CCabʌl tatʌlob maʼañic miʼ yʌqʼueñob i cʼʌn redes sociales jiñi i yalobilob come miʼ mejlel i tajob wocol. Pero mi jatet mucʼʌch a wʌqʼuen i cʼʌn jiñi a walobil, ¿bajcheʼ miʼ mejlel a coltan chaʼan maʼañic miʼ taj wocol? ¿Bajcheʼ miʼ mejlel a pʌsben chaʼan wen jach miʼ cʼʌn jiñi internet?

Ti ili tema mi caj laj qʼuel iliyi:

•  ¿Chuqui jiñi ñuc bʌ i cʼʌjñibal miʼ qʼuel a walobil?

•  ¿Bajcheʼ yubil miʼ yubin i bʌ jiñi a walobil?

•  ¿Chuqui tac miʼ mel a walobil cheʼ miʼ cʼʌn internet?

•  Muʼ bʌ i mejlel laʼ comol al

 Yom bʌ maʼ ñaʼtan: Come jiñi redes sociales miʼ mejlel ti sujtel ti jumpʼejl vicio, tajol yom maʼ suben jiñi a walobil jaypʼejl hora mi caj i cʼʌn.

 Texto: «Chaʼan mi laʼ qʼuel chuqui tac jiñi ñumen ñuc bʌ i cʼʌjñibal» (Filipenses 1:10).

 Ñaʼtan iliyi: Tiʼ caj jiñi redes sociales, ¿maʼañic ba miʼ seb miʼ wʌyel, miʼ mel i tarea o miʼ yajñel yicʼot a familia? Cabʌl investigadorob miʼ yʌlob chaʼan jiñi xcolelob yom miʼ wʌyelob 9 hora ti jujumpʼejl acʼʌlel. Pero jiñi muʼ bʌ i wen qʼuelob jiñi redes sociales tajol 7 hora jach miʼ wʌyelob.

 Muʼ bʌ i mejlel a mel: Suben jiñi a walobil chuqui jiñi ñuc tac bʌ i cʼʌjñibal yom bʌ miʼ mel yicʼot suben chucoch pʼisbil jach yom miʼ cʼʌn jiñi redes sociales. Suben chaʼan mach yomix miʼ chʌn qʼuel i celular cheʼ bʌ i yorajlelix miʼ wʌyel. Coltan jiñi a walobil chaʼan miʼ cʌn i ticʼ i bʌ come cheʼ yujilʌch i ticʼol i bʌ jiñʌch muʼ bʌ caj i coltan cheʼ baʼ ora ñuquix (1 Corintios 9:25).

 Yom bʌ maʼ ñaʼtan: Cheʼ bʌ juntiquil xcolel miʼ qʼuel jiñi foto tac wen tojʼesʌbilix bʌ yicʼot jiñi video tac wen utsʼatax bʌ miʼ letsañob jiñi i yamigojob, tajol miʼ caj i yʌcʼ chaʼan i bajñel miʼ yubin i bʌ, miʼ yʌqʼuen cʌlʌx pensar yicʼot chʼijyemlel.

 Texto: «Cʌyʌla baqui jach bʌ [...] i tsʌytsʌyñiyel laʼ pusicʼal» (1 Pedro 2:1).

 Ñaʼtan iliyi: Cheʼ bʌ jiñi a walobil miʼ cʼʌn jiñi redes sociales, ¿chʼijyem ba miʼ yubin i bʌ tiʼ caj mach lajalic miʼ yubin i bʌ yicʼot yambʌlob? ¿Muʼ ba i qʼuel chaʼan jiñi yambʌlob ñumen tijicña miʼ ñusañob pero tiʼ bajñel mach cheʼiqui?

 Muʼ bʌ i mejlel a mel: Suben jiñi a walobil chaʼan mach weñic cheʼ miʼ lajin i bʌ yicʼot yambʌlob. Cʼajtesan chaʼan jiñi muʼ bʌ i mejlel i ñumen ticʼlan jiñʌch jiñi xchʼocob come ñuc i cʼʌjñibal miʼ yubiñob bajcheʼ yilal miʼ qʼuejlelob. Miʼ mejlel a suben jiñi a walobil chʼiton bʌ o jiñi xchʼoc bʌ chaʼan tajol miʼ mejlel i jumucʼ cʌy i cʼʌn jiñi redes sociales. Juntiquil xcolel i cʼabaʼ Jacob, tsiʼ yʌlʌ: «Tsaʼ c jumucʼ yʌpʌ jiñi aplicación chaʼan bʌ jiñi redes sociales, i jiñi tsiʼ coltayon j qʼuel chuqui ñuc bʌ i cʼʌjñibal chaʼañon yicʼot bajcheʼ yilal mic bajñel qʼuel c bʌ i bajcheʼ yilal mij qʼuel yambʌlob».

 Yom bʌ maʼ ñaʼtan: Miʼ yʌjlel chaʼan cheʼ bʌ mi lac wen ochel ti jiñi aplicación tac am bʌ ti internet, lajal bajcheʼ woli lac pam pʌsben jiñi lac piʼʌlob bajcheʼ yilalonla. Come tiʼ pejtelel lac piʼʌlob miʼ qʼuelob muʼ bʌ lac mel, ti ora miʼ mejlel ti ñaʼtʌntel mach bʌ weñic ti lac tojlel o miʼ tejchel wocol.

 Texto: «Chocola loqʼuel pejtelel cʌlʌx michʼ pusicʼal, michʼajel, tsʌts bʌ tʼan, tʼan tac muʼ bʌ i low yambʌlob [...]. Yom utsetla laʼ wicʼot yambʌlob» (Efesios 4:31, 32).

 Ñaʼtan iliyi: Jiñi a walobil, ¿am ba i chaʼle lot o jopʼtʼan yicʼot am ba i teche leto o am ba i yʌlʌ mach tac bʌ weñic tiʼ caj jiñi aplicación tac am bʌ ti internet?

 Muʼ bʌ i mejlel a mel: Cʌntesan jiñi a walobil chaʼan miʼ pʌs wem bʌ i melbal cheʼ bʌ woliʼ cʼʌn jiñi internet. Jiñi libro Niños conectados tsaʼ bʌ i mele Martin Kutscher tsaʼ bʌ i chaʼle ti traducir José Pérez Escobar, miʼ yʌl: «Jiñi tatʌlonbʌla an ti lac wenta laj cʌntesan la calobilob chaʼan maʼañic miʼ pʌsob chaʼan jontolob cheʼ an majqui woliʼ pejcañob ti internet o cheʼ woliʼ mero pejcan jiñi lac piʼʌlob».

 Cʼajtesan chaʼan jiñi aplicación tac am bʌ ti internet mach jiñic junchajp ñuc bʌ i cʼʌjñibal yicʼot an tatʌlob maʼañic bʌ miʼ yʌcʼ chaʼan miʼ cʼʌn jiñi i yalobilob. Mi jatet maʼ wʌqʼuen i cʼʌñob jiñi a walobilob, yomʌch maʼ ñaxan ñaʼtan mi weñʌch mi caj i cʼʌñob, bajcheʼ yilal i yamigojob i mi maʼañic mi caj i qʼuel mach bʌ weñic.