¿Muʼ ba i mejlel c taj i ñuqʼuesʌntel c pusicʼal yaʼ ti Biblia?
I jacʼbal muʼ bʌ i yʌcʼ jiñi Biblia
Mucʼʌch (Romanos 15:4). Cabʌl lac piʼʌlob woliʼ ñusañob tsʌts tac bʌ wocol yicʼot mach tijicñayobic miʼ yubiñob i bʌ, i an i tajayob i ñuqʼuesʌbentel i pusicʼal yaʼ ti Biblia.
Ti ili tema mi caj lac qʼuel chaʼpʼejl uxpʼejl versículo muʼ bʌ i mejlel i coltañet ti ili wocol tac:
Tsʌts tac bʌ wocol
Salmo 23:4: «Cheʼ mic ñumel ti icʼyochʼan bʌ ti yebal jajp wits baʼ bʌbʌqʼuen mic chʌmel. Maʼanic chuqui mic bʌcʼñan come wʌʼ añet quicʼot».
Yom bʌ i yʌl: Cheʼ maʼ pejcan Dios ti oración yicʼot maʼ sʌclan a coltʌntel ti Biblia, mi caj i yʌqʼueñet a chʼejlel chaʼan maʼ lʌtʼ jiñi a wocol tac.
Filipenses 4:13: «An c pʼʌtʌlel chaʼan chuqui jach mic mel wocolix i yʌlʌ jiñi muʼ bʌ i yʌqʼueñon c pʼʌtʌlel».
Yom bʌ i yʌl: Dios miʼ mejlel i yʌqʼueñet a pʼʌtʌlel chaʼan maʼ lʌtʼ baqui jach bʌ wocol.
Cheʼ bʌ an majqui miʼ chʌmel a chaʼan
Eclesiastés 9:10: «Maʼanix eʼtel baʼ maʼ majlel [o mucoñibʌl]. Maʼanix chuqui maʼ wis ñaʼtan a mel».
Yom bʌ i yʌl: Jiñi tsaʼix bʌ chʌmiyob maʼañix chuqui miʼ yubiñob, jin chaʼan maʼañic woliʼ ñusañob wocol i maʼañic miʼ mejlel i ticʼlañoñobla.
Hechos 24:15: «Mi caj i chaʼ chʼojyelob».
Yom bʌ i yʌl: Dios miʼ mejlel i chaʼ cuxtesan jiñi tsaʼ bʌ chʌmiyob a chaʼan.
Cheʼ wen an a mul maʼ wubin
Salmo 86:5: «Isujm utsʼatet, c Yum [Jehová] a, maʼ ñusʌbeñon lojon c mul. Maʼ pʌsbeñob i yutslel a pusicʼal pejtel muʼ bʌ i pejcañetob».
Yom bʌ i yʌl: Dios miʼ ñusʌbeñob i mul jiñi mucʼʌch bʌ i chaʼ ñaʼtañob i bʌ tiʼ sujm tiʼ caj tsaʼ bʌ i meleyob ti wajali yicʼot mi machʌch añix miʼ chʌn melob tsaʼ bʌ i meleyob ti wajali.
Salmo 103:12: «Cheʼ bajcheʼ i ñajtlel pañimil cʼʌlʌl tiʼ pasibal qʼuin cʼʌlʌl tiʼ bʌjlibal qʼuin, cheʼʌch tsiʼ chocbeyonla lac mul».
Yom bʌ i yʌl: Cheʼ bʌ Dios miʼ ñusan lac mul, maʼañic miʼ chʌn cʼajtesan chaʼan miʼ yʌqʼueñonla la cubin lac chʼijyemlel o chaʼan miʼ yʌqʼueñonla lac toj lac mul. Mucʼʌch i junyajlel ñajʌtesan.
Chʼijyemlel
Salmo 31:7: «Tsaʼ qʼueleyon ti wocol. Tsaʼ cʌmbeyon c pusicʼal ti wocol».
Yom bʌ i yʌl: Dios yujil pejtelel chuqui woli a ñusan. Miʼ wen chʼʌmben i sujm bajcheʼ yubil woli a wubin a bʌ, anquese yañoʼ bʌ maʼañic miʼ chʼʌmbeñob i sujm.
Salmo 34:18: «Lʌcʼʌl an lac Yum baʼan chʼijiyemoʼ bʌ i pusicʼal. Miʼ coltan jini woli bʌ i melob i pusicʼal».
Yom bʌ i yʌl: Dios miʼ yʌcʼ i tʼan chaʼan maʼañic mi caj i cʌyet cheʼ bʌ chʼijyem maʼ wubin a bʌ. Miʼ mejlel i yʌqʼueñet a pʼʌtʌlel chaʼan maʼ lʌtʼ jiñi a chʼijyemlel.
Cʼamʌjel
Salmo 41:3: «Lac Yum mi caj i cʌntan cheʼ cʼam».
Yom bʌ i yʌl: Dios miʼ mejlel i yʌqʼueñet a ñʌchʼtʌlel cheʼ bʌ an jumpʼejl tsʌts bʌ a cʼamʌjel, miʼ yʌqʼueñet a pʼʌtʌlel yicʼot a ñaʼtʌbal chaʼan wen chuqui maʼ yajcan a mel.
Isaías 33:24: «Maʼanix mi juntiquilic muʼ bʌ caj i yʌl: «Cʼamon».
Yom bʌ i yʌl: Dios miʼ yʌc i tʼan chaʼan ti jumpʼejl bʌ qʼuin pejtelel jiñi lac piʼʌlob ila ti Lum cʼocʼ mi caj i yajñelob.
Cʌlʌx pensar
Salmo 94:19: «Cheʼ woliyon ti tsic pusicʼal chaʼan cabʌl chuqui mic ñaʼtan, maʼ ñuqʼuesʌbeñon c pusicʼal».
Yom bʌ i yʌl: Mi mucʼʌch lac sʌclan Dios cheʼ bʌ wen woliyonla ti pensar, mi caj i coltañonla chaʼan maʼañic mi lac sʌt lac ñʌchʼtʌlel.
1 Pedro 5:7: Acʼʌla «pejtelel chuqui mi laʼ cʼojoʼtan tiʼ tojlel, come Dios mucʼʌch i ñaʼtañetla».
Yom bʌ i yʌl: Dios i wentajʌch jiñi muʼ bʌ lac ñusan, jin chaʼan yom chaʼan mi lac suben pejtelel muʼ bʌ lac pensarin.
Guerra
Salmo 46:9: «Miʼ yujtesan guerra cʼʌlʌl tiʼ pejtelel pañimil».
Yom bʌ i yʌl: Mach jalix yom, i Yumʌntel Dios mi caj i jisan jiñi guerra tac.
Salmo 37:11, 29: «Jini utsoʼ bʌ i pusicʼal mi caj i yʌqʼuentelob i wenlel. Tijicña mi caj i yubiñob cheʼ ñʌchʼʌlob i pusicʼal». «Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora».
Yom bʌ i yʌl: Jiñi lac piʼʌlob weñoʼ bʌ i pusicʼal ñʌchʼʌl mi caj i chumtʌlob tiʼ pejtelel ora ila ti Pañimil.
Cheʼ maʼ wen pensarin jiñi talto bʌ qʼuin
Jeremías 29:11: «Cujil chuqui com c melbeñetla, cheʼen lac Yum. Com ñʌchʼʌletla. Mach comic miʼ tajetla wocol. Com cʌqʼueñetla chuqui utsʼat woli bʌ laʼ pijtan».
Yom bʌ i yʌl: Dios miʼ suben i tejclum chaʼan utsʼatax bajcheʼ mi caj i chumtʌlob ti talto bʌ qʼuin.
Apocalipsis 21:4: «Mi caj i sujcubeñob i yaʼlel i wut, maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel. Jiñi an tac bʌ ti ñaxan tsaʼix jili».
Yom bʌ i yʌl: Dios miʼ yʌl chaʼan mi caj i jisan jiñi jontolil am bʌ ila ti pañimil.
a Jehová jiñʌch i cʼabaʼ Dios (Salmo 83:18, Traducción del Nuevo Mundo). Pejcan jiñi tema «¿Majqui Jehová?».