JIÑI XCOLELOB MIʼ CʼAJTIÑOB
¿Bajcheʼ miʼ mejlel i coltañon jiñi Biblia? Parte 2: Cʌñʌ a ñusan a bʌ tiʼ pejcʌntel jiñi Biblia
«Tajol maʼañic maʼ mulan a pejcan jiñi Biblia come mach a wujilic bajcheʼ yom maʼ pejcan», cheʼ miʼ yʌl juntiquil xcolel i cʼabaʼ Will.
¿Muʼ baʼ mulan a ñaʼtan bajcheʼ miʼ mejlel a ñusan a bʌ tiʼ pejcʌntel jiñi Biblia? Ili tema mi caj i coltañet.
Chumtan jiñi muʼ bʌ a pejcan
Chumtan muʼ bʌ a pejcan i mele bajcheʼ ili:
Yajcan jumpʼejl relato a wom bʌ a pejcan. Tajol junchajp jiñʌch chuqui tsaʼ bʌ ujti muʼ bʌ i yʌjlel yaʼ ti Biblia, jumpʼejl parte yaʼ ti Evangelio o jumpʼejl relato chaʼan i pejcʌntel jiñi drama tac muʼ bʌ a taj yaʼ ti jw.org.
Pejcan jiñi relato. Miʼ mejlel a bajñel pejcan, a wicʼot a familia o a wamigojob. Juntiquil miʼ mejlel i pejcan i chaʼan bʌ jiñi narrador i jiñi yambʌlob miʼ mejlel i pejcañob jiñi yambʌ personaje tac.
Ñopo tac a mel iliyi:
Mele jumpʼejl dibujo chaʼan jiñi relato tsaʼ bʌ a pejca chaʼan bajcheʼ tac tsaʼ ujti. Tsʼijbun jumpʼejl tʼan muʼ bʌ i yʌqʼueñet a ñaʼtan chuqui woli bʌ ti ujtel.
Mi tsaʼ pejca tiʼ tojlel juntiquil muʼ bʌ i yʌjlel yaʼ ti Biblia xucʼul bʌ tsaʼ ajñi, miʼ mejlel a tsʼijbun chuqui tac tsaʼ bʌ i mele yicʼot jiñi wen tac bʌ i melbal, i baqui tac bʌ bendición tsiʼ taja chaʼan jiñi.
Mele bajcheʼ jumpʼejl noticia. Mach junchajp jach yom maʼ pʌs jiñi tsaʼ bʌ ujti, chaʼlen ti entrevistar jiñi tsaʼ bʌ i chumtayob yicʼot jiñi tsaʼ bʌ i qʼueleyob tsaʼ bʌ ujti.
Mi jiñi relato tsaʼ bʌ a pejca miʼ yʌjlel tiʼ tojlel juntiquil mach bʌ weñic tsiʼ mele, ñaʼtan chuqui miʼ mejlel ti ujtel tiʼ tojlel cheʼ weñic tsaʼ bʌ i mele. Jumpʼejl ejemplo, jin cheʼ bʌ Pedro tsiʼ yʌlʌ chaʼan mach i cʌñʌyic Jesús (Marcos 14:66-72). Cheʼ bʌ Pedro woliʼ melbentel cʼajtiya tac ¿bajcheʼ i wentʌlel yom tsiʼ jacʼʌ?
Mi wen utsʼatax bajcheʼ woli a pejcan majlel, tsʼijbun chaʼan jatetix woli a chumtan majlel jiñi relato woli bʌ a pejcan. I tsʼijbun chuqui muʼ bʌ a cʌn (Romanos 15:4).
Chaʼlen ti investigar
Mi ti a wen tsaji jumpʼejl relato am bʌ ti Biblia miʼ mejlel a taj wen ñuc bʌ i cʼʌjñibal. An i tajol maʼ taj chaʼpʼej uxpʼejl tʼan muʼ bʌ i mejlel i wen coltañet a chʼʌmben i sujm.
Jumpʼejl ejemplo, qʼuele Mateo 28:7 i laja yicʼot Marcos 16:7.
¿Chucoch tsaʼto i tsʼijbu Marcos chaʼan Jesús mach jalix mi caj i pʌs i bʌ tiʼ tojlel jiñi xcʌntʼañob i chaʼan «i cheʼ jaʼel tiʼ tojlel Pedro»?
Muʼ bʌ i coltañet a ñaʼtan: Marcos maʼañic tsiʼ yoque qʼuele jiñi tsaʼ bʌ i tsʼijbu, miʼ ñaʼtʌntel chaʼan tajol Pedro jiñʌch tsaʼ bʌ i sube.
Ñuc bʌ i cʼʌjñibal yaʼ ti Biblia: ¿Chucoch tijicña Pedro cheʼ bʌ tsiʼ yubi chaʼan Jesús yomix i chaʼ qʼuel? (Marcos 14:66-72). ¿Bajcheʼ tsiʼ pʌsʌ Jesús chaʼan Pedro jiñʌch i sujm bʌ i yamigo? ¿Bajcheʼ miʼ mejlel a lajin Jesús mi a wom sujtel ti wem bʌ amigo?
Cheʼ bʌ maʼ chumtan jiñi muʼ bʌ a pejca yicʼot mucʼʌch a chaʼlen ti investigar, mi caj i ñumen coltañet chaʼan maʼ ñusan a bʌ cheʼ bʌ maʼ pejcan jiñi Biblia.