AUSTRALIA. «Jiñi cʼamoʼ bʌ i testigojob Jehová añoʼ bʌ ti hospital, maʼañic miʼ chʼʌmob chʼichʼ chaʼan tiʼ caj jiñi ñopoloʼ bʌ i chaʼan, pero ñumen ora miʼ cʼocʼañob bajcheʼ yambʌ xcʼamʌjelob», cheʼ tsiʼ yʌlʌ jiñi periódico The Sydney Morning Herald tsaʼ bʌ mejli cheʼ ti 2 i chaʼan octubre, 2012.

Jiñi periódico tsiʼ taja ti tʼan jiñi doctor James Isbister, muʼ bʌ ti eʼtel yaʼ ti Escuela de Medicina de Sydney (Universidad de Sydney), i tsiʼ yʌlʌ: «Jiñi doctor Isbister tsiʼ yʌlʌ chaʼan ñumen wen jiñi tsʼʌcʌntel mach bʌ yicʼotic chʼichʼ tsaʼ bʌ i meleyob jiñi doctorob tiʼ tojlel i testigojob Jehová. Wocolix i yʌlʌ chaʼan jiñi tsʼʌcʌntel mach bʌ yicʼotic chʼichʼ, come ñumen cabʌl tsaʼ bʌ i lʌtʼʌyob (cuchuyob) jiñi operación, mach wen jalic tsaʼ ajñiyob yaʼ ti hospital yicʼot tsaʼ wen cʌntʌntiyob. Pero mach cheʼic tsaʼ ujti tiʼ tojlel jiñi tsaʼ bʌ melbentiyob operación yicʼot bʌ chʼichʼ».

Mach cojic jach jiñi doctor Isbister mi yʌl bajcheʼ jiñi. Cheʼ jaʼel, jiñi revista Archives of Internal Medicine tsaʼ bʌ mejli cheʼ ti 13 i chaʼan agosto, 2012 tsiʼ taja ti tʼan jiñi operación muʼ bʌ i melbentelob tiʼ pusicʼal jiñi Testigojob, i tsiʼ yʌlʌ: «Jiñi Testigojob maʼañic tsiʼ wen ubiyob tsʌts bʌ wocol cheʼ bʌ tsaʼ melbentiyob jiñi operación yicʼot mach wen jalic tsaʼ ajñiyob yaʼ ti hospital. Pero mach lajalic tsaʼ ujti tiʼ tojlel jiñi tsaʼ bʌ melbentiyob jiñi operación yicʼot bʌ chʼichʼ».