Jiñi apóstol Pablo tiʼ tsʼijbu: «Cheʼ bʌ com c mel chuqui wen, jiñi mach bʌ weñic an tic tojlel» (Romanos 7:​21). ¿Am ba a wubi a bʌ bajcheʼ jiñi? Mi cheʼʌchi, ili artículo mi caj i coltañet chaʼan maʼañic maʼ yajlel ti mulil.

•  Yom bʌ maʼ ñaʼtan

•  Muʼ bʌ mejlel a mel

•  Muʼ bʌ i yʌl yambʌ xcolelob

 Cheʼ mi lac xijqʼuel tiʼ melol mach bʌ wen mi lac mejlel ti yajlel ti mulil. Jiñi Biblia miʼ yʌl: «Mi tsaʼ laʼ ñochta jiñi mach bʌ weñobic lac piʼʌlob mi caj laʼ cʌy laʼ mel chuqui tac wen» (1 Corintios 15:33). Cheʼ mi lac xijqʼuel o mi laj qʼuel ti internet muʼ bʌ i mejlel i yʌcʼonla ti mulil mi caj i yʌcʼ chaʼan lac pusicʼal miʼ mulan i tsajcañob majlel ti jontolil yambʌlob (Éxodo 23:2).

 «Tajol maʼ tech a mel chuqui tac miʼ melob yambʌlob chaʼan jach a wom chaʼan utsʼat miʼ qʼueletob i miʼ chʼʌmetob ti ñuc» (Jeremy).

 Ñaʼtancu ili: Mi maʼ cʌlʌx ñaʼtan chuqui miʼ mejlel i yʌlob yambʌlob, ¿chucoch ñumen wocol mi caj a wubin chaʼan maʼ lʌtʼ jiñi xicʼol ti melol mach bʌ weñic? (Proverbios 29:25).

 Muʼ bʌ laj cʌn: Mach a wʌcʼ chaʼan jiñi a xicʼol ti yambʌlob miʼ yʌqʼueñet a ñusan ti pʼis jiñi principio tac.

 Yomʌch i sujm jiñi ñopol bʌ a chaʼan. Mi maʼañic maʼ wen ñop jiñi cʌmbil bʌ a chaʼan, maʼ mejlel ti sujtel bajcheʼ jumpʼejl títere am bʌ tiʼ cʼʌb yambʌlob. Ñumen wen cheʼ maʼ jacʼ ili ticʼojel am bʌ ti Biblia: «Wen qʼuelela mi i sujmʌch pejtelel chuqui an i tsʌts chucu laʼ bʌ ti chuqui wen» (1 Tesalonicenses 5:​21). Mi mucʼʌch a wen chʼʌmben i sujm jiñi ñopol bʌ a chaʼan, mach wocolic mi caj a wubin chaʼan maʼ jacʼ i maʼañic maʼ yajlel ti mulil.

 Ñaʼtancu ili: ¿Chucoch weñʌch maʼ wʌl cheʼ ma jacʼ jiñi i mandar tac Dios?

 «An j qʼuele chaʼan, cheʼ bʌ mucʼʌch c jacʼ jiñi ñopol bʌ c chaʼan i maʼañic mic jacʼ c mel mach bʌ weñic, jiñi yambʌlob maʼañix chuqui miʼ subeñoñob» (Kimberly).

 Wem bʌ ejemplo: Daniel. Tajol cheʼ bʌ xcolelto tsiʼ ñaʼta tiʼ pusicʼal chaʼan mi caj i jacʼ jiñi i mandar tac Dios (Daniel 1:8).

 Cʌñʌ baqui tac bʌ a cʼunlel. Jiñi Biblia miʼ taj ti tʼan «chuqui yomob jiñi xcolelob», ili jiñʌch chuqui tac wen yomob o muʼ bʌ i wen mulañob cheʼ bʌ pecʼobto i jabilel (2 Timoteo 2:​22) Mach jiñic jach cheʼ wen yomob piʼleya, yaʼ ochem jaʼel cheʼ yomob sujtel bajcheʼ yambʌlob o yomob i mel chuqui bajñel yomob anquese maxto chajpʌbilobic.

 Ñaʼtancu ili: Jiñi Biblia miʼ yʌl chaʼan «jujuntiquil miʼ qʼuelbentel i pusicʼal cheʼ miʼ pʌjyel i miʼ chujquel ti chuqui bajñel yom i pusicʼal» (Santiago 1:​14). ¿Chuqui jiñi bajñel yom bʌ a pusicʼal?

 «Yomʌch maʼ wen cʌn chuqui jiñi muʼ bʌ i mejlel i yʌqʼuet ti yajlel ti mulil. Sʌclan información chaʼan maʼ ñaʼtan bajcheʼ miʼ mejlel a lʌtʼ i tsʼijbun chuqui tac miʼ mejlel i coltañet. Cheʼ bajcheʼ jiñi a ñaʼtayix chuqui mi caj a mel cheʼ bʌ maʼ subentel a mel mach bʌ weñic» (Sylvia).

 Wem bʌ ejemplo: David. Tsiʼ mele chuqui bajñel yom i pusicʼal yicʼot tsiʼ jacʼʌ i xicʼol ti yambʌlob. Pero David tsiʼ chaʼ ñaʼta i bʌ i tsiʼ chaʼle wersa i tojʼesan i melbal. Tiʼ sube Jehová ti oración: «Dios, chaʼ melbeñon c pusicʼal ti sʌc. Chaʼ mele quespíritu ti tsijib yicʼot ti toj» (Salmo 51:10).

 Tiqʼui a bʌ. Jiñi Biblia miʼ yʌl: «Mach a wʌqʼuen i mʌlbeñet jiñi mach bʌ weñic» (Romanos 12:21). Ili yom i yʌl chaʼan mach mejlic i wersa jotet jiñi mulil. Miʼ mejlel a yajcan a mel chuqui wen.

 Ñaʼtancu ili: ¿Chuqui miʼ mejlel a mel chaʼan maʼ a ticʼ a bʌ yicʼot chaʼan maʼ mel chuqui wen cheʼ bʌ jiñi a pusicʼal yom i mel chuqui yom?

 «Mic ñaʼtan bajcheʼ yubil mi caj cubin c bʌ cheʼ muqʼuic c yajlel ti mulil. ¿Tijicña ba mi caj cubin c bʌ? Tajol, pero jumucʼ jach. ¿Tijicña ba mi caj cubin c bʌ ti wiʼil? Maʼañic, tiʼ sujm ñumen chʼijyem mi caj cubin c bʌ. Cheʼ jiñi, ¿anto ba i cʼʌjñibal? Maʼañic» (Sophia).

 Wem bʌ ejemplo: Pablo. Yujil chaʼan an i cʼunlel jaʼel, pero Pablo tsiʼ tiqʼui i bʌ. Tsiʼ yʌlʌ chaʼan miʼ jatsʼ i bʌcʼtal i miʼ sujtesan ti xyaj eʼtel (1 Corintios 9:​27).

 Muʼ bʌ laj cʌn: An ti a wenta chaʼan maʼañic maʼ yajlel ti mulil, miʼ mejlel a ticʼ a bʌ.

 Cʼajtesan chaʼan mucʼ jach i ñumel jiñi muʼ bʌ i yʌcʼonla ti yajlel ti mulil. Melissa, 20 jaxto bʌ i jabilel, miʼ yʌl: «Cheʼ bʌ xchʼoconto an cabʌl muʼ bʌ i yʌcʼonla ti mulil wen tsʌts bʌ tsaʼ cubi, pero ili ora mach cheʼixi». Miʼ bej al: «Ili miʼ yʌqʼueñon c ñaʼtan chaʼan jiñi muʼ bʌ i mejlel i yʌcʼon ti mulil ili ora mi caj i ñumel jaʼel. Ti wiʼil mi caj j cʼajtesan tsaʼ bʌ ujti i mi caj j qʼuel chaʼan weñʌch cheʼ tsaʼʌch c lʌtʼʌ».