Jiñi lac piʼʌlob maʼañic baʼ ora mi caj i tajob jiñi ñʌchʼtʌlel tiʼ petol pañimil anquese miʼ lon chaʼleñob wersa. Laʼ laj qʼuel chucoch:

•   Jiñi wiñic «mach mejlic i bajñel yajcan i bijlel» (Jeremías 10:23). Jiñi wiñicob maʼañic tsaʼ mejliyob chaʼan miʼ bajñel yumañob i bʌ. Jin chaʼan, maʼañic miʼ mejlel i chʼʌmob tilel ñʌchʼtʌlel ila ti pañimil.

•   «Mach mi laʼ wʌcʼ laʼ pusicʼal yicʼot jini yumʌlob ti pañimil, come winicob jach. Mach muqʼuic i coltañonla. Cheʼ miʼ cʌy i japob icʼ miʼ sujtelob ti lum. Ti jini jach bʌ qʼuin miʼ toʼol jilel chuqui tsiʼ ñaʼtayob i mel» (Salmo 146:3, 4). Mi jiñicto jiñi wem bʌ yumʌlob miʼ mejlel i jisañob jiñi muʼ tac bʌ i tech jiñi guerra.

•   «Ti jiñi cojix tac bʌ qʼuin wen wocol miʼ cajel yicʼot bʌbʌqʼuen. Come jiñi lac piʼʌlob [...] wen jontolob, maʼañic mi caj i cʼuxbiñob chuqui wen, mi caj i melob mach bʌ weñic tiʼ tojlel i yamigojob, miʼ waʼ melob chuqui yomob, ñumen ñuc mi caj i yubiñob i bʌ» (2 Timoteo 3:1-4). Chumulonla ti «jiñi cojix tac bʌ qʼuin» chaʼan ili jontol bʌ pañimil, i tiʼ caj jiñi mach bʌ weñic i melbal jiñi quixtañujob jiñʌch muʼ bʌ i yʌcʼ chaʼan maʼañic ñʌchʼtʌlel.

•   «¡Pʼumpʼun jax jiñi pañimil yicʼot jiñi mar! Come jiñi Diablo tsaʼix jubi yaʼ baqui añetla i wen michʼ, come yujil chaʼan tsʼitaʼ jax i yorajlel cʌylem i chaʼan» (Apocalipsis 12:12). Jiñi ñaxam bʌ i contra Dios, jiñi Diablo, tsaʼ chojqui jubel ila ti Lum i woliʼ yʌcʼ chaʼan jiñi lac piʼʌlob jontol miʼ melob i bʌ jaʼel. Cheʼ bʌ jinto woli i chaʼlen yumʌntel ila ti pañimil maʼañic baʼ ora miʼ cajel ñʌchʼtʌlel (Juan 12:31).

•   «[Jiñi i Yumʌntel Dios] mi caj i laj jisan pejtel jini yumʌlob [muʼ bʌ i contrajiñob Dios]. Mi caj i yajñel tiʼ pejtelel ora» (Daniel 2:44). Mach jiñic jiñi yumʌlob añoʼ bʌ ti pañimil muʼ bʌ caj caj i chʼʌmob tilel ñʌchʼtʌlel tiʼ pejtelel ora, jiñʌch i Yumʌntel Dios (Salmo 145:16).