mele mach bʌ weñic tiʼ wut Jehová i maʼañic mi lac mel chuqui wem bʌ woli lac chaʼlen mulil (Santiago 4:17).

 Ti jiñi ñaxam bʌ tʼan tac bajcheʼ tsaʼ tsʼijbunti jiñi Biblia, jiñi tʼan muʼ bʌ i chaʼlentel ti traducir bajcheʼ «mulil», yom i yʌl, cheʼ mach yaʼic miʼ cʼotel yaʼ baqui la com. Jumpʼejl ejemplo, yaʼ ti Biblia miʼ yʌl tiʼ tojlel jiñi israelitajob ti wajali chaʼan an wen yujiloʼ bʌ julbʌl ti pʌrʌntun i jiñi xajlel tojach miʼ cʼotel yaʼ baqui yomob. Cheʼ muqʼuic i chaʼlentel ti traducir cheʼ bajcheʼ an jiñi tʼan ti wajali, yom i yʌl chaʼan maʼañic miʼ chaʼleñob mulil (Jueces 20:16). Jin chaʼan, cheʼ mi lac chaʼlen mulil yom i yʌl chaʼan maʼañic woli lac tsʼʌctesan jiñi toj bʌ i mandar tac Dios.

 Dios miʼ mejlel i yʌl chuqui yom mi lac mel come jiñʌch tsaʼ bʌ i meleyonla (Apocalipsis 4:11). I joñonla mi caj lac chaʼlen meloñel tiʼ tojlel tiʼ caj bajcheʼ yilal lac melbal (Romanos 14:12).

¿Am ba juntiquil maʼañic bʌ miʼ chaʼlen mulil?

 Maʼañic, jiñi Biblia miʼ yʌl chaʼan ti lac pejtelel tsaʼ lac chaʼle mulil i maʼañic miʼ mejlel lac taj i ñuclel Dios (Romanos 3:23; 1 Reyes 8:46; Eclesiastés 7:20; 1 Juan 1:8). ¿Chucoch miʼ yʌjlel chaʼan luʼ xmulilonla?

 Ti ñaxan, Adán yicʼot Eva mach xmulilobic, come toj tsaʼ mejliyob i tsaʼ mejliyob tiʼ yejtal Dios (Génesis 1:27). Pero tsiʼ ñusʌbeyob i tʼan Dios i tsaʼ sujtiyob ti xmulil (Génesis 3:5, 6, 17-19). Cheʼ bʌ Adán yicʼot Eva tsiʼ yʌcʼʌyob i yalobil tsiʼ cʼaxtesʌbeyob jiñi mulil, lajal bajcheʼ jumpʼejl cʼamʌjel toj añobix bʌ i chaʼan (Romanos 5:12). Jiñi rey David tsiʼ yʌlʌ: «Xmulilon tsaʼ quila pañimil» (Salmo 51:5).

¿Junlajal ba jiñi mulil?

 Mach cheʼiqui. Jiñi Biblia miʼ yʌl chaʼan jiñi wiñicob ti wajali yaʼ ti Sodoma wen jontolob yicʼot cabʌlob i mul, wen tsʌtsob i mul (Génesis 13:13; 18:20). Laʼ laj qʼuel uxchajp muʼ bʌ i pʌs bajcheʼ cʼamel i tsʌtslel jumpʼejl mulil.

1.   Tsʌts bʌ mulil. Jiñi Biblia miʼ yʌl chaʼan jiñi tsʼiʼlel, i chʼujutesʌntel dios tac melbil jach bʌ, jiñi xujchʼ, yʌcʼʌjel, tsʌnsa yicʼot espiritismo tsʌts tac bʌ mulil mach bʌ yomic mi lac mel (1 Corintios 6:9-11; Apocalipsis 21:8). Jiñi Biblia miʼ pʌs chaʼan ili mulil tac mach lajalic yicʼot yan tac bʌ mach bʌ yilolic lac chaʼan mi lac mel, jumpʼejl ejemplo, tajol an chuqui mi la cʌl muʼ bʌ i low yambʌlob (Proverbios 12:18; Efesios 4:31, 32). Jiñi Biblia miʼ subeñonla chaʼan yom mi laj cʌntan lac bʌ mach yʌlʌlic mi mach tsʌtsic bʌ mulil, come mi maʼañic, miʼ mejlel i pʌyonla majlel lac mel tsʌts bʌ mulil (Mateo 5:27, 28).

2.   Chucoch mi lac mel. An muʼ bʌ i chaʼleñob mulil come mach yujilobic chuqui miʼ yʌl i tʼan Dios (Hechos 17:30; 1 Timoteo 1:13). Jiñi Biblia maʼañic miʼ yʌl chaʼan maʼañic i wocolel mi lac chaʼlen mulil cheʼ mach laj cʌñʌyic i mandar tac Dios, pero mucʼʌch i pʌs chaʼan mach lajalic cheʼ bʌ juntiquil i cʌmbeyix i mandar tac Jehová miʼ yʌlol chaʼlen mulil (Números 15:30, 31). Jiñi Biblia miʼ yʌl chaʼan jiñi muʼ bʌ i yʌlol chaʼlen mulil jontol i pusicʼal (Jeremías 16:12).

3.   Jaysujtel miʼ mejlel. Jiñi Biblia miʼ pʌs chaʼan mach lajalic cheʼ junsujtel jach mi lac mel jumpʼejl mulil yicʼot cheʼ cabʌl mi lac mel (1 Juan 3:4-8). Dios mi caj i yʌqʼuen i toj i mul jiñi muʼ bʌ i chʌn chaʼleñob mulil anquese yujilobix chuqui yom miʼ melob (Hebreos 10:26, 27).

 Jiñi am bʌ i meleyob jumpʼejl tsʌts bʌ mulil tajol mach tijicñayic miʼ yubiñob i bʌ chaʼan tsaʼ bʌ i meleyob. Jumpʼejl ejemplo, jiñi rey David tsiʼ yʌlʌ: «Come jini c jontolil tsaʼix i teñeyon jubel. Yom i cʼʌson cheʼ bajcheʼ al bʌ cuchʌl» (Salmo 38:4). Pero jiñi Biblia miʼ yʌl ili utsʼatax bʌ tʼan tac: «Laʼ i cʌy i mul jini xjontolil. Jini mach bʌ tojic la i cʌy i ñaʼtan jontolil. Laʼ i sutqʼuin i bʌ ti lac Yum, come mi caj i pʼuntan. Mi caj i ñusʌben i mul ti pejtelel i pusicʼal» (Isaías 55:7).