Jiñi Centros para el Control y la Prevención de Enfermedades, am bʌ ti Estados Unidos miʼ yʌl chaʼan jiñi xcolelob añoʼ bʌ 15 cʼʌlʌl 19 i jabilelob cʼʌmbilob i chaʼan i tiʼ o i yej ti piʼleya o sexo oral. a «Cheʼ muqʼuic a cʼajtibeñob jiñi xcolelob chaʼan bʌ jiñi piʼleya baqui miʼ cʼʌñob i yej o i tiʼ, mi caj i subeñetob chaʼan mach lecojic ti qʼuelol», cheʼ tsiʼ yʌlʌ Sharlene Azam, tsaʼ bʌ i mele jiñi libro Oral Sex Is the New Goodnight Kiss (Sexo oral: el nuevo beso de buenas noches). I muʼto i chaʼ al: «Mach piʼleyajic miʼ qʼuelob jiñi».

•  ¿Chuqui maʼ ñaʼtan jatet?

•  ¿Baqui bʌ i sujmlel?

•  ¿Am ba i wocolel?

 Jacʼʌ, mucʼʌch o maʼañic.

1.   Cheʼ miʼ cʼʌñob i yej o i tiʼ ti piʼleya, ¿muʼ ba i mejlel i cʌytʌl ti embarazada juntiquil xchʼoc?

   1.   Mucʼʌch

   2.   Maʼañic

2.   ¿Muʼ ba i mejlel i tajob cʼamʌjel cheʼ miʼ cʼʌñob i yej o i tiʼ ti piʼleya?

   1.   Mucʼʌch

   2.   Maʼañic

3.   ¿Muʼ ba i mejlel ti ajlel chaʼan piʼleyajʌch jiñi muʼ bʌ i cʼʌñob i yej o tiʼ?

   1.   Mucʼʌch

   2.   Maʼañic

 Qʼuele mi lajalʌch jiñi tsaʼ bʌ a jacʼʌ yicʼot jiñi muʼ bʌ cajel a qʼuel majlel.

1.   Cheʼ miʼ cʼʌñob i yej o i tiʼ ti piʼleya, ¿muʼ ba i mejlel i cʌytʌl ti embarazada juntiquil xchʼoc?

    I jacʼbal: Maʼañic. Ili jiñʌch junchajp chucoch jiñi lac piʼʌlob miʼ ñaʼtañob chaʼan maʼañic i wocolel cheʼ bʌ miʼ melob bajcheʼ jiñi.

2.   ¿Muʼ ba i mejlel i tajob cʼamʌjel cheʼ miʼ cʼʌñob i yej o i tiʼ ti piʼleya?

    I jacʼbal: Mucʼʌch. Jiñi muʼ bʌ i cʼʌñob i yej o i tiʼ ti piʼleya, miʼ mejlel i tajob hepatitis A o B, infección tiʼ yat o tiʼ vagina, gonorrea, herpes, sida o sífilis.

3.   ¿Muʼ ba i mejlel ti ajlel chaʼan piʼleyajʌch jiñi muʼ bʌ i cʼʌñob i yej o tiʼ?

    I jacʼbal: Mucʼʌch. Mach jiñic jach piʼleya cheʼ bʌ miʼ cʼʌñob i yat o i vagina, piʼleyajʌch jaʼel cheʼ bʌ miʼ cʼʌñob i yej o i tiʼ, i cheʼ miʼ tʌlbeñob i bʌ i yat o i vagina yicʼot cheʼ miʼ piʼleñob i bʌ tiʼ yit.

 Laʼ laj qʼuel chuqui miʼ yʌl jiñi Biblia chaʼan muʼ bʌ i cʼʌñob i yej o i tiʼ ti piʼleya.

 Jiñi Biblia miʼ yʌl: «Ili jiñʌch jiñi yom bʌ Dios [...] chaʼan maʼañic mi laʼ mel tsʼiʼlel» (1 Tesalonicenses 4:3).

 Cheʼ bʌ jiñi Biblia miʼ taj ti tʼan jiñi «tsʼiʼlel» yaʼʌch ochem cheʼ bʌ miʼ piʼleñob i bʌ jiñi maxto bʌ ñujpuñemobic, cheʼ bʌ miʼ cʼʌñob i yej o i tiʼ ti piʼleya, cheʼ bʌ miʼ piʼleñob i bʌ tiʼ yit yicʼot cheʼ miʼ tʌlbeñob i bʌ i yat o i vagina. Muʼ bʌ i mel pejtelel ili tsʼiʼlel mi caj i tajben i wocolel yicʼot mach weñic mi caj i yajñel yicʼot Dios (1 Pedro 3:12).

 Jiñi Biblia miʼ yʌl: «Muʼ bʌ i chaʼlen tsʼiʼlel miʼ chaʼlen mulil tiʼ contra i bʌcʼtal» (1 Corintios 6:18).

 Jiñi muʼ bʌ i cʼʌñob i yej o i tiʼ ti piʼleya miʼ mejlel i cʼamʼesañob i bʌ, miʼ yotsañob i bʌ ti wocol tiʼ tojlel Dios, i mach tijicñayix mi caj i yubiñob i bʌ. Jiñi libro Cómo hablar de sexo con los adolescentes para que te escuchen, miʼ yʌl: «Jiñi muʼ bʌ i piʼleñob i bʌ cheʼ bʌ maxto ñujpuñemobic an muʼ bʌ i chaʼ ñaʼtañob i bʌ i miʼ qʼuelob chaʼan jiñi tsaʼ bʌ i piʼleyob mach i wentajobic. I ñumento mi chaʼ ñaʼtañob i bʌ jiñi yʌñʌl tac bʌ miʼ chaʼleñob piʼleya».

 Jiñi Biblia miʼ yʌl: «Joñon a Yumon, a Dioson muʼ bʌ j cʌntesañet chaʼan maʼ taj chuqui wen» (Isaías 48:17).

 ¿Chaʼan baʼ wenlel maʼ wʌl cheʼ bʌ maʼ jacʼben i tʼan Dios chaʼan jiñi piʼleya? O ¿muʼ baʼ i mʌctañet maʼ wʌl? Ñaʼtancu chaʼan woli a majlel ti carretera i cabʌl señal tac baqui miʼ yʌl bajcheʼ cʼamel yom maʼ chaʼlen ajñel yicʼot baqui maʼ mejlel ti waʼtʌl. ¿Muʼ baʼ ñaʼtan chaʼan jiñi woliʼ mʌctañet o woliʼ cʌntañet? ¿Chuqui mi caj i yujtel mi jatet yicʼot jiñi yambʌlob maʼañic miʼ jacʼob jiñi señal tac?

 Cheʼʌch miʼ yujtel jaʼel mi maʼañic maʼ jacʼben i mandar tac Dios, mi caj a tajben i wocolel (Gálatas 6:7). Jiñi libro Sex Smart (Sexo inteligente), miʼ yʌl: «Cheʼ bʌ maʼañic maʼ chʼʌm ti ñuc jiñi muʼ bʌ a ñop yicʼot jiñi wen tac bʌ cʌmbil a chaʼan, i maʼ mel mach bʌ weñic, jatet maʼañic woli a chʼʌm a bʌ ti ñuc». Pero mi mucʼʌch a jacʼben i mandar Dios mi caj a cʌjñel bajcheʼ wem bʌ lac piʼʌl, i ñumen wen mi caj i yajñel a conciencia (1 Pedro 3:16).