Yaʼ ti Biblia, Dios miʼ pʌsbeñonla chaʼan mach yomic mi lac yajlel ti tsʼiʼlel (1 Tesalonicenses 4:3). Cheʼ bajcheʼ miʼ yʌl jiñi Biblia, «tsʼiʼlel» jiñʌch cheʼ bʌ jiñi ñujpuñem bʌ miʼ piʼlen mach bʌ i piʼʌlic, cheʼ juntiquil wiñic miʼ piʼlen yambʌ wiñic o jiñi xʼixic miʼ piʼlen yambʌ xʼixic o cheʼ bʌ juntiquil xʼixic yicʼot juntiquil wiñic mach bʌ ñujpuñemobic miʼ piʼleñob i bʌ.

•  ¿Chucoch ñucʌch i cʼʌjñibal miʼ qʼuel Dios cheʼ juntiquil wiñic yicʼot xʼixic miʼ ñujpuñelob?

•  ¿Wem ba chaʼan miʼ ñaxan lajal chumtʌlob chaʼan miʼ qʼuelob mi mucʼʌch i mejlelob ti ñujpuñel?

•  ¿Chuqui yom miʼ mejlel chaʼan jumpʼejl ñujpuñel wen miʼ yajñel?

•   Dios jiñʌch tsiʼ mele jiñi ñujpuñel. Tsiʼ mele ili cheʼ bʌ tsiʼ yʌcʼʌ ti ñujpuñel jiñi ñaxam bʌ wiñic yicʼot jiñi ñaxam bʌ xʼixic (Génesis 2:22-24). Dios mach yomic chaʼan jiñi wiñic yicʼot jiñi xʼixic lajal chumulob mi mach ñujpuñemobic tiʼ caj mach yomic i tsʼʌctesañob jiñi mandar tac chaʼan bʌ ñujpuñel.

•   Dios yujil chuqui jiñi ñumen wem bʌ chaʼañonla. Dios tsiʼ mele jiñi ñujpuñel chaʼan jiñi wiñic yicʼot xʼixic temel miʼ yajñelob tiʼ pejtelel ora. Yom chaʼan cheʼ bajcheʼ ili, wen miʼ yajñelob i familia yicʼot cʌntʌbilob. Ñaʼtancu ili: Mi an chuqui maʼ mʌn pero jatetto yom maʼ tsuy majlel, yomʌch maʼ qʼuel jiñi jun baqui miʼ yʌl chaʼan bajcheʼ yom maʼ tsuy. Cheʼʌch lajal jaʼel mi la com chaʼan tijicña jiñi lac familia, yomʌch mi lac jacʼ chuqui miʼ subeñonla Dios. Mi cheʼʌch mi lac mel tijicña mi caj la cajñel tiʼ pejtelel ora (Isaías 48:17, 18).

•   Mi juntiquil wiñic yicʼot xʼixic miʼ piʼleñob i bʌ cheʼ mach ñujpuñemobic mi caj i tajob wocol tac. Tajol miʼ tilel i yalobilob anquese mach yomobic, miʼ tajob cʼamʌjel tiʼ caj an majqui tsiʼ piʼleyob yicʼot mach tijicñayic mi caj i yubiñob i bʌ.

•   Dios tsiʼ yʌqʼue i majtan jiñi quixtañujob: Jiñʌch cheʼ miʼ mejlel i tajob i yalobil cheʼ bʌ miʼ piʼleñob i bʌ. Jumpʼejlʌch ñuc bʌ majtañʌl. Dios chʼujul miʼ qʼuel jiñi cuxtʌlel. Miʼ pijtan chaʼan jiñi wiñic yicʼot jiñi xʼixic miʼ qʼuelob ti ñuc cheʼ miʼ piʼleñob i bʌ, i miʼ melob cojach jiñi ñujpuñemoʼ yicʼot. Cheʼ bajcheʼ jiñi woliʼ qʼuelob ti ñuc jiñi ñujpuñel (Hebreos 13:4).

 Chaʼan jumpʼejl xñujpuñel tijicña miʼ chumtʌl, mach cʼʌñʌlic chaʼan miʼ ñaxan lajal chumtʌlob chaʼan miʼ qʼuelob miʼ mucʼʌch i mejlelob ti tem ajñel. I mi maʼañic, jujuntiquil miʼ mejlel i chʼʌm i bijlel. Muʼ bʌ caj i coltañob chaʼan pʼʌtʌl miʼ yajñelob jiñʌch cheʼ miʼ tsʼʌctesañob jiñi tʼan tsaʼ bʌ i yʌqʼueyob i bʌ yicʼot miʼ comol coltañob i bʌ chaʼan miʼ tojʼesañob jiñi wocol tac. a I chaʼan miʼ tsʼʌctesañob yomʌch ñujpuñemob (Mateo 19:6).

 Maʼañic jumpʼejl ñujpuñel toj bʌ. Pero jiñi xñujpuñelob mucʼʌch i mejlelob ti ajñel tiʼ tijicñʌyel mi mucʼʌch i jacʼob jiñi ticʼojel tac am bʌ ti Biblia. Laʼ laj qʼuel chaʼpʼej uxpʼejl:

•   Mach jatet jach yom maʼ bajñel ñaʼtan a bʌ, ñaxan qʼuele chuqui yom jiñi a piʼʌl (1 Corintios 7:3-5; Filipenses 2:3, 4).

•   Chaʼlenla wersa chaʼan mi la comol cʼuxbin laʼ bʌ yicʼot mi laʼ qʼuel laʼ bʌ ti ñuc ti jujumpʼejl qʼuin (Efesios 5:25, 33).

•   Cʌñʌ laʼ ñaxan ñaʼtan chuqui mi caj la wʌl (Proverbios 12:18).

•   Yom laʼ wujil pijt yicʼot ñusʌbenla laʼ bʌ laʼ mul ti ora (Colosenses 3:13, 14).