¿Chuqui mi laj cʌn tiʼ tojlelob jiñi xʼixicob muʼ bʌ i yʌjlelob yaʼ ti Biblia?

JAMΛ TI

I jacʼbal muʼ bʌ yʌcʼ jiñi Biblia

Jiñi Biblia miʼ taj ti tʼan cabʌl xʼixicob i cabʌl chuqui miʼ mejlel laj cʌn tiʼ tojlelob (Romanos 15:4; 2 Timoteo 3:16, 17). Ti ili tema mi caj lac tsʼitaʼ qʼuel chuqui tsiʼ meleyob. An tsaʼ bʌ i pʌsʌyob wem bʌ ejemplo i an maʼañic bʌ (1 Corintios 10:11; Hebreos 6:12).

Abigail

¿Majqui jiñi Abigail? I yijñam Nabal, juntiquil wiñic wen am bʌ i taqʼuin i wen jontol. Abigail juntiquilʌch xʼixic am bʌ i ñaʼtʌbal yicʼot i pecʼlel, cheʼ jaʼel wen utsʼatax yicʼot miʼ mel muʼ bʌ i mulan Jehová (1 Samuel 25:3).

¿Chuqui tsiʼ mele? Abigail tsaʼʌch i pʌsʌ i ñaʼtʌbal i an chuqui tsiʼ mele chaʼan maʼañic miʼ yujtel tsʌts bʌ wocol. Chumul yaʼ baqui woliʼ mujcun i bʌ David, muʼ bʌ caj i sujtel ti rey. Cheʼ bʌ David yicʼot i wiñicob yaʼ woliʼ mujcuñob i bʌ yaʼi miʼ cʌntʌben i tiñʌmeʼ Nabal chaʼan maʼañic miʼ xujchʼintel. Ti jumpʼejl bʌ qʼuin, David tsiʼ choco majlel i wiñicob chaʼan miʼ cʼajtibeñob bʌlñʌcʼʌl Nabal, pero Nabal mach wen tsiʼ jacʼʌ i maʼañic tsiʼ coltayob. Jin chaʼan David tsaʼ wen michʼa i tsiʼ ñaʼta i tsʌnsan Nabal yicʼot i wiñicob (1 Samuel 25:10-12, 22).

Abigail tsaʼ cʼoti i yubin tsaʼ bʌ i mele i ñoxiʼal, jin chaʼan ti ora tsiʼ ñaʼta chuqui yom miʼ mel. Tsiʼ choco majlel jiñi xʼeʼtelob i chaʼan chaʼan miʼ chʼʌmbeñob majlel bʌlñʌcʼʌl David yicʼot i wiñicob. I yaʼ tsaʼ majli jaʼel chaʼan miʼ cʼajtin chaʼan miʼ ñusʌben i mul i ñoxiʼal (1 Samuel 25:14-19, 24-31). David mach cojach tsiʼ qʼuele jiñi majtan tsaʼ bʌ i yʌqʼue, tsaʼʌch i qʼuele jaʼel chaʼan juntiquilʌch xʼixic am bʌ i pecʼlel. David tsaʼʌch i ñʌchʼta tsaʼ bʌ i yʌlʌ Abigail i tsiʼ qʼuele chaʼan jiñʌch Dios woli bʌ i cʼʌn chaʼan maʼañic miʼ yujtel wocol (1 Samuel 25:32, 33). Ti wiʼil, Nabal tsaʼ chʌmi i Abigail tsaʼ sujti tiʼ yijñam David (1 Samuel 25:37-41).

¿Chuqui mi laj cʌn tiʼ tojlel? Anquese Abigail wen utsʼatax yicʼot wen an i taqʼuin, maʼañic tsiʼ qʼuele i bʌ ti ñuc. Chaʼan miʼ tojʼesʌntel jumpʼejl wocol tsiʼ cʼajti i ñusʌbentel anquese mach jiñic tsiʼ mele mach bʌ weñic. Wen jach bajcheʼ tsiʼ tojʼesa jiñi wocol, tsiʼ pʌsʌ i chʼejlel yicʼot i ñaʼtʌbal.

▸ Mi a wom a ñumen cʌn tiʼ tojlel Abigail, pejcan jiñi tema «Una mujer sensata».

Ana

¿Majqui jiñi Ana? I yijñam Elqaná yicʼot i mamá Samuel, tsaʼ bʌ sujti ti xʼaltʼan ti Israel (1 Samuel 1:1, 2, 4-7).

¿Chuqui tsiʼ mele? Ana tsiʼ sʌcla i coltʌntel ti Dios come maʼañic i yalobil. Jiñi i ñoxiʼal Ana an yambʌ i yijñam i cʼabaʼ Peniná, añʌch i yalobil i ba. Peniná tiʼ pejtelel ora miʼ wajlen Ana, jin chaʼan Ana tsiʼ pejca Dios chaʼan miʼ ñuqʼuesʌben i pusicʼal. Cheʼ jaʼel, tiʼ sube Jehová chaʼan mi tsiʼ yʌqʼue juntiquil chʼiton bʌ i yalobil mi caj i chaʼ aqʼuen chaʼan miʼ melben i yeʼtel yaʼ ti tabernáculo. Jiñi tabernáculo jiñʌch pisil bʌ otot muʼ bʌ mejlel i chʼʌmob majlel baqui jach (1 Samuel 1:11).

Dios tsiʼ jacʼbe i yoración Ana i tsiʼ yʌqʼue juntiquil i yalobil, tsaʼ bʌ i yotsʌbe tiʼ cʼabaʼ Samuel. Cheʼʌch bajcheʼ tsiʼ wʌn alʌ Ana tsaʼʌch i pʌyʌ majlel Samuel chaʼan miʼ chaʼlen eʼtel yaʼ ti tabernáculo (1 Samuel 1:27, 28). Ti jujumpʼejl jab, Ana miʼ tsʼisben i bujc Samuel i chʼʌmben majlel. Tiʼ wiʼil, Dios tsiʼ yʌqʼue yambʌ joʼtiquil i yalobil, uxtiquil chʼiton yicʼot chaʼtiquil xchʼoc (1 Samuel 2:18-21).

¿Chuqui mi laj cʌn tiʼ tojlel? Ana tsaʼʌch i lʌtʼʌ jiñi wocol come tsaʼʌch i wen mele oración. Ti 1 Samuel 2:1-10 mi lac taj jiñi oración tsaʼ bʌ i melbe Jehová chaʼan miʼ yʌqʼuen wocolix i yʌlʌ. Tsiʼ pʌsʌ chaʼan wen pʼʌtʌlʌch i ñopoñel.

▸ Mi a wom a ñumen cʌn tiʼ tojlel Ana, pejcan jiñi tema «Le abrió su corazón a Jehová».
▸ Mi a wom a ñaʼtan chucoch Dios tsiʼ yʌcʼʌ chaʼan mach juntiquil jach i yijñam jiñi wiñic ti wajali, pejcan jiñi tema «¿Aprueba Dios la poligamia?».

Dalila

¿Majqui jiñi Dalila? Jiñʌch jiñi xʼixic tsaʼ bʌ i mulaj Sansón, juez bʌ ti Israel (Jueces 16:4, 5).

¿Chuqui tsiʼ mele? Dalila tsiʼ jacʼʌ i chʼʌm jiñi taqʼuin tsaʼ bʌ i yʌqʼueyob jiñi yumʌlob filisteojoʼ bʌ chaʼan miʼ yʌqʼueñob Sansón tiʼ cʼʌb. Jehová tsiʼ cʼʌñʌ Sansón chaʼan miʼ coltan jiñi israelitajob tiʼ tojlel jiñi filisteojob. Ili i contrajob maʼañic miʼ mejlel i mʌlbeñob Sansón come Jehová tsiʼ yʌqʼue cabʌl i pʼʌtʌlel (Jueces 13:5). Jin chaʼan, ili filisteojob tsiʼ cʼajtibeyob i coltaya Dalila.

Jiñi filisteojob tsiʼ yʌqʼueyob taqʼuin Dalila chaʼan miʼ cʼajtiben Sansón baqui tilem i pʼʌtʌlel, ti wiʼil tsaʼʌch mejli i ñaʼtan baqui tilem i pʼʌtʌlel (Jueces 16:15-17). Dalila tsiʼ sube jiñi filisteojob baqui tilem jiñi i pʼʌtʌlel Sansón, i cheʼ bajcheʼ jiñi tsaʼ mejli i chucob yicʼot i ñupʼob jiñi Sansón (Jueces 16:18-21).

¿Chuqui mi laj cʌn tiʼ tojlel? Dalila tsiʼ wen mulaj taqʼuin. Jin jach tsiʼ bajñel ñaʼta i bʌ i mach xucʼulic tsaʼ ajñi tiʼ tojlel juntiquil i wiñic Dios. Mach yomic mi lac lajin ili xʼixic.

Débora

¿Majqui jiñi Débora? Juntiquil xʼaltʼan i chaʼan Jehová, i Dios Israel. Jehová tsiʼ cʼʌñʌ chaʼan miʼ suben jiñi israelitajob chuqui yom miʼ melob i chaʼan bajcheʼ yom miʼ tojʼesañob jiñi wocol tac (Jueces 4:4, 5).

¿Chuqui tsiʼ mele? Ili xʼaltʼan tsiʼ pʌsʌ i chʼejlel i tsiʼ colta jiñi muʼ bʌ i chʼujutesañob Dios. Jehová tiʼ sube chaʼan miʼ yʌcʼ ti pʌyol Barac i miʼ suben chaʼan miʼ pʌy majlel jiñi soldadojob israelitajoʼ bʌ chaʼan miʼ contrajiñob jiñi cananeojob (Jueces 4:6, 7). Ti wiʼil, Barac tiʼ sube Débora chaʼan miʼ majlel yicʼot. Débora maʼañic tsiʼ chaʼle bʌqʼuen i tsaʼʌch i jacʼʌ majlel (Jueces 4:8, 9).

Dios tsiʼ colta jiñi israelitajob chaʼan miʼ mʌlbeñob jiñi i contrajob. Débora tsiʼ xutʼ mele jiñi cʼay tsaʼ bʌ i cʼʌyi yicʼot Barac. Ti jiñi cʼay tsiʼ yʌlʌyob chuqui tsaʼ ujti. I Débora tsiʼ taja tiʼ tʼan Jael, juntiquil xʼixic wen chʼejl bʌ tsaʼ bʌ i coltayob chaʼan miʼ mʌlbeñob jiñi cananeojob (Jueces, capítulo 5).

¿Chuqui mi laj cʌn tiʼ tojlel? Débora miʼ wen mulan i coltan yañoʼ bʌ i wen an i chʼejlel. Tiʼ sube yambʌlob chaʼan miʼ melob muʼ bʌ i mulan Dios. Cheʼ bʌ jiñi yañoʼ bʌ mucʼʌch i melob muʼ bʌ i mulan Dios, Débora miʼ subeñob chaʼan weñʌch tsaʼ bʌ i meleyob.

▸ Mi a wom a ñumen cʌn tiʼ tojlel Débora, pejcan jiñi tema «Me levanté como madre en Israel».

Ester

¿Majqui jiñi Ester? Juntiquilʌch xchʼoc judía bʌ, i jiñi rey Asuero tsiʼ yajca chaʼan miʼ yochel bajcheʼ reina.

¿Chuqui tsiʼ mele? Ester tsiʼ colta jiñi i tejclum chaʼan maʼañic miʼ tsʌnsʌntelob. Tsiʼ yubi chaʼan tsaʼ ajqui jumpʼejl mandar muʼ bʌ i yʌcʼ jumpʼejl fecha chaʼan miʼ tsʌnsʌntelob jiñi judíojob añoʼ bʌ tiʼ wenta jiñi persajob. Hamán, juntiquil wiñic am bʌ i yeʼtel, jiñʌch tsaʼ bʌ i yʌcʼʌ ti melol jiñi mandar (Ester 3:13-15; 4:1, 5). Anquese miʼ mejlel ti tsʌnsʌntel, Ester tsaʼʌch i sube jiñi i ñoxiʼal muʼ bʌ caj i yujtel. I jiñi i primo Mardoqueo tsiʼ colta (Ester 4:10-16; 7:1-10). Jin chaʼan, jiñi rey Asuero tsiʼ yʌcʼʌ chaʼan Ester yicʼot Mardoqueo miʼ yʌcʼob yambʌ mandar chaʼan jiñi judíojob miʼ mejlel i coltañob i bʌ. Ti wiʼil, jiñi judíojob tsaʼʌch mejli i mʌlbeñob jiñi i contrajob (Ester 8:5-11; 9:16, 17).

¿Chuqui mi laj cʌn tiʼ tojlel? Jiñi reina Ester tsiʼ cʌybeyonla wem bʌ ejemplo come tsiʼ pʌsʌ i chʼejlel yicʼot i pecʼlel (Salmo 31:24; Filipenses 2:3). Anquese wen i tʼojol jax bʌ xʼixic tiʼ sʌcla i coltʌntel tiʼ tojlel yambʌlob. Wen jach bajcheʼ tsiʼ pejca i ñoxiʼal pero tsaʼʌch i pʌsʌ i chʼejlel. Cheʼ jaʼel, maʼañic tsiʼ bʌcʼña i yʌl chaʼan judía anquese wen bʌbʌqʼuen ti jiñi bʌ ora.

▸ Mi a wom a ñumen cʌn tiʼ tojlel Ester, pejcan jiñi tema «Defendió al pueblo de Dios» yicʼot «Actuó con sabiduría, valor y altruismo».

Eva

¿Majqui jiñi Eva? Jiñʌch jiñi ñaxam bʌ xʼixic yicʼot muʼ bʌ i ñaxan tajtʌl ti tʼan yaʼ ti Biblia.

¿Chuqui tsiʼ mele? Eva tsiʼ ñusa ti pʼis jiñi i mandar Dios. Tojʌch tsaʼ mejli jaʼel cheʼ bajcheʼ Adán. Jehová libre tsiʼ meleyob i miʼ mejlel i tajob jiñi wen tac bʌ melbal bajcheʼ jiñi cʼuxbiya yicʼot ñaʼtʌbal (Génesis 1:27). Eva yujil chaʼan Jehová tiʼ sube Adán chaʼan mi tsiʼ cʼuxuyob i wut jiñi teʼ mi caj i chʌmelob. Pero Satanás tsiʼ loti i tiʼ sube chaʼan maʼañic mi caj i chʌmel. Tsaʼto i sube chaʼan ñumen wen mi caj i yajñel mi tsiʼ ñusʌbe i tʼan Dios. Jin chaʼan tsiʼ cʼuxu jiñi i wut teʼ, ti wiʼil tsiʼ yʌqʼue jaʼel jiñi i ñoxiʼal (Génesis 3:1-6; 1 Timoteo 2:14).

¿Chuqui mi laj cʌn tiʼ tojlel? Jiñi tsaʼ bʌ ujti tiʼ tojlel Eva miʼ pʌsbeñonla chaʼan mach yomic mi laj cotsan ti lac pusicʼal mach tac bʌ weñic. Come tsaʼ caji i ñumen mulan i chʼʌm jiñi mach bʌ i chaʼañic, jin chaʼan tsiʼ ñusa tiʼ pʼis jiñi i mandar Dios (Génesis 3:6; 1 Juan 2:16).

Jiñi i yijñam Lot

¿Majqui jiñi i yijñam Lot? Jiñi Biblia maʼañic miʼ yʌl chuqui i cʼabaʼ. Pero miʼ yʌl chaʼan an chaʼtiquil i yixicʼal yicʼot tsaʼ chumle yaʼ ti Sodoma (Génesis 19:1, 15).

¿Chuqui tsiʼ mele? Jiñi i yijñam Lot tsiʼ ñusʌbe i tʼan Dios. Jehová tsiʼ yʌlʌ chaʼan mi caj i jisan Sodoma yicʼot yambʌ tejclum tac lʌcʼʌl tac bʌ an come mach weñobic i melbal. Come Dios miʼ cʼuxbin Lot yicʼot i familia, jin chaʼan tsiʼ choco majlel chaʼtiquil ángel chaʼan miʼ locʼsañob yaʼi i maʼañic chuqui miʼ chaʼleñob (Génesis 18:20; 19:1, 12, 13).

Jiñi ángelob tiʼ subeyob Lot yicʼot i familia chaʼan miʼ putsʼelob i chaʼan maʼañic mi sujtel i qʼuelob i pat. Mi maʼañic miʼ jacʼob mi caj i chʌmelob (Génesis 19:17). Jiñi i yijñam Lot tsiʼ qʼuele i pat i «tsaʼ sujti ti atsʼam bʌ xajlel» (Génesis 19:26).

¿Chuqui mi laj cʌn tiʼ tojlel? Jiñi tsaʼ bʌ ujti tiʼ tojlel i yijñam Lot miʼ pʌsbeñonla chaʼan mach yomic mi laj cʌlʌx qʼuel ti ñuc chubʌʼan come jiñi miʼ mejlel i yʌcʼonla chaʼan maʼañix mi lac jacʼben i tʼan Dios. Jin chaʼan, Jesús tsiʼ yʌlʌ: «Cʼajtesanla jiñi i yijñam Lot» (Lucas 17:32).

Jael

¿Majqui jiñi Jael? Jiñʌch i yijñam Héber mach bʌ israelitajic. Juntiquilʌch xʼixic wen chʼejl bʌ i tsiʼ coltʌbe i tejclum Dios.

¿Chuqui tsiʼ mele? Jael tsiʼ wen pʌsʌ i chʼejlel cheʼ bʌ Sísara, i yum jiñi soldadojob cananeojoʼ bʌ, tsaʼ ochi tiʼ yotot. Sísara tiʼ sʌtʌ jiñi guerra tiʼ tojlel israelitajob, jin chaʼan tiʼ sʌcla baqui miʼ mejlel i mujcun i bʌ. Jael tsiʼ pʌyʌ ochel tiʼ yotot chaʼan miʼ cʼaj i yo, i cheʼ bʌ wʌyʌl tiʼ tsʌnsa (Jueces 4:17-21).

Jiñi tsaʼ bʌ i mele Jael tiʼ tsʼʌctesa tsaʼ bʌ i yʌlʌ jiñi xʼaltʼan Débora: «Lac Yum woliʼ yʌcʼ Sísara tiʼ cʼʌb xʼixic» (Jueces 4:9). Chaʼan i chʼejlel jiñi Biblia miʼ yʌl chaʼan «ñumen tijicña bajcheʼ yambʌ xʼixicob» (Jueces 5:24).

¿Chuqui mi laj cʌn tiʼ tojlel? Jael tsiʼ pʌsʌ i chʼejlel i maʼañic tsiʼ pijta chaʼan an majqui miʼ suben chaʼan miʼ coltan i tejclum Dios. Jiñi tsaʼ bʌ ujti tiʼ tojlel Jael miʼ pʌs chaʼan Dios miʼ mejlel i cʼʌn majqui jach chaʼan miʼ tsʼʌctesan i tʼan.

Jezabel

¿Majqui jiñi Jezabel? Jiñʌch i yijñam Acab, rey bʌ ti Israel. Jezabel mach israelitajic i miʼ chʼujutesan Baal, i dios cananeojob, i mach jiñic miʼ chʼujutesan Jehová.

¿Chuqui tsiʼ mele? Jiñi reina Jezabel juntiquilʌch xʼixic jontol bʌ i miʼ mulan i xicʼ yambʌlob chaʼan miʼ melob chuqui yom. Tsiʼ yʌcʼʌ chaʼan yambʌ lac piʼʌlob miʼ chʼujutesañob Baal yicʼot chaʼan miʼ melob tsʼiʼlel. Cheʼ jaʼel, tsaʼto i ñopo i jisan jiñi i sujm bʌ chʼujutesaya (1 Reyes 18:4, 13; 19:1-3).

Jezabel miʼ chaʼlen lot yicʼot tsʌnsa chaʼan miʼ taj chuqui yom (1 Reyes 21:8-16). Cheʼ bajcheʼ tsiʼ wʌn alʌ Dios, bʌbʌqʼuen jax bajcheʼ tsaʼ chʌmi i maʼañic tsaʼ mujqui (1 Reyes 21:23; 2 Reyes 9:10, 32-37).

¿Chuqui mi laj cʌn tiʼ tojlel? Jezabel mach junyaj weñic i melbal i maʼañix i quisin chaʼan chuqui tac miʼ mel. Tsaʼ cʼoti ti cʌjñel bajcheʼ juntiquil xʼixic jontol bʌ yicʼot yujil bʌ tsʼiʼlel. Mach yomic mi lac lajin ili xʼixic.

Jiñi sulamita

¿Majqui jiñi sulamita? Juntiquil xchʼoc wen utsʼatax bʌ muʼ bʌ i wen tajtʌl ti tʼan yaʼ ti El Cantar de los Cantares. Jiñi Biblia maʼañic miʼ yʌl i cʼabaʼ.

¿Chuqui tsiʼ mele? Ili xchʼoc xucʼul tsaʼ ajñi tiʼ tojlel jiñi xcʌnta tʌñʌmeʼ muʼ bʌ i mulan (El Cantar de los Cantares 2:16). Pero come wen utsʼatax, jin chaʼan jiñi rey Salomón tsaʼ caji i mulan i tsiʼ ñopo i pejcan (El Cantar de los Cantares 7:6). Anquese cabʌl tsaʼ bʌ i ñopo i subeñob chaʼan miʼ jacʼben jiñi Salomón, maʼañic tsiʼ jacʼʌ come miʼ wen cʼuxbin jiñi xcʌnta tʌñʌmeʼ (El Cantar de los Cantares 3:5; 7:10; 8:6).

¿Chuqui mi laj cʌn tiʼ tojlel? Anquese wen utsʼatax ili xchʼoc maʼañic tsiʼ qʼuele i bʌ ti ñuc. Anquese jiñi yambʌlob tsaʼ caji i subeñob chaʼan mi caj i sujtel ti rica yicʼot mi caj i qʼuejlel ti ñuc mi tsiʼ taja Salomón, maʼañic tsiʼ jacʼʌ. Tsaʼʌch mejli i ticʼ i bʌ i chʌn sʌc tsaʼ ajñi tiʼ melbal.

Lea

¿Majqui jiñi Lea? Jiñʌch ñaxam bʌ i yijñam Jacob. Jiñi i yijtsʼin i cʼabaʼ Raquel tsaʼ sujti ti yambʌ i yijñam Jacob (Génesis 29:20-29).

¿Chuqui tsiʼ mele? Lea an seis i yalobil chʼitoñoʼ bʌ (Rut 4:11). Jacob tsiʼ mulaj ñujpuñel yicʼot Raquel, mach yicʼot Lea. Pero jiñi Labán, i papá ili xchʼocob, an chuqui tsiʼ mele chaʼan Jacob miʼ ñujpuñel yicʼot Lea i mach jiñic yicʼot Raquel. Cheʼ bʌ Jacob tsiʼ qʼuele chaʼan tsaʼ lotinti tsaʼ majli i pejcan Labán. I tsaʼ subenti chaʼan ñaxan yom miʼ ñujpuñel jiñi chichʌl i mach jiñic ijtsʼiñʌl. Tsaʼ ñumi jumpʼejl semana i Jacob tsaʼ ñujpuñi yicʼot Raquel (Génesis 29:26-28).

Jacob miʼ ñumen cʼuxbin Raquel (Génesis 29:30). Jin chaʼan Lea mach weñix tsaʼ caji i qʼuel jiñi i yijtsʼin. Dios yujil bajcheʼ yubil miʼ yubin i bʌ Lea, jin chaʼan tsiʼ yʌqʼue seis chʼiton bʌ i yalobil yicʼot juntiquil xchʼoc (Génesis 29:31).

¿Chuqui mi laj cʌn tiʼ tojlel? Lea tsaʼʌch i sube Dios bajcheʼ yubil miʼ yubin i bʌ, i anquese wocol tsiʼ ñusa tsaʼʌch i qʼuele chaʼan Dios woliʼ coltan (Génesis 29:32-35; 30:20). Jiñi tsaʼ bʌ i ñusa Lea miʼ pʌsbeñonla chaʼan an cabʌl wocol cheʼ mach juntiquil jach i yijñam jiñi wiñic. Jiñi yom bʌ Dios jiñʌch chaʼan juntiquil jach i yijñam jiñi wiñic (Mateo 19:4-6).

▸ Mi a wom a ñumen cʌn tiʼ tojlel Lea, pejcan jiñi tema «Dos hermanas rivales ‘edificaron la casa de Israel’».
▸ Mi a wom a ñaʼtan chucoch Dios tsiʼ yʌcʼʌ chaʼan mach juntiquil jach i yijñam jiñi wiñic ti wajali, pejcan jiñi tema «¿Aprueba Dios la poligamia?».

María (i yeran Marta yicʼot Lázaro)

¿Majqui jiñi María? I yamiga Jesús cheʼʌch bajcheʼ Lázaro yicʼot Marta.

¿Chuqui tsiʼ mele? María tsiʼ pʌsʌ chaʼan mucʼʌch i wen qʼuel ti ñuc Jesús, jiñi i Yalobil Dios. Tsaʼʌch i ñopo chaʼan Jesús miʼ mejlel i cʼoqʼuesan Lázaro, cheʼ jaʼel tsiʼ qʼuele cheʼ bʌ Jesús tsiʼ chaʼ tejchesa jiñi i yeran. Jiñi i chich i cʼabaʼ Marta, mach weñic chuqui tsiʼ yʌlʌ tiʼ tojlel come tsaʼ majli i ñʌchʼtan Jesús i maʼañic tsaʼ caji i colta ti chuqui tac yom melol tiʼ yotot. Pero Jesús tsiʼ yʌlʌ chaʼan weñʌch tsaʼ bʌ i mele María come ñaxan tsiʼ yʌcʼʌ i chaʼan bʌ Dios (Lucas 10:38-42).

Ti jumpʼejl bʌ qʼuin, María tsiʼ pʌsbe i yutslel Jesús cheʼ bʌ tsiʼ mulbe tiʼ jol yicʼot tiʼ yoc «xojocña bʌ aceite wen lets bʌ i tojol» (Mateo 26:6, 7). An mach bʌ utsʼatic tsiʼ qʼueleyob tsaʼ bʌ i mele. Pero Jesús tsiʼ colta i tsiʼ yʌlʌ: «Baqui jach miʼ sujbel ili wen tʼan, mi caj i sujbel jaʼel tsaʼ bʌ i mele ili xʼixic, i cheʼʌch mi caj i cʼajtesʌntel» (Mateo 24:14; 26:8-13).

¿Chuqui mi laj cʌn tiʼ tojlel? María tsaʼʌch i wen ñopo ti Dios. Ñaxan tsiʼ yʌcʼʌ i chaʼan bʌ Dios. Tsiʼ pʌsʌ i pecʼlel i tsaʼʌch i qʼuele ti ñuc Jesús, i maʼañic tsiʼ pensari i cʼʌn i taqʼuin chaʼan miʼ coltan.

María (i mamá Jesús)

¿Majqui jiñi María? Juntiquil xchʼoc judía bʌ. Maxto piʼlebilic cheʼ bʌ tsiʼ yʌcʼʌ ti pañimil Jesús, come Dios tsiʼ mele jumpʼejl milagro tiʼ tojlel.

¿Chuqui tsiʼ mele? María tsiʼ pʌsʌ i pecʼlel i tsiʼ jacʼbe i tʼan Dios. Cʼajtibilix tiʼ tojlel José cheʼ bʌ juntiquil ángel tsiʼ pʌsbe i bʌ i tiʼ sube chaʼan mi caj i cʌntan i yalobil, jiñi muʼ bʌ caj i sujtel ti Mesías (Lucas 1:26-33). Tsaʼʌch i jacʼʌ i tsʼʌctesan. Cheʼ bʌ Jesús tsiʼ yila pañimil, María yicʼot José tsaʼ tili chʌntiquil i yalobilob chʼiton bʌ yicʼot chaʼtiquil xchʼoc (Mateo 13:55, 56). Anquese wen ñucʌch jiñi eʼtel tsaʼ bʌ aqʼuenti, maʼañic tsiʼ pijta chaʼan miʼ qʼuejlel ti ñuc. I cheʼʌch tsiʼ mele cheʼ bʌ Jesús tsiʼ teche subtʼan yicʼot cheʼ bʌ waʼchobilix jiñi congregación.

¿Chuqui mi laj cʌn tiʼ tojlel? María juntiquilʌch xucʼul bʌ xʼixic tsaʼ bʌ i jacʼʌ i chʼʌm wen ñuc bʌ eʼtel. Cheʼ jaʼel wen i cʌñʌ jiñi i Tʼan Dios i miʼ yʌjlel chaʼan tsiʼ taja ti tʼan jiñi Tsʼijbujel cheʼ bʌ 20 veces cheʼ bʌ tsiʼ yʌlʌ muʼ bʌ lac taj ti Lucas 1:46-55.

▸ Mi a wom a ñumen cʌn tiʼ tojlel María, pejcan jiñi tema «Lecciones que aprendemos de María».

María Magdalena

¿Majqui jiñi María Magdalena? Juntiquilʌch xcʌntʼan i chaʼan Jesús.

¿Chuqui tsiʼ mele? Cheʼ bʌ Jesús yicʼot jiñi xcʌntʼañob i chaʼan tsiʼ techeyob subtʼan, María Magdalena tsaʼ majli yicʼotob i tsiʼ cʼʌñʌ chuqui tac an i chaʼan chaʼan miʼ cʌntañob (Lucas 8:1-3). Tiʼ tsajca ñumel Jesús cʼʌlʌl cheʼ bʌ tsiʼ chaʼle subtʼan i yaʼ tsaʼ cʌyle yicʼot cheʼ bʌ tsaʼ tsʌnsʌnti. María Magdalena jiñʌch tsaʼ bʌ i ñaxan qʼuele cheʼ bʌ Jesús tsaʼ chaʼ tejchesʌnti (Juan 20:11-18).

¿Chuqui mi laj cʌn tiʼ tojlel? María Magdalena tsiʼ cʼʌñʌ chuqui tac an i chaʼan chaʼan miʼ coltan Jesús i xucʼul tsaʼ ajñi tiʼ tojlel.

Marta

¿Majqui jiñi Marta? Jiñʌch i yeran Lázaro yicʼot María. Chumulob ti Betania, lʌcʼʌ ti Jerusalén.

¿Chuqui tsiʼ mele? Marta i yamiga Jesús. Jin chaʼan, jiñi Biblia miʼ yʌl chaʼan Jesús «miʼ cʼuxbin Marta, María yicʼot Lázaro» (Juan 11:5). Marta miʼ mulan i pʌy tiʼ yotot yañoʼ bʌ yicʼot miʼ tʼoxbeñob chuqui an i chaʼan. Ti jumpʼejl bʌ qʼuin cheʼ bʌ Jesús tsaʼ cʼoti ti julaʼ, María tsaʼ buchle i ñʌchʼtan Jesús i Marta tsaʼ caji i mel i yeʼtel yaʼ tiʼ yotot. Ti wiʼil tsaʼ majli i suben Jesús chaʼan María maʼañic woliʼ coltan, pero Jesús tsiʼ tiqʼui ti wem bʌ tʼan (Lucas 10:38-42).

Cheʼ bʌ Lázaro tsaʼ cʼamʼa, Marta yicʼot María tsiʼ chocoyob ti pʌyol Jesús come yujilob chaʼan jin miʼ mejlel i tsʼʌcan (Juan 11:3, 21). Pero Lázaro tsaʼ chʌmi. Jiñi tsaʼ bʌ i yʌlʌ Marta miʼ pʌs chaʼan mucʼʌch i ñop jiñi chaʼ chʼojyel yicʼot chaʼan Jesús miʼ mejlel i chaʼ tejchesʌben i yeran (Juan 11:20-27).

¿Chuqui mi laj cʌn tiʼ tojlel? Marta tsiʼ chaʼle wersa i tʼox chuqui an i chaʼan. Wen jach tsiʼ jacʼʌ cheʼ bʌ tsaʼ tijqʼui. Cheʼ jaʼel tsaʼʌch i jamʌ alʌ bajcheʼ yubil miʼ yubin i bʌ yicʼot chaʼan añʌch i ñopoñel.

▸ Mi a wom a ñumen cʌn tiʼ tojlel Marta, pejcan jiñi tema «He creído».

Míriam

¿Majqui jiñi Míriam? Jiñʌch i chich Moisés yicʼot Aarón. Jiñʌch jiñi ñaxam bʌ xʼixic muʼ bʌ i subentel bajcheʼ xʼaltʼan.

¿Chuqui tsiʼ mele? Come juntiquilʌch xʼaltʼan jin an tiʼ wenta i suben jiñi tejclum Israel chuqui yom Dios. Cheʼ jaʼel, miʼ wen qʼuejlel ti ñuc. Cheʼ bʌ Dios tsiʼ jisa jiñi egipciojob yaʼ ti Chʌchʌc bʌ mar, tsiʼ chaʼle cʼay yicʼot jiñi wiñicob (Éxodo 15:1, 20, 21).

Ti wiʼil, Míriam yicʼot Aarón tsaʼ caji i yʌlob mach bʌ weñic tiʼ tojlel Moisés. Tsiʼ meleyob bajcheʼ jiñi come tsaʼ caji i chañʼesañob i bʌ, pero Jehová tsiʼ yubi woli bʌ i yʌlob i tsiʼ tiqʼuiyob (Números 12:1-9). Dios tsiʼ yʌcʼʌ chaʼan Míriam miʼ tajeʼ lepra come jiñʌch tsaʼ bʌ i teche i chaʼlen tʼan tiʼ contra Moisés. Cheʼ jiñi, Moisés tsiʼ cʼajtibe Jehová chaʼan miʼ lajmesan, i Jehová tsaʼʌch i ñʌchʼta. Pero Míriam parte baqui tsaʼ ajñi i jinto tsaʼ ñumi 7 qʼuin tsaʼ mejli i chaʼ tempan i bʌ yicʼot jiñi tejclum (Números 12:10-15).

Jiñi Biblia miʼ pʌs chaʼan Míriam wen tsiʼ jacʼʌ jiñi ticʼojel. Cheʼ ñumeñix cabʌl jab, Dios tsiʼ yʌlʌ chaʼan wen ñucʌch tsaʼ bʌ i mele ti Israel, come tsiʼ yʌlʌ: «Tsac chocbeyetla tilel Moisés yicʼot Aarón, yicʼot Miriam» (Miqueas 6:4).

¿Chuqui mi laj cʌn tiʼ tojlel? Jiñi tsaʼ bʌ ujti tiʼ tojlel Míriam miʼ pʌsbeñonla chaʼan Jehová miʼ ñʌchʼtan chuqui mi lac subeñob jiñi hermanojob yicʼot chuqui mi la cʌl tiʼ tojlelob. Cheʼ jaʼel, mi laj cʌn chaʼan mi la com chaʼan Dios wen miʼ qʼuelonla mach yomic mi lac chañʼesan lac bʌ, come miʼ mejlel i yʌcʼonla chaʼan mi la cʌl mach bʌ weñic tiʼ tojlel yambʌlob.

Rahab

¿Majqui jiñi Rahab? Juntiquilʌch xʼixic muʼ bʌ i chon i bʌ tsaʼ bʌ chumle ti Jericó. Ti wiʼil, tsaʼ caji i chʼujutesan Jehová.

¿Chuqui tsiʼ mele? Rahab tsiʼ mujcu tiʼ yotot chaʼtiquil israelitajob tsajñoʼ bʌ i chijtañob jiñi tejclum. Tsiʼ mele bajcheʼ jiñi come tsiʼ yubi chaʼan Jehová tsiʼ colta jiñi israelitajob tiʼ tojlel jiñi egipciojob yicʼot amorreojob.

Come Rahab tsiʼ colta jiñi chaʼtiquil israelitajob tiʼ subeyob chaʼan miʼ coltañob yicʼot i familia cheʼ bʌ miʼ jisʌntel Jericó. Tsaʼʌch i jacʼʌyob, pero tiʼ subeyob chuqui yom bʌ miʼ mel: Ñaxam bʌ, maʼañic majqui yom miʼ suben chaʼan tsajñi i chijtañob jiñi tejclum, i chaʼpʼejlel, mach yomic miʼ wis loqʼuelob tiʼ yotot cheʼ bʌ wolix i jisʌntel Jericó, i jiñi yuxpʼejlel, yom miʼ jocʼchocon chʌchʌc bʌ lazo yaʼ tiʼ ventana chaʼan miʼ ñaʼtañob baqui bʌ i yotot. Rahab tsaʼʌch i mele cheʼ bajcheʼ tsaʼ subenti i jin chaʼan tsaʼ coltʌnti yicʼot i familia.

Ti wiʼil, Rahab tsaʼ ñujpuñi yicʼot juntiquil israelita i tsaʼ sujti tiʼ ñojteʼel David yicʼot Jesús (Josué 2:1-24; 6:25; Mateo 1:5, 6, 16).

¿Chuqui mi laj cʌn tiʼ tojlel? Jiñi Biblia miʼ yʌl chaʼan Rahab tsiʼ cʌybeyonla wem bʌ ejemplo come tsiʼ pʌsʌ i ñopoñel (Hebreos 11:30, 31; Santiago 2:25). Jiñi tsaʼ bʌ ujti tiʼ tojlel miʼ pʌsbeñonla chaʼan Dios yujil pʼuntaya, junlajal miʼ qʼuel lac piʼʌlob yicʼot miʼ yʌqʼuen bendición jiñi muʼ bʌ i ñopob tiʼ tojlel, mach yʌlʌyic chuqui tsiʼ meleyob ti wajali.

▸ Mi a wom a ñumen cʌn tiʼ tojlel Rahab, pejcan jiñi tema «Fue declarada justa por obras».

Raquel

¿Majqui jiñi Raquel? Juntiquilʌch i yixicʼal Labán yicʼot i yijñam Jacob, i jiñʌch tsaʼ bʌ ñumen cʼuxbinti.

¿Chuqui tsiʼ mele? Raquel tsaʼ ñujpuñi yicʼot Jacob i tsaʼ tiliyob chaʼtiquil i yalobil. Jiñi i yalobilob ochemob ti jiñi 12 tribu Israel. Jiñi Biblia miʼ yʌl chaʼan tsiʼ cʌñʌ Jacob cheʼ bʌ woliʼ cʌntʌben i tiñʌmeʼ i tat (Génesis 29:9, 10). Cheʼ jaʼel, ñumen i tʼojol jax bajcheʼ Lea (Génesis 29:17).

Jacob tsiʼ mulaj Raquel, jin chaʼan tsiʼ jacʼʌ i chaʼlen eʼtel 7 jab chaʼan miʼ ñujpuñel yicʼot (Génesis 29:18). Pero Labán tsiʼ loti Jacob i tsiʼ ñaxan acʼʌ ti ñujpuñel yicʼot Lea, i ti wiʼil tsiʼ yʌqʼue i taj Raquel (Génesis 29:25-27).

Jacob tsiʼ ñumen cʼuxbi Raquel yicʼot jiñi chaʼtiquil i yalobilob, mach jiñic Lea yicʼot i yalobilob (Génesis 37:3; 44:20, 27-29). Jin chaʼan, tsaʼ tejchi wocol tiʼ tojlel ili chaʼtiquil xʼixicob (Génesis 29:30; 30:1, 15).

¿Chuqui mi laj cʌn tiʼ tojlel? Raquel tsiʼ cuchu jiñi wocol tsaʼ bʌ tejchi tiʼ familia i tsaʼʌch i ñopo chaʼan Dios mi caj i ñʌchʼtʌben i yoración (Génesis 30:22-24). Jiñi tsaʼ bʌ i ñusa Raquel miʼ pʌsbeñonla chaʼan an cabʌl wocol cheʼ mach juntiquil jach i yijñam jiñi wiñic. Jiñi yom bʌ Dios jiñʌch chaʼan juntiquil jach i yijñam jiñi wiñic (Mateo 19:4-6).

▸ Mi a wom ñumen cʌn tiʼ tojlel Raquel, pejcan jiñi tema «Dos hermanas rivales ‘edificaron la casa de Israel’».
▸ Mi a wom a ñaʼtan chucoch Dios tsiʼ yʌcʼʌ chaʼan mach juntiquil jach i yijñam jiñi wiñic ti wajali, pejcan jiñi tema «¿Aprueba Dios la poligamia?».

Rebeca

¿Majqui jiñi Rebeca? Jiñʌch i yijñam Isaac yicʼot i mamá Jacob yicʼot Esaú.

¿Chuqui tsiʼ mele? Rebeca tsiʼ mele chuqui yom Dios anquese an i tajol wocol tsiʼ yubi. Ti jumpʼejl bʌ qʼuin, Rebeca tsaʼ majli i locʼsan jaʼ yaʼ ti pozo i juntiquil wiñic tsiʼ cʼajtibe chaʼan miʼ yʌqʼuen jaʼ, i ti orajach tsiʼ yʌqʼue. Cheʼ jaʼel, tsiʼ yʌqʼue jaʼ jiñi i camello (Génesis 24:15-20). Jiñi wiñic juntiquilʌch xʼeʼtel i chaʼan Abrahán i ñajt tsiʼ chaʼle xʌmbal chaʼan miʼ sʌclʌben i yijñam Isaac, i yalobil Abrahán (Génesis 24:2-4). Ili wiñic tsiʼ cʼajtibe Jehová chaʼan miʼ coltan i sʌclan i yijñam Isaac. Jin chaʼan cheʼ bʌ tsiʼ qʼuele chaʼan Rebeca wen yujil eʼtel yicʼot an i yutslel, tsaʼ cʼoti i ñaʼtan chaʼan Dios tsaʼʌch i jacʼbe i yoración i woliʼ pʌsben chaʼan jiñʌch yom bʌ miʼ ñujpuñel yicʼot Isaac (Génesis 24:10-14, 21, 27).

Cheʼ bʌ Rebeca tsiʼ ñaʼta chuqui tsaʼ cʼoti i mel jiñi wiñic, tsaʼʌch i jacʼʌ majlel chaʼan miʼ ñujpuñel yicʼot Isaac (Génesis 24:57-59). Ti wiʼil, Rebeca tsiʼ yʌcʼʌ ti pañimil lojoʼ bʌ o lutoʼ bʌ i yalobil, i Dios tiʼ sube chaʼan Esaú mi caj i melben i yeʼtel Jacob (Génesis 25:23). Cheʼ bʌ tsaʼ cʼoti i yorajlel chaʼan Isaac miʼ yʌqʼuen i bendición Esaú, Rebeca an chuqui tsiʼ mele chaʼan jin miʼ yʌqʼuentel bendición Jacob. Tsiʼ mele bajcheʼ jiñi come yujil chaʼan jiñʌch yom bʌ Dios (Génesis 27:1-17).

¿Chuqui mi laj cʌn tiʼ tojlel? Rebeca wen yujil eʼtel, miʼ tʼox chuqui an i chaʼan yicʼot maʼañic tsiʼ qʼuele i bʌ ti ñuc. Come tsiʼ pʌsʌ wem bʌ i melbal, tsaʼ sujti ti wem bʌ ijñamʌl, ti wem bʌ ñaʼʌl yicʼot xucʼul tsiʼ melbe i yeʼtel Dios.

▸ Mi a wom a ñumen cʌn tiʼ tojlel Rebeca, pejcan jiñi tema «Estoy dispuesta a ir».

Rut

¿Majqui jiñi Rut? Juntiquilʌch xʼixic chʼoyol bʌ ti Moab i tsiʼ cʌyʌ i tejclum yicʼot i diosob chaʼan miʼ chʼujutesan Jehová.

¿Chuqui tsiʼ mele? Rut tsaʼʌch i wen cʼuxbi Noemí, jiñi i suegra. Noemí, i ñoxiʼal yicʼot i yalobilob tsaʼ majliyob ti chumtʌl ti Moab come ti Israel tsaʼ tejchi tsʌts bʌ wiʼñal. Ti wiʼil, jiñi i yalobilob tsaʼ ñujpuñiyob yicʼot chaʼtiquil xʼixicob moabitajoʼ bʌ, Rut yicʼot Orpá. Ti wiʼil, jiñi i ñoxiʼal Noemí yicʼot i yalobilob tsaʼ chʌmiyob, jin chaʼan tiʼ yuxticlelob mebaʼ tsaʼ cʌleyob.

Noemí tsiʼ ñaʼta chaʼ sujtel ti Israel come ti jimbʌ ora tsaʼix ñumi jiñi jajmeñal. Rut yicʼot Orpá yomob majlel yicʼot Noemí, pero tiʼ subeyob chaʼan miʼ chaʼ sujtelob yicʼot i familia (Rut 1:1-6, 15). Orpá tsaʼʌch i jacʼʌ sujtel, pero Rut tsaʼ cʌyle yicʼot i suegra come miʼ wen cʼuxbin yicʼot yom i chʼujutesan Jehová (Rut 1:16, 17; 2:11).

Rut juntiquilʌch xʼixic wen yujil bʌ eʼtel, jin chaʼan wen tsaʼ qʼuejli yaʼ ti Belén, jiñi i lumal i suegra. Juntiquil wiñic wen am bʌ i taqʼuin, i cʼabaʼ Boaz, tsiʼ qʼuele chaʼan Rut wen yujil eʼtel i jin chaʼan tsiʼ yʌqʼue cabʌl bʌlñʌcʼʌl (Rut 2:5-7, 20). Ti wiʼil, Rut tsaʼ ñujpuñi yicʼot Boaz i tsaʼ sujti tiʼ ñojteʼel David yicʼot Jesús (Mateo 1:5, 6, 16).

¿Chuqui mi laj cʌn tiʼ tojlel? Rut tsiʼ cʌyʌ i tejclum yicʼot i familia come tsiʼ wen cʼuxbi Noemí yicʼot Jehová. Tsiʼ pʌsʌ chaʼan wen yujil eʼtel yicʼot xucʼul tsaʼ ajñi anquese tsiʼ ñusa wocol tac.

▸ Mi a wom a ñumen cʌn tiʼ tojlel Rut, pejcan jiñi tema «A donde tú vayas yo iré» yicʼot «Una mujer excelente».

Sara

¿Majqui jiñi Sara? Jiñʌch i yijñam Abrahán yicʼot i mamá Isaac.

¿Chuqui tsiʼ mele? Sara tsiʼ cʌyʌ chuqui tac an i chaʼan yicʼot i yotot ti Ur come miʼ ñop chaʼan Dios mucʼʌch caj i tsʼʌctesan jiñi tsaʼ bʌ i sube Abrahán. Dios tiʼ sube Abrahán chaʼan miʼ loqʼuel ti Ur i miʼ majlel ti Canaán. Tiʼ sube chaʼan mi caj i yʌqʼuen cabʌl bendición yicʼot chaʼan i familia mi caj i sujtel ti ñuc bʌ tejclum (Génesis 12:1-5). Tajol ti jimbʌ ora Sara añix 60 i jabilel i tsaʼ chumleyob ti pisil bʌ otot yicʼot mach junsujmic jach baqui tsaʼ ajñiyob.

Anquese bʌbʌqʼueñʌch bajcheʼ tsaʼ chumleyob, Sara tsaʼʌch i colta Abrahán chaʼan miʼ tsʼʌctesan tsaʼ bʌ subenti ti Dios (Génesis 12:10, 15). Tsaʼ ñumi cabʌl jab i Sara maʼañic i yalobil, jin chaʼan tsiʼ wen ubi i chʼijyemlel. Pero Dios tsaʼix i wʌn sube Abrahán chaʼan mi caj i yʌqʼuen bendición jiñi i pʼolbal (Génesis 12:7; 13:15; 15:18; 16:1, 2, 15). Tiʼ wiʼil, Dios tiʼ sube Sara chaʼan mi caj i tilel i yalobil. Anquese Sara añix 90 i jabilel i jiñi i ñoxiʼal añix 100 i jabilel, tsaʼʌch tiliyob i yalobil (Génesis 17:17; 21:2-5). I tsiʼ yotsʌbeyob i cʼabaʼ bajcheʼ Isaac.

¿Chuqui mi laj cʌn tiʼ tojlel? Jiñi tsaʼ bʌ ujti tiʼ tojlel Sara miʼ pʌsbeñonla chaʼan Dios mucʼʌch i tsʼʌctesan i tʼan anquese wocolʌch yilal (Hebreos 11:11). Cheʼ jaʼel tsiʼ cʌyʌ wem bʌ ejemplo tiʼ tojlel jiñi ijñamʌlob come tsiʼ wen qʼuele ti ñuc i ñoxiʼal (1 Pedro 3:5, 6).