•  ¿Bajcheʼ yilal bʌ lac piʼʌlet?

•  ¿Chucoch yom miʼ chʼʌjmel ti ñuc jiñi tsaʼ bʌ ajli?

•  Muʼ bʌ i mejlel a mel

•  ¿A womto baʼ ñumen cʌn?

•  Muʼ bʌ i yʌl yambʌ xcolelob

•   Miʼ ñaʼtan chaʼan laj wen miʼ cajel

   «Mic chaʼlen wersa chaʼan tijicñayon ti jujumpʼejl qʼuin yicʼot tseʼtseʼñayon, ¿am ba i wocolel?» (Valerie).

•   Laj an i wocolel miʼ ñaʼtan

   «Cheʼ bʌ an chuqui wem bʌ miʼ yujtel, joñon maʼañic mic ñop» (Rebeca).

•   Pʼisbil jach chuqui miʼ ñaʼtan

   «Mi maʼ ñaʼtan chaʼan laj wen miʼ cajel mi caj i yʌqʼueñet a chʼijyemlel, i mi maʼ ñaʼtan chaʼan laj an i wocolel, mach tijicña mi caj a wubin jaʼel. Pero mi pʼisbil jach chuqui maʼ ñaʼtan miʼ coltañet a qʼuel ti wen chuqui muʼ bʌ i mejlel ti ujtel» (Ana).

 Jiñi Biblia miʼ yʌl chaʼan «woli ti qʼuiñijel tiʼ pejtelel ora jini tijicña bʌ i pusicʼal» (Proverbios 15:15). Ili yom i yʌl chaʼan jiñi lac piʼʌlob maʼañic bʌ miʼ yʌcʼob ti ochel mach bʌ weñic tiʼ pensar tijicña miʼ yajñelob, i ñumen añob i yamigo. Tiʼ sujm, maʼañic mi lac mulan lac ñochtan juntiquil lac piʼʌl maʼan bʌ miʼ taj i qʼuel chuqui wem bʌ miʼ yujtel tiʼ tojlel o tiʼ tojlel yambʌ.

 Jiñi lac piʼʌlob muʼ bʌ i ñaʼtañob chaʼan laj wen miʼ cajel miʼ tajob wocol jaʼel. Laʼ la cʌl chucoch:

•   Muʼ bʌ i wen ñumel ti noticia jiñʌch chaʼan tac bʌ guerra, terrorismo yicʼot yan tac bʌ jontolil.

•   Tiʼ pejtelel familia añob i wocol.

•   Ti lac pejtelel an lac sajtemal yicʼot laj cʼunlel i mi lac chaʼlen wersa lac mʌlben.

•   An i tajol jiñi la camigojob miʼ yʌqʼueñoñobla lac chʼijyemlel.

 Cabʌl jax chuqui miʼ mejlel ti ujtel, pero mach yomic maʼ cʌlʌx pensarin i yom pʼisbil jach bajcheʼ maʼ qʼuel chaʼan maʼan maʼ taj a chʼijyemlel. Cheʼ bajcheʼ jiñi, mi caj i coltañet chaʼan maʼan miʼ tilel mach bʌ weñic a pensar i utsʼat mi caj a wajñel.

•   Pʼisbil jach yom maʼ qʼuel chuqui mach bʌ weñic ti a tojlel.

   Jiñi Biblia miʼ yʌl: «Maʼanic ti pañimil mi juntiquilic muʼ bʌ i mel chuqui utsʼat tiʼ pejtelel ora. Maʼanic toj bʌ mach bʌ anic miʼ wis chaʼlen mulil» (Eclesiastés 7:20). Cheʼ maʼ mel mach bʌ weñic yicʼot maʼ taj a sajtemal yom i yʌl chaʼan juntiquil lac piʼʌlet, i añʌch a cʼʌjñibal.

   Chuqui miʼ mejlel i coltañet chaʼan pʼisbil jach chuqui maʼ ñaʼtan: Chaʼlen wersa a weñʼesan chuqui maʼ ñaʼtan, pero mach a pijtan chaʼan laj wen mi caj a mel. Juntiquil xcolel i cʼabaʼ Caleb miʼ yʌl: «Mic chaʼlen wersa chaʼan maʼañic mij cʌlʌx ñaʼtan jiñi mach bʌ weñic tsaʼ c mele». Miʼ chaʼ al: «Mic chaʼlen wersa chaʼan añʌch chuqui mij cʌn ti jiñi mach bʌ weñic tsaʼ c mele».

•   Mach lac laj lac bʌ yicʼot yambʌlob.

   Jiñi Biblia miʼ subeñonla chaʼan «maʼañic majqui yom mi lac ñijcʌben i pusicʼal chaʼan miʼ laj i bʌ yicʼot yambʌ i mach yomic tsʌytsʌyña lac pusicʼal tiʼ tojlel yambʌlob» (Gálatas 5:26). Mi woli jach a ñusan qʼuin a qʼuel foto tac muʼ bʌ i cʼʌjquesañob a wamigojob cheʼ bʌ miʼ melob qʼuiñijel i maʼañic miʼ pʌyetob, mi caj a wubin a chʼijyemlel yicʼot mi caj a michʼan, tajol mach cheʼix mi caj a qʼuel bajcheʼ a wamigojob.

   Chuqui miʼ mejlel i coltañet chaʼan pʼisbil jach chuqui maʼ ñaʼtan: Cʼajtesan chaʼan jiñi a wamigojob mach tiʼ pejtelel ora mi caj i pʌyetob ti jiñi qʼuiñijel tac muʼ bʌ i melob. Cheʼ jaʼel, muʼ bʌ i cʼʌjquesan juntiquil ti internet mach yomic i yʌl chaʼan cojach miʼ mel jiñi. Juntiquil xchʼoc i cʼabaʼ Alexis miʼ yʌl: «Cheʼ bʌ an chuqui yom i cʼʌjquesan juntiquil ti internet cojach miʼ letsan jiñi ñumen wem bʌ miʼ ñusan». I miʼ bej al: «Maʼañic miʼ luʼ letsan muʼ bʌ i mel ti jujumpʼejl qʼuin».

•   Ñumen pʌsʌ a ñʌchʼtʌlel tiʼ tojlel a familia

   Jiñi Biblia miʼ yʌl: «Mi mucʼʌch i mejlel, yaʼ baqui chilil ti laʼ tojlel, ajñenla ti ñʌchʼtʌlel» (Romanos 12:18). Maʼañic miʼ mejlel a ticʼ chuqui miʼ mel yambʌlob, pero mucʼʌch i mejlel a ticʼ bajcheʼ yilal maʼ qʼuel jatet. Jatet a wujil mi a wom ñʌchʼtʌlel.

   Chuqui miʼ mejlel i coltañet chaʼan pʼisbil jach chuqui maʼ ñaʼtan: Chaʼlen wersa a sʌclan ñʌchʼtʌlel ti a familia, lajal bajcheʼ maʼ mel ti yambʌlob. Juntiquil xchʼoc i cʼabaʼ Melinda miʼ yʌl: «Ti lac pejtelel mi lac mel mach bʌ weñic, an i tajol mi lac low yambʌlob ti lac tʼan». Miʼ bej al: «Yomʌch bʌ mi lac mel jiñʌch mi lac ñaʼtan mi mucʼʌch caj lac sʌclan ñʌchʼtʌlel o maʼañic».

•   Aqʼuen wocolix i yʌlʌ yambʌlob.

   Jiñi Biblia miʼ yʌl: «Pʌsʌla chaʼan mucʼʌch laʼ wʌcʼ wocolix laʼ wʌlʌ» (Colosenses 3:15). Cheʼ bʌ ñʌmʌl a wʌqʼuen wocolix i yʌlʌ yambʌlob mi caj i coltañet a qʼuel chuqui wem bʌ miʼ yujtel ti a tojlel i mach jiñic mach bʌ utsʼatic.

   Chuqui miʼ mejlel i coltañet chaʼan pʼisbil jach chuqui maʼ ñaʼtan: I sujmʌch chaʼan an i tajol miʼ yujtel mach bʌ weñic ti a tojlel, pero mach cheʼic tiʼ pejtelel ora. Juntiquil xchʼoc i cʼabaʼ Rebeca miʼ yʌl: «Ti jujumpʼejl qʼuin mic tsʼijbun chuqui wem bʌ miʼ yujtel tic tojlel». Miʼ bej al: «Mic mulan j cʼajtesan chaʼan añʌch ñumen wem bʌ chuqui ujtem tic tojlel».

•   Qʼuele bajcheʼ yilal muʼ bʌ a sujtesan ti a wamigo.

   Jiñi Biblia miʼ yʌl chaʼan «mi tsaʼ laʼ ñochta jiñi mach bʌ weñobic lac piʼʌlob mi caj laʼ cʌy laʼ mel chuqui tac wen» (1 Corintios 15:33). Mi maʼ ñochtan muʼ bʌ i wen mulan wajleya, leco jax bʌ tʼan o michʼicña bʌ, cheʼ mi caj a wujtel jaʼel.

   Chuqui miʼ mejlel i coltañet chaʼan pʼisbil jach chuqui maʼ ñaʼtan: Cheʼ bʌ jiñi a wamigojob miʼ ñusañob wocol, tajol mi caj i subeñetob o miʼ yʌlob mach tac bʌ weñic, miʼ mejlel a coltañob, pero pʼisbil jach bajcheʼ yom maʼ mel chaʼan maʼan miʼ yʌqʼuet ti wocol jaʼel. Juntiquil xchʼoc i cʼabaʼ Michelle miʼ yʌl: «Mach weñic bʌ a wamigojob mi tiʼ pejtelel ora miʼ yʌl chuqui mach bʌ weñic miʼ yujtel tiʼ tojlel i maʼañic baqui ora miʼ yʌl chuqui wem bʌ».

 Jiñi Biblia miʼ yʌl chaʼan ili ora wen wocol yicʼot bʌbʌqʼuen (2 Timoteo 3:1). ¿Wocol ba maʼ wubin chaʼan maʼ taj a qʼuel chuqui wem bʌ miʼ yujtel i mach jiñic jach mach bʌ weñic? Mi a womto a ñumen cʌn, pejcan jiñi artículo «¿Por qué hay tanto sufrimiento?».