Jiñi Biblia miʼ tsictesan bajcheʼ yilal miʼ cajel ili pañimil, chuqui tac mi caj i yujtel, i bajcheʼ yilal i melbal jiñi lac piʼʌlob miʼ cajel ti «jiñi cojix tac bʌ qʼuin» i mi caj i coltañonla lac ñaʼtan chaʼan lʌcʼʌlix i jilibal pañimil (2 Timoteo 3:1; Mateo 24:3; Daniel 8:19).

 Jiñi Biblia tsiʼ wʌn alʌ chuqui junlajal bʌ mi caj i yujtel, i jiñi mi caj i yʌcʼ ti «cʌñol» chaʼan añoñixla ti cojix tac bʌ qʼuin (Lucas 21:7). Laʼ laj qʼuel chaʼpʼej uxpʼejl ejemplo:

 Guerra tac tiʼ petol pañimil. Jesús tsiʼ yʌlʌ chaʼan mi caj i contrajiñob i bʌ «jumpʼejl tejclum yicʼot yambʌ, jumpʼejl yumʌntel yicʼot yambʌ» (Mateo 24:7). Cheʼ jaʼel, Apocalipsis 6:4 miʼ taj ti tʼan jiñi guerra bajcheʼ juntiquil cʼʌchʌl bʌ ti caballo muʼ bʌ «i jisan ñʌchʼtʌlel ti pañimil».

 Wiʼñal. Jesús tsiʼ yʌlʌ chaʼan miʼ cajel «wiʼñal» (Mateo 24:7). Apocalipsis miʼ taj ti tʼan yambʌ cʼʌchʌl bʌ ti caballo muʼ bʌ i yʌcʼ wiʼñal ti cabʌl tejclum (Apocalipsis 6:5, 6).

 Ñuc tac bʌ yujquel lum. Jesús tsiʼ yʌlʌ chaʼan miʼ cajel «yujquel lum ti cabʌl tejclum», yom i yʌl tiʼ petol pañimil (Mateo 24:7; Lucas 21:11). Ili ñuc tac bʌ yujquel lum mi caj i ñumen chʼʌm tilel wocol yicʼot chʌmel tiʼ tojlel lac piʼʌlob.

 Cʼamʌjel. Jesús tsiʼ yʌlʌ chaʼan miʼ cajel «baqui jach bʌ cʼamʌjel» (Lucas 21:11).

 Jontolil. Anquese cʼʌlʌlʌch ti wajali an jontolil, Jesús tsiʼ yʌlʌ chaʼan ti jiñi cojix tac bʌ qʼuin mi caj i ñumen pʼojlel «jontolil» (Mateo 24:12).

 I yʌsintel Pañimil. Ti Apocalipsis 11:18 miʼ yʌl chaʼan jiñi lac piʼʌlob mi caj «i jisañob pañimil». Mach yaʼ jach ochem jontolil yicʼot ticʼlʌntel, cheʼ jaʼel i yʌsintel Pañimil.

 Jiñi lac piʼʌlob mi caj i ñumen asiyelob. Cheʼ bʌ miʼ taj ti tʼan jiñi lac piʼʌlob, jiñi Biblia miʼ yʌl: «Maʼañic mi caj i yʌcʼob wocolix i yʌlʌ, maʼañic mi caj i pʌsob i xucʼtʌlel […], maʼañic mi caj i mulañob i sʌclan ñʌchʼtʌlel, mi caj i sujtelob ti xjopʼtʼan, maʼañic mi caj i ticʼob i bʌ, wen jontolob, maʼañic mi caj i cʼuxbiñob chuqui wen, mi caj i melob mach bʌ weñic tiʼ tojlel i yamigojob, miʼ waʼ melob chuqui yomob, ñumen ñuc mi caj i yubiñob i bʌ» (2 Timoteo 3:1-4). Tiʼ caj i melbal lac piʼʌlob, jiñi Biblia tsiʼ yʌlʌ chaʼan ti jiñi bʌ ora «wen wocol miʼ cajel yicʼot bʌbʌqʼuen».

 Mi caj i jejmel familia tac. Yaʼ ti 2 Timoteo 3:2, 3, jiñi Biblia miʼ yʌl chaʼan cabʌl lac piʼʌlob «maʼañic mi caj i cʼuxbiñob añoʼ bʌ tiʼ familia», i jiñi alobob «mi caj i ñusʌbeñob i tʼan i tat i ñaʼ».

 Jiñi lac piʼʌlob mi caj i cʌy i cʼuxbiñob Dios. Cheʼ bʌ Jesús tsiʼ yʌlʌ chaʼan «mi caj i tsʌñan i cʼuxbiya lʌcʼʌ tiʼ pejtelel quixtañujob», woliʼ taj ti tʼan chaʼan cabʌl lac piʼʌlob mi caj i cʌy i cʼuxbiñob Dios (Mateo 24:12). I jiñi 2 Timoteo 3:4 miʼ yʌl jaʼel chaʼan ti jiñi cojix tac bʌ qʼuin ili lac piʼʌlob «mi caj i cʼuxbiñob chuqui bajñel yomob i mach jiñic Dios».

 Jiñi lac piʼʌlob mi caj i poj alob chaʼan miʼ chʼujutesañob Dios. Ti 2 Timoteo 3:5, jiñi Biblia tsiʼ yʌlʌ chaʼan jiñi lac piʼʌlob mi caj i poj alob chaʼan miʼ chʼujutesañob Dios pero cheʼ bajcheʼ chumulob mi caj i pʌs chaʼan mach i sujmic.

 Jiñi profecía tac mi caj i ñumen chʼʌmbentel i sujm. Jiñi libro chaʼan Daniel tsiʼ wʌn alʌ chaʼan «tiʼ jilibal pañimil» cabʌlob mi caj i ñumen chʼʌmbeñob i sujm jiñi Biblia. Jumpʼejl ejemplo, mi caj i ñumen ñaʼtañob jiñi profecía tac chaʼan bʌ ili ora (Daniel 12:4).

 Mi caj i sujbel jiñi wen tʼan tiʼ pejtelel pañimil. Jesús tsiʼ yʌlʌ: «Jiñi wen tʼan chaʼan bʌ Yumʌntel mi caj i sujbel tiʼ pejtelel pañimil» (Mateo 24:14).

 Jiñi lac piʼʌlob maʼañic mi caj i jacʼob tʼan i miʼ cajelob ti wajleya. Jesús tsiʼ yʌlʌ chaʼan lʌcʼʌ tiʼ pejtelel jiñi lac piʼʌlob maʼañic mi caj i ñopob chaʼan lʌcʼʌlix i jilibal ili pañimil (Mateo 24:37-39). I mach cojach jiñi, 2 Pedro 3:3, 4 miʼ yʌl chaʼan jiñi lac piʼʌlob miʼ cajelob ti wajleya i mi caj i yʌlob chaʼan jiñi woli tac bʌ i yujtel maʼañic chuqui miʼ pʌs.

 Mi caj i tsʼʌctiyel jiñi profecía tac. Jesús tsiʼ yʌlʌ chaʼan ti jiñi cojix tac bʌ qʼuin mi caj i laj tsʼʌctiyel jiñi profecía tac, mach jumpʼej chaʼpʼejlic jach (Mateo 24:33).

 Cheʼʌchi. Jiñi woli tac bʌ i yujtel ti pañimil yicʼot muʼ bʌ i yʌl jiñi Biblia miʼ pʌs chaʼan jiñi cojix tac bʌ qʼuin tsaʼ tejchi ti 1914, ti jiñi jabil cheʼ bʌ tsaʼ tejchi jiñi Primera Guerra Mundial. Qʼuele jiñi video i qʼuele chaʼan jiñi woli bʌ i yujtel ti pañimil miʼ pʌs chaʼan añoñixla ti jiñi cojix tac bʌ qʼuin:

 Ti 1914, jiñi i Yumʌntel Dios tsaʼ caji ti eʼtel yaʼ ti panchan. Tsaʼ bʌ i ñaxan mele jiñʌch cheʼ bʌ tsiʼ choco jubel jiñi Diablo yicʼot jiñi i xibajob. Cʼʌlʌl ti jimbʌ ora wʌʼan i melob mach bʌ weñic ila ti Pañimil (Apocalipsis 12:7-12). Cheʼ bajcheʼ yilal i melbal jiñi lac piʼʌlob miʼ pʌs chaʼan Satanás jiñʌch am bʌ ti cʼʌb ili pañimil. Jin chaʼan, jiñi cojix tac bʌ qʼuin wen wocolʌch yicʼot bʌbʌqʼueñʌch (2 Timoteo 3:1).

 Tiʼ caj jiñi wocol tac woli bʌ i yujtel cabʌl lac piʼʌlob miʼ pensariñob i bʌ. Miʼ pensariñob cheʼ wolix i wen asiyelob lac piʼʌlob. An muʼ bʌ i bʌcʼñañob chaʼan mi caj lac laja jisan lac bʌ.

 Pero cheʼ jaʼel añʌch lac piʼʌlob añoʼ bʌ i pijtaya anquese miʼ pensariñob jiñi woli tac bʌ i yujtel. ¿Chucoch? Come yujilob chaʼan jiñi i Yumʌntel Dios lʌcʼʌlix mi caj i jisan pejtelel jiñi wocol am bʌ ila ti pañimil (Daniel 2:44; Apocalipsis 21:3, 4). Anquese wolito i pijtañob chaʼan Dios miʼ tsʼʌctesan i tʼan, woliʼ tajob i tijicñʌyel ti tsaʼ bʌ i yʌlʌ Jesús: «Jiñi muʼ bʌ i lʌtʼ cʼʌlʌl tiʼ yujtibal mi caj i coltʌntel» (Mateo 24:13; Miqueas 7:7).