Maʼañic. Mach tiʼ pejtelelic jiñi ñopbalʌl tac miʼ lʌcʼtesañonla ti Dios. Yaʼ ti Biblia mi lac taj cabʌl ejemplo muʼ bʌ i pʌs chaʼan mach tiʼ pejtelelic jiñi ñopbalʌl tac miʼ lʌcʼtesañonla ti Dios. Laʼ laj qʼuel chaʼchajp.

Ñaxam bʌ: Muʼ bʌ i chʼujutesañob dios tac mach bʌ i sujmic

 Jiñi Biblia miʼ pʌs chaʼan maʼañic i cʼʌjñibal cheʼ mi lac chʼujutesan jiñi dios mach bʌ i sujmic (Jeremías 10:3-5; 16:19, 20). Jehová tsiʼ sube jiñi i tejclum Israel: «Mach a ñop yambʌ dios» (Éxodo 20:3, 23; 23:24). a Cheʼ bʌ jiñi israelitajob tsiʼ chʼujutesayob yambʌ dios, jiñi lac Yum Jehová tsiʼ michʼleyob (Números 25:3; Levítico 20:2; Jueces 2:13, 14).

 Cʼʌlʌl ili ora Dios maʼañic miʼ mulan cheʼ miʼ chʼujutesʌntel muʼ bʌ i poj subentelob ti «diosob» (1 Corintios 8:5, 6; Gálatas 4:8). Jiñi yomoʼ bʌ i melben i yeʼtel Dios miʼ suben chaʼan yom miʼ loqʼuelob ti jiñi ñopbalʌl mach bʌ i sujmic. Jiñi Biblia miʼ yʌl: «Loqʼuenla yaʼ baqui añob yicʼot tʌtsʼʌ laʼ bʌ» (2 Corintios 6:14-17). Cheʼ muqʼuic i lʌcʼtesañonla ti Dios pejtelel jiñi ñopbalʌl tac, ¿muʼ ba caj i yʌcʼ ili mandar?

I chaʼpʼejlel: Jiñi mach bʌ cheʼic miʼ chʼujutesañob Dios cheʼ bajcheʼ miʼ mulan

 Jehová maʼañic tsiʼ mulaj cheʼ bʌ jiñi israelitajob tsaʼ caji i chʼujutesañob jiñi dios mach bʌ i sujmic i tsiʼ xʌbʌyob jiñi i sujm bʌ chʼujutesaya yicʼot mach bʌ i sujmic (Éxodo 32:8; Deuteronomio 12:2-4). Jesús tsiʼ tiqʼuiyob jiñi tsʼijbayob yicʼot fariseojob tiʼ caj bajcheʼ woliʼ chʼujutesañob Dios. Come miʼ poj pʌsob chaʼan wen xucʼulob ti Dios, pero tiʼ sujm maʼañic woliʼ tsʼʌctesañob jiñi ñuc tac bʌ i cʼʌjñibal am bʌ yaʼ ti Mandar, «jiñi tojel, jiñi pʼuntaya yicʼot jiñi xucʼtʌlel» (Mateo 23:23).

 Jiñi ñopbalʌl muʼ bʌ i lʌcʼtesañonla ti Dios jiñʌch jiñi muʼ bʌ i pʌs jiñi i sujmlel am bʌ ti Biblia (Juan 4:24; 17:17; 2 Timoteo 3:16, 17). Jiñi cʌntesa tac am bʌ tiʼ contra muʼ bʌ i yʌl jiñi Biblia miʼ ñajtʼesañob ti Dios jiñi lac piʼʌlob. Cabʌl miʼ ñopob chaʼan jiñi cʌntesa chaʼan Trinidad, chaʼan an lac chʼujlel mach bʌ yujilic chʌmel yicʼot jiñi infierno loqʼuem ti Biblia. Pero tiʼ sujm tilem tiʼ chʼujutesʌntel jiñi dios tac mach bʌ i sujmic. Ili cʌntesa tac maʼañic i cʼʌjñibal come i ñaʼtʌbalob jach jiñi wiñicob i mach cheʼic cheʼ bajcheʼ miʼ yʌl Dios (Marcos 7:7, 8).

 Cheʼ jaʼel, Dios tsʼaʼ miʼ qʼuel jiñi lot tac am bʌ ti ñopbalʌl (Tito 1:16). Jiñi i sujm bʌ ñopbalʌl muʼ bʌ i coltañonla chaʼan mi lac lʌcʼtesan lac bʌ ti Dios, mach chuculic jach ti costumbre jiñʌch muʼ bʌ i coltañonla ti laj cuxtʌlel. Jiñi Biblia miʼ yʌl: «Mi an muʼ bʌ i lon ñaʼtan chaʼan woliʼ chʼujutesan Dios pero maʼañic miʼ ticʼ i yacʼ, woliʼ bajñel lotin i pusicʼal i maʼañic i cʼʌjñibal jiñi i chʼujutesaya. Tiʼ wut jiñi lac Dios yic’ot lac Tat, jiñi sʌc bʌ ñopbalʌl yicʼot mach bʌ añic i bibiʼlel jiñʌch iliyi: Cheʼ mi laj cʌntan jiñi mebaʼob yicʼot jiñi mebaʼ xʼixicob cheʼ bʌ añob ti wocol yicʼot maʼañic mi lac toyben i bibiʼlel jiñi pañimil» (Santiago 1:26, 27; nota).