Maʼañic, maʼañic baʼ ora mi caj i jisʌntel, i pulel o i qʼuextʌntel yicʼot yambʌ. Jiñi Biblia miʼ yʌl chaʼan Dios tsiʼ mele ili Lum chaʼan miʼ chumtʌntel tiʼ pejtelel ora.

•   «Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:29).

•   «Tsaʼix a waʼchoco jini pañimil tiʼ cʼʌclib. Chaʼan maʼanic miʼ yajlel tiʼ pejtelel ora» (Salmo 104:5).

•   «Jini lum an tiʼ pejtelel ora» (Eclesiastés 1:4).

•   «Lac Yum, jiñʌch Dios. Tsiʼ mele panchan yicʼot pañimil, yicʼot pejtelel chuqui tac an. Mach lolomic tsiʼ mele pañimil. Tsiʼ mele chaʼan i chumlib winicob» (Isaías 45:18).

 Ili Pañimil maʼañic mi caj i jilel ti jiñi contaminación, guerra tac o ti yan tac bʌ chuqui tac miʼ melob jiñi wiñicob. Dios maʼañic mi caj i yʌcʼ chaʼan cheʼ miʼ yujtel. Jiñi Biblia miʼ yʌl chaʼan Dios mi caj i «jisañob jiñi woli bʌ i jisañob pañimil» (Apocalipsis 11:18). ¿Bajcheʼ mi caj i mel?

 Dios mi caj i jisan jiñi yumʌlob mach bʌ yujilobic cʌntʌntel ili Pañimil, cojach mi caj i yajñel jiñi Yumʌntel am bʌ ti panchan (Daniel 2:44; Mateo 6:9, 10). Jiñi Yumʌl muʼ bʌ caj i chaʼlen yumʌntel jiñʌch i Yalobil Dios, Jesucristo (Isaías 9:6, 7). Cheʼ bʌ Jesús wʌʼan ila ti Pañimil tsiʼ tiqʼui jiñi icʼ yicʼot jaʼal (Marcos 4:35-41). Cheʼ miʼ cajel ti Yumʌntel ila ti Pañimil jiñʌch mi caj i yajñel tiʼ pʼʌtʌlel pejtelel chuqui an. Mi caj i chaʼ tojʼesan ili Pañimil lajal mi caj i cʌy bajcheʼ jiñi pʌcʼʌbʌl Edén ti wajali (Mateo 19:28; Lucas 23:43).

 Maʼañic. Cheʼ bʌ miʼ yʌlob bajcheʼ iliyi mach tojic miʼ chʼʌmbeñob i sujm muʼ bʌ i yʌl 2 Pedro 3:7, yaʼi miʼ yʌl: «Jiñi panchan yicʼot jiñi pañimil am bʌ ili ora cʌylem chaʼan miʼ jisʌntel ti cʼajc». Laʼ laj qʼuel chaʼchajp wen ñuc bʌ i cʼʌjñibal muʼ bʌ i coltañonla lac chʼʌmben i sujm ili texto:

1.   Yaʼ ti Biblia, jiñi tʼan panchan, lum yicʼot cʼajc an cabʌl i sujmlel. Jumpʼejl ejemplo, Salmo 96:11 miʼ yʌl: «Laʼ i yubin tijicña jini panchan yicʼot pañimil». Cheʼ miʼ yʌl, «pañimil» ti ili versículo woliʼ taj ti tʼan jiñi lac piʼʌlob.

2.   Jiñi yambʌ versículo tac am bʌ yaʼ ti 2 Pedro 3:7 miʼ tsictesan chuqui yom i yʌl «jiñi panchan», «pañimil» yicʼot jiñi «cʼajc» muʼ bʌ i yʌl ti versículo 7. Yaʼ ti versículo 5 yicʼot 6 miʼ taj ti tʼan jiñi Butʼjaʼ cheʼ ti yorajlel Noé. Ti jimbʌ ora jiñi butʼjaʼ tsiʼ jisa jiñi jontoloʼ bʌ wʌʼ ti pañimil. Ti yambʌ tʼan tsaʼ jisʌnti jiñi «lum» (Génesis 6:11). Cheʼ jaʼel tsaʼ jili jiñi «panchan», yom bʌ i yʌl, jiñi yumʌloʼ bʌ ti jimbʌ ora. Jiñi Pañimil maʼañic tsaʼ jili, tsaʼ bʌ jili jiñʌch jiñi jontoloʼ bʌ. Noé yicʼot i familia cuxul tsaʼ cʌleyob i tsaʼ caji i chaʼ butʼob ili Pañimil (Génesis 8:15-18).

 Lajal bajcheʼ jiñi Butʼjaʼ cheʼ tiʼ yorajlel Noé tsiʼ jisa jiñi jontoloʼ bʌ, jiñi «cʼajc» muʼ bʌ i yʌl 2 Pedro 3:7 yom i yʌl i jisʌntel jiñi lac piʼʌlob jontoloʼ bʌ, mach jiñic jiñi pañimil. Dios miʼ subeñonla chaʼan «an tsijiʼ bʌ panchan yicʼot tsijiʼ bʌ pañimil [...] i yaʼi mi caj i mejlel chuqui toj» (2 Pedro 3:13). Jiñi «tsijiʼ bʌ pañimil», yom i yʌl jiñi lac piʼʌlob toj bʌ i melbalob, i jiñi «tsijiʼ bʌ panchan» jiñʌch jumpʼejl tsijiʼ bʌ yumʌntel, i Yumʌntel Dios. Ili Pañimil mi caj i sujtel ti jumpʼejl utsʼatax bʌ paraíso cheʼ wolix ti yumʌntel jiñi i Yumʌntel Dios (Apocalipsis 21:1-4).