«Añix cheʼ bʌ chaʼpʼej uxpʼejl jab tsiʼ wen aqʼueyon ansiedad. Lajal bajcheʼ tiʼ pejtelel ora an chuqui an tic pusicʼal. An i tajol tsaʼto c ñaʼta c tsʌnsan c bʌ. Anquese tiʼ sujm mach comic chʌmel, com jach miʼ jilel jiñi c wocol» (Jonathan, 17 bʌ i jabilel).

 Ti jumpʼejl encuesta tsaʼ bʌ melbenti 14 mil alumnojob ti secundaria, ti 5 tac an juntiquil tsaʼ bʌ i yʌlʌ chaʼan ñaʼtʌbil i chaʼan i tsʌnsan i bʌ ti jiñi cojix bʌ jumpʼejl jab ñumen bʌ. * ¿Chuqui miʼ mejlel a mel mi maʼañix chuqui yeʼtel cuxulet maʼ wubin?

•   Pijtanto. Acʼʌ a tʼan chaʼan maʼañic chuqui mi caj a waʼ mel tiʼ caj bajcheʼ yubil maʼ wubin a bʌ. Anquese mach cujchix a chaʼan maʼ wubin jiñi a wocol, añʌch chuqui miʼ mejlel a mel chaʼan maʼ cuch.

 ¿Maʼañix ba a loqʼuib maʼ wubin? An i tajol maʼañic mi lac wen taj laj qʼuel jiñi muʼ bʌ i yujtel tiʼ caj bajcheʼ yubil mi la cubin lac bʌ. An yan tac bʌ muʼ bʌ i mejlel i coltañet a lʌtʼ jiñi woli bʌ a ñusan. Mi caj a qʼuel chaʼan mach wocolic maʼ tajben i loqʼuib jiñi a wocol cheʼ bʌ maʼ coltʌntel.

•  Texto: «Bajcheʼ jach mi lon c tsʌtsʌ ñejtʼel, pero maʼañic mi lon c ñejtʼel jinto maʼañix miʼ mejlel c ñijcan lon c bʌ, maʼañic mi lon c ñaʼtan chuqui yom mi lon c mel, pero añʌch lon c loqʼuib» (2 Corintios 4:8).

   Muʼ bʌ i mejlel a mel: Mi maʼañic maʼ cʌy a ñaʼtan a tsʌnsan a bʌ i muʼto i ñumen tilel ti a jol jiñi, sʌclan a coltʌntel. Miʼ mejlel a pejcan jumpʼejl organización muʼ bʌ i coltañob jiñi yomoʼ bʌ i tsʌnsañob i bʌ o maʼ majlel ti hospital. Yaʼi mi caj a taj yomoʼ bʌ i coltañet yicʼot mucʼʌch bʌ i mejlel i coltañetob.

•   An majqui yom maʼ suben. An mucʼʌch bʌ i qʼueletob ti ñuc yicʼot yomob i coltañet, bajcheʼ jiñi a wamigojob yicʼot a familia. Pero maʼañic mi caj i ñaʼtañob chuqui woli a ñusan mi maʼañic maʼ subeñob.

 An yom bʌ miʼ cʼʌñob lente chaʼan miʼ ñumen cʼotelob i wut. Juntiquil amigo miʼ mejlel ti sujtel bajcheʼ jiñi lente: Miʼ mejlel i coltañet a qʼuel chuqui jiñi woli bʌ i yujtel yicʼot chaʼan maʼañix maʼ ñaʼtan chʌmel.

•  Texto: «Mi isujm miʼ cʼuxbiñonla laj cʌñʌ bʌ [...] junlajalʌch bajcheʼ lac piʼʌl baʼ ora woli la cubin wocol» (Proverbios 17:17).

   Muʼ bʌ i mejlel a mel: Chaʼan maʼ tech a sub bajcheʼ yubil woli a wubin, miʼ mejlel a wʌl: «An i tajol mic ñaʼtan mach tac bʌ weñic tic tojlel, ¿muʼ ba c mejlel c subeñet chuqui woli c ñusan?». O miʼ mejlel a wʌl: «An c wocol tac maʼañic bʌ mi’ mejlel c bajñel tojʼesan, ¿muʼ ba i mejlel a coltañon?».

•   Cucu ti doctor. An cʼamʌjel tac bajcheʼ jiñi ansiedad o jiñi depresión muʼ bʌ i mejlel i yʌqʼueñonla la cubin chaʼan la comix mi lac chʌmel. Pero añʌch i tsʼʌcal ili cʼamʌjel tac.

 Cheʼ bʌ an lac sijmal mach la comic uchʼel mi la cubin, cheʼ jaʼel jiñi depresión miʼ mejlel i yʌqʼueñonla la cubin chaʼan mach la comix cheʼ cuxulonla. Pero añʌch i tsʼʌcal ili chaʼpʼejl cʼamʌjel.

•  Texto: «Jiñi cʼocʼoʼ bʌ mach i cʼʌjñibalic i chaʼañob doctor, pero jiñi cʼamoʼ bʌ i cʼʌjñibalʌch i chaʼañob» (Mateo 9:12).

   Muʼ bʌ i mejlel a mel: Yom wen maʼ wʌyel, mele ejercicio yicʼot cʌntan chuqui maʼ cʼux. Mi cʼoqʼuetʌch tijicña mi caj a wubin a bʌ yicʼot wen jach chuqui mi caj a ñaʼtan.

•   Chaʼlen tʼan a wicʼot Dios. Jiñi Biblia miʼ yʌl chaʼan jiñi tsaʼ bʌ i meleyonla «ñumen ñuc bajcheʼ jiñi lac pusicʼal i laj i cʌñʌ chuqui an» (1 Juan 3:20). ¿Ixcu cheʼ muqʼuic a melben oración wʌle? Pejcan tiʼ cʼabaʼ, Jehová, i suben bajcheʼ yubil maʼ wubin.

 An wocol tac maʼañic bʌ miʼ mejlel a bajñel tojʼesan. Jehová, jiñi tsaʼ bʌ i meleyet, yomʌch i coltañet.

•  Texto: «Mach yʌlʌyic chuqui mi laʼ ñusan, aqʼuenla i ñaʼtan Dios ti oración, [...] i jiñi i ñʌchʼtʌlel Dios, maʼañic bʌ miʼ mejlel i chʼʌmben i sujm mi juntiquilic lac piʼʌl, mi caj i cʌntan laʼ pusicʼal yicʼot laʼ ñaʼtʌbal» (Filipenses 4:6, 7).

   Muʼ bʌ i mejlel a mel: Mach yom jach maʼ suben Jehová jiñi a wocol tac, ñaʼtan chucoch a wom a wʌqʼuen wocolix i yʌlʌ ti ili qʼuin (Colosenses 3:15). Cheʼ maʼ wʌqʼuen wocolix i yʌlʌ mi caj i coltañet chaʼan ñumen tijicñayet.

 Sʌclan a coltʌntel mi maʼañix chuqui yeʼtel cuxulet maʼ wubin. Jiñʌch tsaʼ bʌ i mele Jonathan, tsaʼ bʌ lac taja ti tʼan ti ñaxan. Miʼ yʌl: «Mach junsujtelic jach tsaʼ c chaʼle tʼan quicʼotob c papá yicʼot c mamá yicʼot tsajñon ti doctor, i wʌle ñumen tijicñayix mi cubin c bʌ. Muqʼuixto i tilel mach tac bʌ weñic tic jol, pero maʼañix mic ñaʼtan c tsʌnsan c bʌ».