JIÑI XCOLELOB MIʼ CʼAJTIÑOB
¿Chucoch yomʌch mi lac majlel ti tempa bʌ tac?
Jiñi i testigojob Jehová miʼ tempañob i bʌ chaʼsujtel ti jumpʼejl semana yaʼ tiʼ Yotlel tempa bʌ. ¿Chuqui miʼ melob yaʼi? ¿Bajcheʼ mi caj i coltañet cheʼ maʼ majlel ti jiñi tempa bʌ tac?
¿Chuqui miʼ mejlel ti jiñi i Yotlel tempa bʌ?
Yaʼ tiʼ Yotlel tempa bʌ jiñʌch baqui miʼ yʌjqʼuel jiñi cʌntesa loqʼuem bʌ ti Biblia. Jiñi tempa bʌ tac muʼ bʌ i mejlel yaʼi miʼ mejlel i coltañet chaʼan:
Maʼ cʌn i sujmlel chaʼan Dios.
Maʼ chʼʌmben i sujm chucoch an wocol tac ili ora.
Maʼ sujtel ti wem bʌ lac piʼʌl.
Maʼ taj i sujm bʌ a wamigojob.
¿A wujil ba ili? Yaʼ baqui miʼ tempañob i bʌ jiñi i testigojob Jehová cʌmbil bajcheʼ i Yotlel tempa bʌ come jiñʌch baqui miʼ ñumen ajlel chaʼan bʌ i Yumʌntel Dios (Mateo 6:9, 10; 24:14; Lucas 4:43).
¿Chucoch weñʌch cheʼ maʼ majlel yaʼi?
Muʼ bʌ i yʌjlel yaʼi mi caj i coltañet. Jiñi principio tac muʼ bʌ i yʌjlel tiʼ tempa bʌ jiñi i testigojob Jehová mi caj i coltañet chaʼan maʼ taj a ñaʼtʌbal (Proverbios 4:5). Ili yom i yʌl chaʼan jiñi Biblia miʼ mejlel i coltañet chaʼan maʼ mel chuqui wen. Cheʼ jaʼel, miʼ jacʼ cʼajtiya tac bajcheʼ iliyi:
¿I mul ba Dios cheʼ mi lac ñusan wocol?
¿Muʼ ba caj i chaʼ tejchelob jiñi chʌmeñoʼ bʌ?
Ili jiñʌch i cʼabaʼ jiñi chaʼpʼej uxpʼejl discurso muʼ bʌ i yʌjqʼuel cheʼ ti sábado o domingo:
¿Chucoch yomʌch mi laj cʼʌn jiñi Biblia chaʼan miʼ tojʼesan laj cuxtʌlel?
¿Majqui yom mi laj cʼajtiben i coltaya cheʼ bʌ añonla ti wocol?
¿Chuqui woliʼ mel ti lac tojlel jiñi i Yumʌntel Dios?
«Juntiquil c piʼʌl ti clase tsajñi ti tempa bʌ. Yaʼ tsaʼ buchle lon quicʼot i tsaʼ c majñʌbe lojon jiñi jun woli bʌ lon j cʼʌn. Ti wiʼil, tiʼ subeyon chaʼan tsiʼ wen mulaj bajcheʼ jiñi yaʼ bʌ añob tsiʼ yʌqʼueyob i jacʼbal jiñi cʼajtiya tac tsaʼ bʌ mejli. Tiʼ subeyon jaʼel chaʼan yaʼ ti iglesia baqui miʼ yajñel maʼañobic i jun cheʼ bajcheʼ am bʌ lon c chaʼan» (Brenda).
¿A wujil ba ili? Cheʼ maʼ wochel ti jiñi i Yotlel tempa bʌ mach cʼʌñʌlic maʼ toj, i cheʼ jaʼel maʼañic miʼ cʼajtintel taqʼuin.
Jiñi muʼ bʌ caj a cʌñob yaʼ ti tempa bʌ mi caj i tijicñesañob a pusicʼal. Muʼ bʌ i yʌl jiñi Biblia chaʼan cheʼ bʌ miʼ tempañob i bʌ jiñi xñoptʼañob chaʼañʌch miʼ tijicñesʌbeñob i bʌ i pusicʼal (Hebreos 10:24, 25). Jiñi quixtañujob ti ili pañimil i bajñel jach miʼ chʼʌmob i bʌ ti ñuc, pero cheʼ mi la cajñel la quicʼot jiñi muʼ bʌ i qʼuelob ti ñuc i chaʼan bʌ Dios yicʼot muʼ bʌ i chʼʌmob ti ñuc yambʌlob, mi caj i coltañonla.
«Cheʼ bʌ miʼ yujtel jumpʼejl qʼuin, chʼijyemon i lujbeñon, pero muʼ bʌ i majlelob ti jiñi i Yotlel tempa bʌ miʼ yʌqʼueñoñob cubin c tijicñʌyel. Cheʼ bʌ miʼ yujtel tempa bʌ i mic chaʼ majlel ti cotot, tijicñayoñix i chajpʌbiloñix chaʼan tiʼ yijcʼʌlel» (Elisa).
¿A wujil ba ili? Tiʼ pejtelel pañimil an 120 mil congregación tac i chaʼan i testigojob Jehová i ñumen ti 60 mil baqui miʼ tempañob i bʌ. Jujumpʼejl jab, cheʼ bʌ 1,500 i Yotlel tempa bʌ miʼ mejlel come woliʼ ñumen ocʼan majlel jiñi muʼ bʌ i tempañob i bʌ. *
^ Mi a wom a ñaʼtan baqui an jumpʼejl i Yotlel tempa bʌ ochen yaʼ ti jw.org baqui miʼ yʌl «Tempa bʌ tac» i petsʼej yaʼ baqui miʼ yʌl «Sajcan baqui a wom majlel».