Jiñi Biblia miʼ yʌl chaʼan mach yomic mi lac melben oración jiñi imagen tac. Cojach yom mi lac pejcan Dios ti oración yicʼot yom mi lac mel tiʼ cʼabaʼ Jesús. «Chaʼlenla oración cheʼ bajcheʼ jini: C Tat lojon añet bʌ ti panchan, laʼ chʼujutesʌntic a cʼabaʼ» (Mateo 6:9, I tʼan Dios [ITD]). Jesús maʼañic baʼ ora tsiʼ yʌlʌ chaʼan yom mi lac melben oración jumpʼejl imagen o yambʌ mach bʌ jiñic jiñi i sujm bʌ Dios.

 Jesús tsiʼ yʌlʌ jaʼel: «Joñoñʌch jiñi bij, jiñi i sujmlel yicʼot jiñi cuxtʌlel. Maʼañic majch miʼ mejlel ti cʼotel baʼan jiñi Tatʌl mi mach tic tojlelic» (Juan 14:6). Cojach Jesús miʼ mejlel i pejcan Dios chaʼan miʼ cʼajtin chaʼañonla (Hebreos 7:25).

¿Mejl ba lac pejcan Dios ti oración, i cheʼ jaʼel jiñi imagen tac?

 Ti jumpʼejl bʌ qʼuin cheʼ bʌ Satanás yom chaʼan Jesús miʼ yajlel ti mulil, Jesús tsiʼ jacʼʌ: «Cucu, Satanás, come tsʼijbubil: ‹Yom maʼ chʼujutesan a Yum Dios. Cojach jini yom maʼ yuman›» (Mateo 4:10, ITD).

 Dios mi caj i michʼan mi mach jiñic mi lac pejcan ti oración. Jiñi libro i chaʼan Apocalipsis miʼ yʌl chaʼan cheʼ bʌ jiñi apóstol Juan tsiʼ ñocchoco i bʌ chaʼan miʼ chʼujutesan juntiquil ángel, jiñi ángel tsiʼ tiqʼui: «Mach cheʼic yom maʼ chaʼlen. I winicon Dios lajal bajcheʼet yicʼot a wermanojob muʼ bʌ i jacʼbeñob i tʼan Jesús. Chʼujutesan Dios» (Apocalipsis 19:10, ITD).