Jiñi gran tribulación jiñʌch i yorajlel cabʌl wocol maʼañic bʌ ñusʌbil i chaʼan lac piʼʌlob. Jiñi profecía tac am bʌ ti Biblia miʼ yʌl chaʼan iliyi mi caj i yujtel «ti jiñi cojix tac bʌ qʼuin» o «ti jiñi cojix bʌ ora» (2 Timoteo 3:1; Daniel 12:4). Marcos 13:19 miʼ yʌl: «Come jiñi qʼuin tac i qʼuiñilelʌch cabʌl wocol. Tiʼ tejchibal pañimil, tsaʼ bʌ i mele Dios, cʼʌlʌl ili ora, maʼañic ujtem wocol tac bajcheʼ iliyi, i maʼañic baʼ ora miʼ chaʼ cajel». (Daniel 12:1; Mateo 24:21, 22).

¿Chuqui mi caj yujtel ti jiñi gran tribulación?

•   Mi caj i jisʌntel jiñi mach bʌ i sujmic ñopbalʌl. Jiñi mach bʌ i sujmic ñopbalʌl ti ora mi caj i jisʌntel (Apocalipsis 17:​1, 5; 18:​9, 10, 21). Cheʼ bʌ jiñi yumʌlob ochemoʼ bʌ ti Naciones Unidas miʼ melob iliyi, tiʼ sujm mi caj i tsʼʌctesañob chuqui yom Dios (Apocalipsis 17:​3, 15-​18). a

•   Mi caj i contrajintel jiñi i sujm bʌ ñopbalʌl. Junmojt tejclum tac mi caj i ñop i jisan jiñi ochemoʼ bʌ ti jiñi i sujm bʌ ñopbalʌl, ti libro chaʼan Ezequiel miʼ subentel ili tejclum tac bajcheʼ Gog. Pero Dios maʼañic mi caj i yʌcʼ chaʼan miʼ jisʌbentel i tejclum (Ezequiel 38:1, 2, 9-12, 18-23).

•   Mi cajel meloñel tiʼ tojlel añoʼ bʌ ti pañimil. Jesús mi caj i chaʼlen meloñel tiʼ tojlel quixtañujob «i mi caj i tʼox jiñi quixtañujob ti chaʼmojt, cheʼ bajcheʼ jiñi xcʌnta tiñʌmeʼ miʼ tʼox jiñi tiñʌmeʼ yicʼot jiñi chivo» (Mateo 25:31-​33). I mi caj yʌqʼuen i tojob i mul jiñi mach bʌ añic tsiʼ coltayob i yermañujob Cristo muʼ bʌ caj i chaʼleñob yumʌntel yicʼot yaʼ ti panchan (Mateo 25:34-46).

•   Mi caj i tempʌntelob jiñi muʼ bʌ caj i chaʼleñob yumʌntel yicʼot Jesús. Jiñi i wiñicob Dios xucʼuloʼ bʌ tsaʼ bʌ yajcʌntiyob chaʼan miʼ chaʼleñob yumʌntel yicʼot Jesús mi caj i tempʌntelob i mi caj i chumtʌlob ti panchan (Mateo 24:31; 1 Corintios 15:50-53; 1 Tesalonicenses 4:15-17).

•   Mi caj i tilel Armagedón. Yaʼ ti Biblia, jiñi Armagedón miʼ subentel jaʼel bajcheʼ «jiñi guerra chaʼan bʌ jiñi ñuc bʌ i qʼuiñilel Dios, jiñi mach bʌ añic i pʼisol i pʼʌtʌlel» yicʼot bajcheʼ «i qʼuiñilel Jehová» (Apocalipsis 16:14, 16; Isaías 13:9; 2 Pedro 3:12). Pejtelel añoʼ bʌ i mul tiʼ tojlel Cristo mi caj i jisʌntelob ti jiñi guerra (Sofonías 1:18; 2 Tesalonicenses 1:6-10). Cheʼ jaʼel mi caj i jisʌntelob pejtelel jiñi yumʌlob muʼ bʌ i lajintelob yaʼ ti Biblia bajcheʼ juncojt bʌteʼel siete bʌ i jol (Apocalipsis 19:19-21).

¿Chuqui mi caj i yujtel cheʼ tsaʼix ñumi jiñi gran tribulación?

•   Mi caj i ñujpʼel Satanás yicʼot i xibajob. Juntiquil wen pʼʌtʌl bʌ ángel mi caj i choc ochel yaʼ ti «abismo» jiñi Satanás yicʼot i xibajob (Apocalipsis 20:​1-3). Yaʼi maʼañic chuqui miʼ mejlel i melob come lajal bajcheʼ chʌmeñob. Jiñi abismo cheʼʌch bajcheʼ cʌjchel ti cárcel, jin chaʼan Satanás maʼañic mi caj ti loqʼuel chaʼan miʼ lotin jiñi quixtañujob (Apocalipsis 20:7).

•   Mi caj i tejchel jiñi Mil jab. Ti jimbʌ ora, mi caj i tejchel jiñi Mil jab i yumʌntel Dios, jiñi mi caj i chʼʌm tilel cabʌl bendición tiʼ tojlel lac piʼʌlob (Apocalipsis 5:9, 10; 20:4, 6). Ila ti pañimil, yonlel lac piʼʌlob cuxul mi caj i yajñelob cheʼ bʌ miʼ ñumel jiñi gran tribulación i mi caj i qʼuelob cheʼ bʌ miʼ tejchel jiñi Mil jab (Apocalipsis 7:9, 14; Salmos 37:9-11).