«An c ñopo c pejcan jiñi Biblia, pero cʌlʌxix tam» (Briana, 15 i jabilel).

 ¿Cheʼ ba maʼ wujtel jaʼel? Mi cheʼʌchi, ili tema a chaʼañʌch.

•  ¿Chucoch yomʌch maʼ pejcan jiñi Biblia?

•  ¿Bajcheʼ maʼ mejlel a pejcan jiñi Biblia?

•  Muʼ bʌ i yʌl yambʌ xcolelob

 ¿Muʼ baʼ lujbʼan a pejcan jiñi Biblia? Mic chʼʌmbeñet lon i sujm. Tajol maʼ ñaʼtan chaʼan jiñi Biblia lajal jach bajcheʼ jumpʼejl libro cabʌl bʌ i páginajlel yicʼot wen chut i letrajlel i maʼañic i dibujolel. ¡Pero qʼuexelʌch cheʼ bʌ maʼ qʼuel jiñi televisión yicʼot video tac!

 Laʼcu lac ñaʼtan, cheʼ muqʼuic a taj jumpʼejl alʌ caja i yaʼ tiʼ mal an wen lets tac bʌ i tojol ¿mach ba ti orajic a wom a jam?

 Jiñi Biblia lajal bajcheʼ jiñi caja am bʌ chuqui wen lets tac bʌ i tojol tiʼ mal. Yaʼi mi caj a taj ñuc tac bʌ i cʼʌjñibal muʼ bʌ caj i yʌqʼueñet a ñaʼtan:

•   Chaʼan wen chuqui maʼ ñaʼtan a mel.

•   Chaʼan wen maʼ wajñel a wicʼot a tat a ñaʼ.

•   Chaʼan maʼ taj wem bʌ a wamigojob.

•   Chaʼan maʼañic maʼ chaʼlen cʌlʌx pensar.

 ¿Bajcheʼqui miʼ mejlel i coltañonla jumpʼejl libro wen ñoxix bʌ? Miʼ coltañonla come tiʼ «pejtelel jiñi Tsʼijbujel tilem ti Dios» (2 Timoteo 3:16). Ili yom i yʌl chaʼan jiñi ticʼojel muʼ bʌ lac taj yaʼ ti Biblia tilemʌch ti jiñi mach bʌ añic i pʼisol i ñuclel.

 Junchajp jiñʌch cheʼ maʼ tech tiʼ tejchibal cʼʌlʌl tiʼ yujtibal. Ili mi caj i coltañet chaʼan maʼ tsʼitaʼ ñaʼtan chuqui muʼ bʌ i yʌl jiñi Biblia. Mucʼʌch i mejlel a mel iliyi, mi caj laj qʼuel chaʼchajp:

•    Miʼ mejlel a pejcan jiñi 66 alʌ libro cheʼʌch bajcheʼ an, maʼ tech ti Génesis cʼʌlʌl Apocalipsis.

•    Cheʼ jaʼel miʼ mejlel a pejcan cheʼ bajcheʼ ujtem tac tilel muʼ bʌ i yʌjlel yaʼi.

 Muʼ bʌ i mejlel a mel: Ti jiñi sección 4-A ti jiñi folleto Guía para el estudio de la Palabra de Dios mi caj a taj jumpʼejl lista chaʼan jiñi wen ñuc tac bʌ tsaʼ bʌ ujti tiʼ tojlel Jesús cheʼ bʌ tsajñi wʌʼ ti Lum.

 Yambʌ muʼ bʌ i mejlel a mel jiñʌch cheʼ maʼ yajcan jumpʼejl relato baqui miʼ taj ti tʼan jumpʼejl wocol lʌcʼʌ lajal bʌ bajcheʼ woli a ñusan. Jumpʼejl ejemplo:

•   ¿A wom baʼ taj a wamigojob muʼ bʌ i mejlel a ñop tiʼ tojlel? Mi a womʌch, qʼuele jiñi relato i chaʼan David yicʼot Jonatán (1 Samuel, capítulo 18 cʼʌlʌl 20). Ñaʼtan baqui bʌ wem bʌ i melbal tsiʼ pʌsʌ David tsaʼ bʌ i yʌcʼʌ chaʼan Jonatán miʼ sujtesan tiʼ yamigo.

•   ¿Chuqui miʼ mejlel a mel chaʼan maʼ jotben jiñi a cʼunlel? Miʼ mejlel a pejcan jiñi tsaʼ bʌ i ñusa José i maʼ qʼuel bajcheʼ tsiʼ lʌtʼʌ jiñi wocol tac tsaʼ bʌ tili tiʼ tojlel (Génesis, capítulo 39). I cheʼ jaʼel ñaʼtan chuqui tsiʼ mele José chaʼan miʼ lʌtʼ jiñi wocol tac.

•   ¿A wom baʼ cʌn bajcheʼ miʼ mejlel i coltañet jiñi oración? Pejcan tsaʼ bʌ ujti tiʼ tojlel Nehemías (Nehemías, capítulo 2). I miʼ mejlel a ñaʼtan bajcheʼ Dios tsiʼ jacʼbe i yoración.

 Muʼ bʌ i mejlel a mel: Cheʼ bʌ mi caj a pejcan jiñi Biblia, sʌclan baqui ñʌchʼʌl chaʼan miʼ mejlel a wʌcʼ a pensar ti jiñi woli bʌ a pejcan.

 Cojix bʌ, miʼ mejlel a yajcan jumpʼejl relato o jumpʼejl salmo chaʼan maʼ pejcan, cheʼ jiñi wen ñaʼtan bajcheʼ miʼ mejlel i coltañet jiñi. Cheʼ bʌ tsaʼix ujti a pejcan, melben a bʌ ili cʼajtiya tac:

•    ¿Chucoch tsiʼ yotsa Jehová ili tʼan ila ti Biblia?

•    ¿Chuqui miʼ cʌntesañon tiʼ tojlel Jehová iliyi i bajcheʼ tac miʼ mel jiñi muʼ bʌ i mel?

•    ¿Bajcheʼ miʼ coltañon tij cuxtʌlel ili tsaʼ bʌ c pejca?

 Muʼ bʌ i mejlel a mel: Ñopo a mel iliyi. Miʼ mejlel a tsʼijbun jumpʼejl fecha chaʼan baqui ora tsaʼ a teche a pejcan jiñi Biblia i cʼʌñʌ jiñi «Programa chaʼan i pejcʌntel jiñi Biblia» iliyi mi caj a taj yaʼ ti Internet.