Ti jumpʼejl encuesta tsaʼ bʌ mejli lʌcʼʌ tiʼ pejtelel jiñi xcolelob tsiʼ yʌlʌyob chaʼan miʼ cʼʌñob jiñi redes sociales. Ixcu jiñi a walobil, ¿yom ba i cʼʌn jaʼel? Mi yomʌch, an tac chuqui yom maʼ chʼʌm ti ñuc.

Ti ili tema mi caj laj qʼuel iliyi:

•  ¿Jaypʼejl tiempo mi caj i cʼʌn redes sociales jiñi a walobil?

•  ¿Chuqui mi caj i ñaʼtan jiñi a walobil chaʼan i sʌclʌntel jiñi amigojob?

•  ¿Bajcheʼ mi caj i ticʼlan jiñi a walobil?

•  ¿Chuqui mi caj i mel ti internet jiñi a walobil?

•  ¿I cʼʌjñibalʌch ba jiñi redes sociales?

•  Muʼ bʌ i yʌlob yambʌ tatʌlob

 Jiñi sitio chaʼan internet HelpGuide miʼ yʌl chaʼan «jiñi redes sociales tsaʼ mejli chaʼan yaʼ jach mi lac joy acʼ lac ñaʼtʌbal yaʼi, chaʼan pejtelel ora conectadojonla yicʼot chaʼan maʼañix mi laj cʌy jiñi lac celular, tablet o computadora chaʼan mi lac chʌcʌ qʼuel chuqui tac tsijiʼ bʌ».

 «Mic lon ñaʼtan chaʼan jumucʼ jach mi caj cochel ti jiñi redes sociales. Pero maʼañic mi cubin miʼ ñumel jiñi hora tac j qʼuel chuqui tac miʼ letsañob. Wocolʌch chaʼan mi laj cʌy jiñi lac celular yicʼot chaʼan mi lac mel mucʼʌch bʌ i coltañonla» (Lynne, 20 bʌ i jabilel).

 Cʼajtiben a bʌ: ¿Muʼ ba caj i mejlel i ticʼ i bʌ jiñi calobil yicʼot i jacʼ chuqui mic suben chaʼan bajcheʼ yom miʼ cʼʌn jiñi redes sociales? ¿Añix ba i ñaʼtʌbal chaʼan miʼ ñaʼtan bajcheʼ jach jalel mi caj i cʼʌn yicʼot chaʼan cheʼʌch miʼ mel?

 Texto: «Yom wen tsajaletla chaʼan mach cheʼeticla bajcheʼ jiñi tontojoʼ bʌ, cheʼ yometla bajcheʼ jiñi añoʼ bʌ i ñaʼtʌbal, cheʼ mi laʼ cʼʌn ti wen jiñi i yorajlel am bʌ laʼ chaʼan» (Efesios 5:15, 16).

 Jiñi tʼan redes sociales miʼ yʌcʼ ti ñaʼtʌntel chaʼan miʼ mejlel laj conectarin lac bʌ chaʼan miʼ mejlel lac pejcan jiñi la camigojob o laj cʌñʌyoʼ bʌ, pero an i tajol mach i sujmic bʌ amigojob.

 «Qʼuelbil c chaʼan chaʼan cabʌl xcolelob miʼ ñaʼtañob chaʼan mi ñumen cabʌlob i seguidor yaʼ ti redes sociales o cabʌl muʼ bʌ i yʌqʼueñob ‹me gusta›, ñumen cabʌl i wentajoʼ bʌ anquese mach i cʌñʌyobic. Pero mach i sujmic jiñi» (Patricia, 17 bʌ i jabilel).

 Cʼajtiben a bʌ: ¿Mucʼʌch ba i ñaʼtan jiñi calobil chaʼan mach ñuquic i cʼʌjñibal miʼ wen cʌjñel yaʼ ti redes sociales? ¿Mucʼʌch ba i mejlel i sujtesan tiʼ yamigojob jiñi mucʼʌch bʌ i taj i qʼuelob?

 Texto: «Mi isujm miʼ cʼuxbiñonla laj cʌñʌ bʌ (la camigo) maʼanic miʼ cʌy i cʼuxbiñonla tiʼ pejtelel ora. Junlajalʌch bajcheʼ lac piʼʌl baʼ ora woli la cubin wocol» (Proverbios 17:17).

 Jiñi expertojob an i qʼueleyob chaʼan lac bajñel mi la cubin lac bʌ, miʼ yʌqʼueñonla ansiedad yicʼot miʼ tajonla depresión cheʼ bʌ ñumeñix ti pʼis bajcheʼ mi laj cʼʌn jiñi redes sociales.

 «Mach tijicñayic mi la cubin cheʼ bʌ mi laj qʼuel i fotojlel la camigojob muʼ bʌ i loqʼuelob yicʼot yambʌ la camigojob, pero joñonla mach yaʼic añonla» (Serena, 19 bʌ i jabilel).

 Cʼajtiben a bʌ: ¿Mucʼʌch ba caj i mejlel i cʌntan i bʌ jiñi calobil chaʼan maʼañic miʼ bajñel ñaʼtan i bʌ, maʼañic miʼ mulan i mʌlbeñob yambʌlob yicʼot chaʼan maʼañic miʼ ticʼlan muʼ bʌ i letsañob yañoʼ bʌ yaʼ ti redes sociales?

 Texto: «Mach laj qʼuel lac bʌ ti ñuc, maʼañic majqui yom mi lac ñijcʌben i pusicʼal chaʼan miʼ laj i bʌ yicʼot yambʌ i mach yomic tsʌytsʌyña lac pusicʼal tiʼ tojlel yambʌlob» (Gálatas 5:26).

 Jiñi redes sociales miʼ mejlel ti cʼʌjñel chaʼan miʼ bʌcʼtesʌntel yambʌlob, chaʼan miʼ chocob majlel mensaje o foto tac chaʼan bʌ piʼleya o chaʼan jiñi pornografía. Jiñi a walobil miʼ mejlel i taj wocol anquese mach yomic.

 «Yaʼ ti redes sociales miʼ wen chaʼleñob tsucu tʼan yicʼot cabʌl música mach bʌ weñic. Qʼuelbil c chaʼan chaʼan miʼ mejlel lac taj wocol anquese poj weñʌch chuqui tac mi lac letsan» (Linda, 23 bʌ i jabilel).

 Cʼajtiben a bʌ: ¿Mucʼʌch ba caj i mejlel i cʼʌn ti wen jiñi internet jiñi calobil? ¿Mucʼʌch ba caj i tsʼaʼlen jiñi an tac bʌ i chaʼan tsʼiʼlel cheʼ bʌ miʼ taj i qʼuel?

 Texto: «Jiñi tsʼiʼlel, baqui jach bʌ bibiʼlel yicʼot i wen mulʌntel chubʌʼan mach yomic mi laʼ wis al […]. Cheʼ jaʼel, mach laʼ pʌs quisintic jax bʌ laʼ melbal, mach laʼ wʌl tʼan tac mach bʌ añic i sujmlel, mach laʼ chaʼlen alas tʼan yicʼot bʌ tsucu tʼan» (Efesios 5:3, 4).

 Jiñi redes sociales mach ñoj i cʼʌjñibalic lac chaʼan, mi chaʼañicto tijicña o wen mi lac chumtʌl. Cabʌl xcolelob tijicñayob cheʼ bʌ maʼañic i chaʼañob, an añʌch bʌ i chaʼañob ti ñaxan pero ti wiʼil tsiʼ cʌyʌyob.

 «Tsaʼ j cʌyʌ j cʼʌn jiñi redes sociales come tsaʼ j qʼuele bajcheʼ cʼamel tsiʼ ticʼla jiñi xchʼoc bʌ queran. Cʼʌlʌl ti jimbʌ ora, ñumen tijicñayon yicʼot mic ñumen ñusan c bʌ tij cuxtʌlel» (Nathan, 17 bʌ i jabilel).

 Ti tsʼitaʼ jach bʌ tʼan: Mi woli a ñaʼtan a wʌqʼuen i cʼʌn redes sociales jiñi a walobil, ñaxan wen qʼuele mi chajpʌbilʌch chaʼan miʼ yajcan ti wen jiñi i yamigojob, chaʼan maʼañic mi caj i qʼuel an tac bʌ i chaʼan tsʼiʼlel yicʼot mi mucʼʌch caj i mejlel i ticʼ i bʌ chaʼan bajcheʼ jalel mi caj i cʼʌn.

 Texto: «Jini cʌntesʌbil bʌ miʼ wen tsajin i bijlel» (Proverbios 14:15).